Read chopi Malakiya 3 Bible Online

Malakiya 3 - chopi bible

Malakiya 3

¹ Wonani taku, ni mi rumela ngelozi yangu, ayi yi no ni lulamisela nzila, se msana keto, MKOMA wule anu mi mlavako, a nata ngu kukuluveta dithepeleni kwakwe, Ngelozi ya txitumelelano, ayile anu mi yi verelako; wonani taku yata, kuwomba MKOMA wa Mabutho a Tiyimbi.

² Kambe i mani a no tsanisela ka ditshiku da kuta kwakwe kani? Ni ku i mani a no simama a diho, ngako ene a txi ta kani? Nguko ene a na nga mndilo wa mnyivilikisi, ni ku nga sephu ya vakuwuli.

³Se a na khalahatshi e nyivilikisa ni kubasisa silivhela, kambe a na basisa vanana va ka Levhi, ni ku va nyivilikisa va txi nga nzalama, ni silivhela; sekoko, va na tisa miningelo ka MKOMA ngu kululama.

⁴Se miningelo ya ka Judha ni ya Jerusalema, yi na tsakisa MKOMA, kufana ni masiku a kale ni malembe o khata.

⁵Se ni nata hafuhi kwanu, ku ta mi lamula, kambe ni na va fakazi ya livilo yo lwa ni valoyi, ni kuwukela vale va mahako wugango, ni vale va xambanyako ta makuhu, ni vale va kanganyisako mthumi, ve honyola madingano a tinoni, ni vo felwa ngu vaveleki, ni vawuyi, kambe kha va ni thavi, kuwomba MKOMA wa Mabutho a Tiyimbi.

⁶Nguko ani MKOMA, kha ni txitxi; ngu mhaka yeto, anu vanana va ka Jakobe, kha mi loviswi.

⁷Kukhukhela ka masiku a vatate vanu, mi lekile sileleto sangu, kambe kha ma si xayisa; tshumelelani kwangu, se na ni ni na tshumelela kwanu, kuwomba MKOMA wa Mabutho a Tiyimbi; kambe anu mi khanu: Hi na tshumelela txani kani?

⁸Ina m'thu a nga pela Txizimu kani? Hambi keto anu ma ni pela, mi khanu: Hi kupela ngu txani kani? Ka sa wugumi ni miningelo.

⁹I di kuruketelwa mi ruketetwe, nguko ma ni pela, anu motshenu va ditiko diya.

¹⁰Tisani sotshe sa wugumi ka nyumba ya wuxayiselo, ti to ku nava ni sakudya nyumbani kwangu, se ngu kumaha keto ni duketeni, kuwomba MKOMA wa Mabutho a Tiyimbi, ku mwendo na mbi mi tulela mafasitela a nzumani, ni mi tshakunutela makatekwa o tala, aya mi no pwata ni ko thela kona.

¹¹Se ngu mhaka yanu, ni na tsivela mkhadamuli, ti to asi mi dyeli mihando ya mafu, ni mivhinya ya thembweni yi si mahi sifule, kuwomba MKOMA wa Mabutho a Tiyimbi.

¹²Se otshe matiko ma na womba ku mi katekile, nguko anu mi na va ditiko do tsakisa, kuwomba MKOMA wa Mabutho a Tiyimbi.

¹³Mapswi anu ma ve o lwisa ngutu kwangu, kuwomba MKOMA; aniko anu mi khanu: Intxani hi nga womba-womba txona ngu ngawe kani?

¹⁴Anu mi khanu: Kha ti vhuni txilo kuthumela Txizimu; ti hi vhunile txani kuxayisa sileleto sa txona, ni kutsimbila hi di ambate mizila ya txidilo masoni ka MKOMA wa Mabutho a Tiyimbi kani?

¹⁵Sekoko athu hi wona kukateka ka va vo tikulisa; ni vale va mahako to biha va humelela, ina, vona va duka MKOMA, kambe va huluka.

¹⁶Sekoko avale va thavako MKOMA, mmwani ni mmwani wa womba-womba ni mkwawe; se MKOMA wa riya nzeve a txi engisela; mwendo kubhatwe dibhuku da syalakanyiso masoni kwakwe, di lumbako vale va thavako MKOMA, ni vale va alakanyako ditina dakwe.

¹⁷Se vona va na va vangu, kuwomba MKOMA wa Mabutho a Tiyimbi, ka dona ditshiku dile ni no maha mthumo wangu, va na va thomba yangu; ni na va divalela, ku nga m'veleki wu a divalelako mwanana wakwe, wu a thumelako.

¹⁸Sekoko mi na wona kambe kuhambana ka wo lulama ni wo biha, hagari ka wule a thumelako Txizimu, ni wule asi txi thumeliko.