Read chopi Zakariya 4 Bible Online

Zakariya 4 - chopi bible

Zakariya 4

¹Se ngelozi yile yi nga womba-womba ni nani, yi to wuya kambe, yi ta ni wusa, ku nga m'thu wu a wuswako ha wukoheni kwakwe;

²Yi txi ni gela ku kha yona: U wona txani kani? Se ani ni ti khani: Ni txi wona, no wona txipande txo mahwa ngu nzalama dwe, txitimwi ka txona ku di ni txiya txo thela kona mtona, ni mtxhanu wa malambu ni mambidi, se dilambu dimwedo ni dimwedo di ti ti ni mtxhanu wa mipofu ni yimbidi.

³ Se ni miolivha yimbidi, ngu txitimwi ka txipande, wumwewo ka didhawa da txinene da txiya txa mtona, ni wumwani ngu txibhabha.

⁴Se ni to wotisa ka ngelozi yile yi nga ti ti womba-womba ni nani, ni txi khani: Awe nyamne wangu, nji txani txiya kani?

⁵Sekoko, ngelozi yile yi nga ti ti womba-womba ni nani, yi to xamula kwangu, yi txi kha yona: Khu ti zivi taku nji txani txiya kani? Se ani ni txi khani: Ahim-him, nyamne wangu.

⁶Se a to xamula a txi khene kwangu: Adiya dipswi da MKOMA ka Zorobhabheli, do khene: Hi nga ngu mtamo, hambi ngu yimbi, aniko ngu moya wangu, kuwomba MKOMA wa Mabutho a Tiyimbi.

⁷U mani awe, mmangowe wa hombe kani? Masoni ka Zorobhabheli u na va libala; nguko ene a na tisa dirigwi do khata, se vathu va na kwangula, va txi kha vona: Wumbilu, wumbilu wu nave kwakwe.

⁸Se dipswi da MKOMA di to ta kambe kwangu, di txi kha dona:

⁹Manza a Zorobhabheli ma khatile nyumba yiya, kambe manza akwe ma na yi heta, kuva mi txi na tiziva taku, MKOMA wa Mabutho a Tiyimbi, a ni rumile kwanu.

¹⁰Nguko i mani a eyisako ditshiku da timhaka ta tidotho kani? Ina, nguko eyo a na tsaka mbimo yi a no wona ngoti ya lipimo manzani ka Zorobhabheli. Ngu ona maso a mtxhanu ni mambidi a MKOMA, ma wonetelako kotshe ha mafuni.

¹¹Ni to m'gela kambe ni txi khani kwakwe: Nzitxani miolivha yimbidi ngu txinene ka txipande, ni txibhabha ka txona kani?

¹²Se ni di wombawombile kambe ni to khani: Njitxani sidhavyana sileya sa simbidi sa miolivha, hafuhi ni mipopi yimbidi ya nzalama, yi theketako nzalama kani?

¹³Se ene a ni xamute a txi khene: Khu txi zivi taku nji txani txiya kani? Se ani ni ti khani, ahim-him, nyamne wangu.

¹⁴Sekoko ene a to khene kambe: Avava ngu vale vavambidi va nga totwa, va ku masoni ka MKOMA wa otshe mafu.