Read chopi Zakariya 9 Bible Online

Zakariya 9 - chopi bible

Zakariya 9

¹Dipswi da MKOMA do wukela ditiko da Hadraki ni Dhamasku, i ku wukhalo wakwe wo humula ka wona; nguko mawonelo a vathu ni a totshe tihunzu ta ka Israyeli, ma rendekela ka MKOMA.

²Se hambi ka didhoropa da Hamati ku nava ni mihingano, kumweko ni Tiro ni Sidhoni, hambi va txo va ni wutxhari wa hombe.

³Se Tiro a ti akete mikhokhola ni kusengeleta silivhela ku nga lithulu, ni nzalama yo hehuka ku nga lidhaka la hanzila.

⁴Wonani ti to MKOMA a na mxasela, ni kutshotsha mtamo wakwe lineneni, se ene a na loviswa ngu mndilo.

⁵Asikeloni a na mu wona e thava, nene Gaza e thava, se e pandiseka ngutu, ngu toneto nene Ekroni, nguko kuverela kwakwe ku na kanganyiswa; se mfumeli wa Gaza a na lova, kambe Asikeloni a na maha dirumbi.

⁶Se muwuyi a na zumba kona Asidhodhe. Kambe ni na lovisa kutikulisa ka Vafilista.

⁷Se txisofuni kwawe ni na thavisa mnoha wakwe, ni thavisa txinyenyeko txawe makwasani kwawe; kambe nene a na sala nga m'boti ka Txizimu txathu; a na fana ni mthangeli aniya Judha, ni Ekroni a na nga M'jebhusi.

⁸Se ani ni na riyela mabutho akwe, madhawani ka nyumba yangu, kasi ku si pindi ni wammweyo, ni ti to ku si tshumeli ni wammweyo; a ti to ku sisuri kupinda mlala ni wammweyo, nguko konkuwa ni ti woni.

⁹ Tsaka ngutu awe muhorana wa Siyoni; kulungela awe Jerusalema; wona taku mfumeli wako a nata kwako, wo lulama kambe Muhanyisi; wa txisiwana, a di gadhile mbongola, txitimwi ka tximbongolana, mwanana wa mbongola.

¹⁰Se ni na hoxota sikotxikani sa Efrayime, ni mahantxhi a Jerusalema, ni kufunyeletela wulaho wa yimbi; se ene a na pfalisa kudikha matikoni; se kufuma kwakwe ku na nava, kukhukhela ka linene limwelo, kala ka limwani linene, ni kukhukhela ka mnambo kala magwito ka mafu.

¹¹Kasi i di awe ngu mhaka ya mnoha wa txitumelelano txako, ni humisile tikhumbi tako ngu diphalani mu ku nga si nga ni mati.

¹²Tshumelani miya mkhokholani, anu tikhumbi ta txithembo; kambe nyamsi, na mi zivisa taku ni na mi tshumetela kumbidi.

¹³Nguko ni dombile Judha kwangu, ni tata Efrayime ngu wulaho; ni na wusa vanana vako awe Siyoni, veya lwisa vanana vako awe Gresiya! Se ni na kuveka ku nga ditxhari da ndena.

¹⁴MKOMA a na wonwa txitimwi kwawe, tingove takwe ti na huma kufana ni nyangafula; MKOMA Txizimu a na pfalisa mpundu, kambe a na tsimbila ni sihuhuri sa Wulambe.

¹⁵MKOMA wa Mabutho a Tiyimbi a na va vhikela; se va na dya msana ka kuva va di xute valala ngu marigwi a txibhalakaza; kambe va na sela ve maha diguwa nga va to leviswa ngu vhinya; se va na tala nga majingo txiluveloni.

¹⁶Se MKOMA, Txizimu txawe, ka ditshiku donedo, a na va hanyisa, kufana ni mtxhambi wa vathu vakwe; nga marigwi a m'bhoti, va na guletwa ditikoni kwawe.

¹⁷Nguko nga tona ti wu nga kulisa tona wunene wawe! Ni ti va nga tshurisa tona! Se fulaho yi na tshurisa majaha, ni vhinya ya yiphwa yi na tshurisa mahorana.