Read chopi Zakariya 13 Bible Online

Zakariya 13 - chopi bible

Zakariya 13

¹Ka ditshiku dile, ku nava txisima txo lumba nyumba ya ka Dhavhidha, ni vahanyi va Jerusalema, kasi kukuwula txionho, ni kwa mbi sawuleka.

²Se ku na maheka ka ditshiku donedo, kuwomba MKOMA wa Mabutho a Tiyimbi, ti to ni thavisa matina a sithombe ha mafuni, kha va na mbi ngadi ve si alakanya kambe; niku ni tovela vaprofeti, ni moya wa kwa mbi sawuleka ha ditikoni.

³Se ku na maheka taku, ngako wokari a txi ngadi e profeta, tate wakwe ni mwamwakwe va nga m'veleka, va na kha vona: Khu na mbi hanya, nguko u wombawombile makuhu ngu ditina da MKOMA; se tate wakwe ni mwamwakwe, va nga m'veleka, va na thola efa, a txi ngadi e profeta.

⁴Se ka ditshiku donedo, ku na maheka tito, vaprofeti ve theleka tingana, mmwani ni mmwani ngu mhaka ya txiwoniso txakwe, a txi ngadi e profeta, kambe kha va na mbi ngadi ve ambala dijasi da matoya, kasiku ve mana kuhemba.

⁵Aniko va na kha vona: Kha ni nga mprofeti, ni m'dimi wa mafu; nguko ni txithumi kukhukhela wuphyani kwangu.

⁶Se ngako wokari a txi muwotisa a txi khene: Silondeso nza txani manzanimo kwako kani? Ene a na khene: Nzilonda si ni nga dayiswa m'tini ka vangana vangu.

⁷ Awe ditxhari khukha u lwa ni m'dyisi, lwana ni wamwamna wule i ku mngana wangu, kuwomba MKOMA wa Mabutho a Tiyimbi; peka m'dyisi, se ti na hangalaka tinvuta; aniko ni na nawuluta dianza dangu, ni peka vale vavadotho.

⁸Se ku na maheka ka otshe mafu, kuwomba MKOMA, taku madhawa mambidi a vathu, ma na dawa, me lova; aniko da wuraru di na sala.

⁹Se ni na pindisa dile da wuraru ngu ha ka mndilo, ni txi di sawulekisa, ku nga tile yi nga sawulekisa tona silivhela, kambe ni na di duka ku nga ti yi dukiswako tona nzalama, dona di na dhumisa ditina dangu, se ani ni na di engisa; ni na khani: Mbathu vangu; se dona di na kha dona: MKOMA, Njizimu txangu.