Read chopi Zakariya 3 Bible Online

Zakariya 3 - chopi bible

Zakariya 3

¹Se Txizimu txi to ni komba Joxuwa, mphaxeli wa hombe, awu a nga ti ti masoni ka Ngelozi ya MKOMA, se Sathani a ti ti ka dianza da txinene da Joxuwa, kasi ku mmangala.

²Aniko MKOMA a to khene ka Sathani: MKOMA wa kukawuka awe Sathani, ina, MKOMA, wu a nga sawula Jerusalema, wa kukawuka; ina hi nga txisoso txo thaviswa ha mndiloni kani?

³Sekoko, Joxuwa, a ti ambate syambalo sa nzambwa, a di emile masoni ka ngelozi.

⁴Sekoko ngelozi yi txi womba-womba, yi to ruma vale va nga ti ti masoni ka yona, yi txi kha yona: Mthaviseni syambalo siya sa nzabwa. Se yi to kha yona ka Joxuwa: Wona taku ni thavisile wubihi masoni kwako, ni na kuambeka syambalo sa siphya.

⁵Ani ni to khani: Muambekeni txigoko txo basa ha msungo kwakwe. Se va to muambeka txigoko txo basa ha msungo kwakwe, ni ku muambeka syambalo; kambe Ngelozi ya MKOMA yi ti ti kona hale.

⁶Se Ngelozi ya MKOMA yi to tsanisa Joxuwa, yi txi kha yona:

⁷A womba tiya MKOMA wa Mabutho a Tiyimbi: U txi tsimbila ngu tinzila tangu, u xayisa sileleto sangu, ngawe u no lamula nyumba yangu, ni kuxayisa mitendela yangu, ni na kuninga wukhalo hagari ka awa ma kuho hawa.

⁸Engisa koko, awe Joxuwa, mphaxeli wa hombe, awe ni vangana vako, vale va nga khalahatsha masoni kwako, nguko mbavamna va mapimo amanene; wona taku ni na tisa txithumi txangu, atxi i ku kuthunga.

⁹Nguko ndide hawa dirigwi di ni ngadi veka masoni ka Joxuwa; txitimwi ka dirigwi di da dimwedo, ku ni mtxhanu wa maso ni mambidi; wona taku ani ni na kenyela mibhalo ya kona, kuwomba MKOMA wa Mabutho a Tiyimbi, ni na thavisa wubihi wa ditiko diya ngu ditshiku dimwedo.

¹⁰ Ka ditshiku donedo, kuwomba MKOMA wa Mabutho a Tiyimbi, mmwani ni mmwani kwanu, a na ramba muakelani wakwe, kuya zumba nayo hahatshi ka mivhinya, ni hahatshi ka mikuwu.