Read chopi Zakariya 5 Bible Online

Zakariya 5 - chopi bible

Zakariya 5

¹Ni to engeta kambe ni gula maso angu, ni wona, ni to wona dibhuku do puruma.

²Se ngelozi yi to ni wotisa tiya: U wona txani kani? Se ani ni ti khani: No wona dibhuku di purumako, di ku ni magumi mambidi a mikono ya kulapha, ni digumi da mikono ya kuanama.

³Sekoko ngelozi yi to ni gela ku kha yona: Atxiya njiruko txi txi no huma txitimwi ka otshe mafu; nguko ni wihi a no pa, a na tutumiswa ditikoni, madingano ni txiruko txa didhawa dimwedo; se ni wihi wule a no xambanya makuhu a na thaviswa ha ditikoni, madingano ni txiruko txa dimwani didhawa.

⁴Aniko txiruko txiya, ni na txi tisa, kuwomba MKOMA wa Mabutho a Tiyimbi, se ni na txi wuleta nyumbani ka dikhamba, ni nyumbani ka wule a xambanyako makuhu ngu ditina dangu; txi na zumba wusiku wothse nyumbani kwakwe, kambe txi na heta mapulango a yona, ni marigwi a kona.

⁵Se ku to huma ngelozi yile yi nga ti ti womba-womba ni nani, yi txi ta kha yona: Guleta konkuwa maso ako, u wona ti to nji txani txi txi humako.

⁶Ani ni to khani: Njitxani txiya kani? Se ngelozi yi to kha yona: Eyo i efa yi humako. Yi to kha yona kambe: Aawa mazumbelo a votshe va ku ha mafuni.

⁷Se wona taku ku to guletwa txidhingizelo txo nemela ngutu, se ni wamsikati a ti khalahatshile mndani ka efa.

⁸Se ngelozi yi to kha yona: Awuwa mbubihi. Se ngelozi yi to retha wamsikati mndani ka efa, yi vhala ngu txidhingizelo txo nemela ngutu.

⁹Se ni to guleta maso angu ni wona, ku to huma vavasikati vambidi, ve wusa moya ngu tibhapi tawe, nguko va ti ti ni tibhapi to nga ta nyawukolwe; se va to guleta efa hagari ka mafu ni nzuma.

¹⁰Sekoko ani ni to khani ka ngelozi yi yi nga ti ti womba-womba ni nani: Va yi yisa hayi efa yile kani?

¹¹Se ngelozi yi to ni gela tiya: Vo ya yi akela nyumba ditikoni ka Sinari, aha yi no gwita kuakwa, efa yi na vekwa ka wukhalo wa yona.