Read chopi Malakiya 2 Bible Online

Malakiya 2 - chopi bible

Malakiya 2

¹Se konkuwa, anu vaphaxeli, txirumo txiya txi lumba anu.

²Ngako mi si txi engisi, mi si ti emiseli timbiluni kwanu, kuninga txithavo ka ditina dangu, kuwomba MKOMA wa Mabutho a Tiyimbi, ni na rumela makhombo txitimwi kwanu, kambe ni na ruketela tithomba tanu, se ni ti ruketete nguko anu kha mi ti veki eto timbiluni kwanu.

³Wonani taku ni na sinisa timbewu tanu, ni mi thela ngu mswanye tikhoheni kwanu, mswanye wa mibuso yanu; se mi na tshotshwa kumweko nawo.

⁴ Sekoko mi na tiziva taku ani ni mi rumete txirumo txiya, kasi ku txitumelelano txangu ni va ka Levhi txi tsana, kuwomba MKOMA wa Mabutho a Tiyimbi.

⁵ Txitumelelano txangu ni nene, i ti ti txa wutomi ni kudikha, se ani ni mningile txona kasi ku e ni thava; se a ni thavile e xamala ngu mhaka ya ditina dangu.

⁶Mlayo wa ditshuri wu ti ti txisofuni kwakwe, kambe kha ka maneka wubihi txisofuni kwakwe, a tsimbite ni nani ngu kudikha, ni wululamo, se a to vayilelisa votala ka wubihi.

⁷Nguko txisofu txa mphaxeli txi na xayisa wuzivi, se va na mana mlayo ka txisofu txakwe, nguko ene i Ngelozi ya MKOMA wa Mabutho a Tiyimbi.

⁸Kambe anu mi lekile nzila, mi mahile ti to vavangi ve leka mlayo, mi onhile txitumelelano txa Levhi, kuwomba MKOMA wa Mabutho a Tiyimbi.

⁹Ngu toneto, nani ni mi mahile vo eyiseka, ni kutxhipa masoni ka votshe vathu, ti ti wombako ku kha ma xayisa tinzila tangu, aniko mi sawute tikhohe kutxhamuselani ka mlayo.

¹⁰Ina kha hi nga ni tate mmweyo athu hotshethu kani? Kha ha vangwa ngu Txizimu tximwetxo kani? Ngu kutxani hi kanganyisana, hi onha ni txitumelelano txa vatate vathu kani?

¹¹Judha a lekile mlayo, se a mahile manyala ka Israyeli ni Jerusalema; nguko Judha a nyenyezisile wukhalo wo sawuleka wa MKOMA, awule ene a wu dhundako, se e teka mwanana wa dihorana da txizimu txa walo.

¹²MKOMA a na tutumisa m'thu wu a mahako eto matendani ka Jakobe, wule a wonelelako ni wule a xamulako, ni wule a ningelako siningo ka MKOMA wa Mabutho a Tiyimbi.

¹³Timwani ti mi mahako ngu tiya: Mi tata txiluvelo txa MKOMA ngu mirongo, ni kudila, ni kuketa; a ha ko ene asi ngadi kambe e wona mningelo, hambi kuamukela sa manzani kwanu, a di tsakile.

¹⁴Se mi txi khanu: Ngu txani kani? Nguko MKOMA i fakazi hagari kwako ni msikati wa wujaha wako, awule awe u nga mbi thembeka kwakwe, na kuve ngene mpangalati wako, i ku msikati wa txitumelelano txako.

¹⁵Ina kha mi maha mmweyo dwe, e mi ninga ni moya kani? Se ngu kutxani mi va mmweyo kani? Ene a ti ti lava mbewu ya vo lulama; ngu konaho, ti xayiseni mimoyani kwanu, kambe ni wammweyo a nga leke kuthembeka ka msikati wa wujaha wakwe.

¹⁶Nguko MKOMA, Txizimu txa ka Israyeli, a khene: Na vengela kulekana, ni wule a sisako kulwisana ngu syambalo sakwe, kuwomba MKOMA wa Mabutho a Tiyimbi; ngu toneto, ti xayiseni mimoyani kwanu, kambe mi nga lekeni mlayo.

¹⁷Mi rerile MKOMA ngu mawombawombelo anu; kambe mi ngadi mi txi khanu: Hi rerile ngu txani kani? Ka ti mi wombako mi txi khanu: Ni wuhi a mahako to biha, a lulamile masoni ka MKOMA, se evo nguvo ene a tsakako ngu vona; Mwendo txi hayi Txizimu txa wululamo kani?