Read chopi Zakariya 7 Bible Online

Zakariya 7 - chopi bible

Zakariya 7

¹Sekoko ku to maheka tito, ka dilembe da wumune da mfumeli Dhariyo, dipswi da MKOMA dita ka Zakariya, ka ditshiku da wumune, ka mtxima wa wutxhanu ni wumune, i ku Kisilewu.

²Mbimo yile ku ngu Bheteli ku nga rumelwa Saresari, ni Rejemi-Meleki, ni vamwani vavamna, kasi kuya kombela kuvhunwa ngu MKOMA,

³va to gela vaphaxeli vale va nga ti ti Nyumbani ka MKOMA wa Mabutho a Tiyimbi, ni ka vaprofeti, va txi kha vona: Ina ni na dila ka mtxima wa wutxhanu, ni ti tona, nga tile ni tolovelako kumaha, ka malembe amangi kani?

⁴Sekoko dipswi da MKOMA wa Mabutho a Tiyimbi di tile kwangu, di txi ta kha dona:

⁵Gela votshe vathu va ditiko diya, ni votshe vaphaxeli, u txi khawe: Mbimo yile mi nga ti tona, ni kudila, ka mtxima wa wutxhanu ni wa wutxhanu ni yimbidi, mndani ka malembe awa a mtxhanu wa magumi ni magumi mambidi, ina anu mi ti tonete ani, ngu ditshuri mi ti tonete ani kani?

⁶Mwendo mbimo yile mi nga dya, ni mbimo yile mi nga sela, ina kha ma dya ni kuselela ku ti tsakisa mipune kani?

⁷Ina anu kha ma mapfa mapswi ale MKOMA a nga ma txhumayela, ngu mthumo wa vaprofeti vo khata, mbimo yile Jerusalema a nga ti ngadi ni vathu, na a di thuthile, ni kuranganyetwa ngu madhoropa akwe, se Wulambwe ni libalani, ku ti ti ni vathu kani?

⁸Se dipswi da MKOMA di to ta ka Zakariya di txi ta kha dona:

⁹MKOMA wa Mabutho a Tiyimbi a to womba, a txi khene: Mahani wululamo wa ditshuri, kombisani kudivalela ni wumbilu, mmwani ni mmwani ka mwanawe;

¹⁰se mi nga xaniseni noni, hambi wo felwa ngu vaveleki, ni wa matiko, ni txisiwana, mwendo kualakanyela wubihi mmwani ni mmwani ka mwanawe, mbiluni kwakwe.

¹¹Sekoko vona kha va lava kuengisa, va to ni komba makata o ni nyenya, ve tsiva ni tinzeve tawe, kasi ku va si engisi.

¹²Ina, va bangisile timbilu tawe ti fana ni marigwi a dhayimani, kasi ku va si engisi mlayo, ni mapswi awa MKOMA wa Mabutho a Tiyimbi a nga ti ma rumete ngu Moya wakwe, a txi thuma nga vaprofeti vo khata, ngumo ku nga ta ngu kona kuhenya ka hombe ka MKOMA wa Mabutho a Tiyimbi.

¹³Se ku to maheka tito, ngako ene a nga kwangula, vona kha va engisa, ngu toneto, ni vona va na kwangula, aniko ani kha ni na mbi va engisa, kuwomba MKOMA wa Mabutho a Tiyimbi.

¹⁴Se ni na va hangalasa ngu txingulu, hagari ka otshe matiko ale va nga mbi ma ziva, se ditiko di na maha dirumbi msana kwawe, aha kaku, ku si pindi m'thu ni wammweyo ka dona, hambi kutshumela, nguko va lekile ditiko da dinene, di maha dirumbi.