Read chopi Matewu 10 Bible Online

Matewu 10 - chopi bible

Matewu 10

¹Ngako a di dhani vagondiswa va digumi ni vambidi, Jesu a to va ninga mtamo wa kutovela mimoya ya nzambwa ni kuhanyisa vathu ka yotshe mitungu ni otshe malwati.

²Matina a Vapostoli va digumi ni vambidi ngu awa: Wo khata i Simoni, a dhanwako ku i Pedro, ni Andreya, mwanawe; Jakobe, mwanana wa Zebhedhewu, ni Johani, mwanawe;

³Filipi ni Bhartolomewu; Tomasi ni Matewu, i nga ti mkhupisi; Jakobe, mwanana wa Alfewu, ni Tadhewu;

⁴Simoni wa Mukanana ni Judha Iskariyoti, awu a nga ningela Jesu.

⁵Se Jesu a to va ruma vona va digumi ni vambidi, msana ka kuva a di va layile a txi khene: “Mi nga tsimbileni ngu tinzila ta vamatiko, hambi kuwulela madhoropani ka Vasamariya.

⁶Kukhata tsulani ka tinvuta ti ti nga hangalaka ta Nyumba ya ka Israyeli.

⁷ Mi txi tsimbila, nuwelani mi txi khanu: ‘Mfumo wa nzumani wu hafuhi.’

⁸Hanyisani valwali, wusani vakufa, basisani vatshekela, tovelani mimoya yo biha. Mi to ningwa mahala, na nanu va ningeni mahala.

⁹Mi nga kungeleni male ya nzalama ni silivela ni koporo amu ka tibhande tanu,

¹⁰hambi kuva ni mkwama wa nzila, hambi mabhaji mambidi, hambi masandazi, hambi ndonga; nguko txithumi txi fanetwe ngu muholo wa txona.”

¹¹“Ni ka dihi didhoropa mwendo txidhoropana mi na kuwulela kona, lavani kuziva awu a fanelako ku mi amukela, mi na zumba koneho kala mi txi khukha.

¹²Ngako mi txi wulela nyumbani, yi loseni.

¹³Ngako nyumba yi di ni fanelo, kudikha kwanu ku na zumba ka yona, aniko ngako yi si nga ni fanelo, kudikha kwanu ku na tshumelele kwanu.

¹⁴Sekoko, ngako va si mi amukeli mwendo ngako va si engisi mapswi anu, humani ka nyumbeyo mwendo ka didhoropedo, mi txi huphuta lithulu mikondoni kwanu.

¹⁵Kha ditshuri ni khani kwanu: Ngu ditshiku da kulamulwa ditiko da Sodhoma ni da Gomora di nata hehukiselwa kupinda didhoropa donedo.”

¹⁶ “Wonani, ni mi ruma nga tinvuta hagari ka maxolwa; ngu toneto, txharihani nga minyoka, mi txi va vo mbi na wukhuxu kufana ni situvane.

¹⁷Ti woneleni ka vathu, nguko va na mi mangalela ha banza, va na mi kwapa masinagogani kwawe,

¹⁸se va na mi yisa masoni ka tinduna ni ka vakoma ngu mhaka yangu, kasi mi va tifakazi masoni kwawe ni ka vamatiko.

¹⁹Aniko ditshiku di va mi ningelako kwawe, mi nga karatekeni ngu kulava kuziva ati mi no womba tona ni mawombawombelo a kona.

²⁰Nguko hi nga anu mi no womba-womba, aniko i Moya wa Tate wanu wu no womba-womba ngu nganu.”

²¹“Mwanawe a na ningela mmwani mwanawe kudawani; ni tate a na ningela mwanana wakwe; vanana va na wukela vaveleki vawe, va txi va daya.

²²Nananu mi na vengelwa ngu votshelele ngu mhaka ya ditina dangu. Aniko awu a no timisela kala magwito, ngene a no hanyiswa.

²³Ngako va txi mi xanisa ka didhoropa dokari, thavelani ka dimwanyane. Nguko kha ditshuri ni khani kwanu: Mi sinzi kuheta kutsimbilatsimbila ka otshe madhoropa a ka Israyeli, Mwanana wa M'thu a na va a di bwakile.”

²⁴“Mgondiswa hi nga wa hombe kupinda m'gondisi wakwe, hambi txithumi hi nga txa hombe kupinda nyamne wa txona.

²⁵Ta enela ka mgondiswa ku a txi dingana ni m'gondisi wakwe, ni ka txithumi ku txi txi dingana ni nyamne wa txona. Ngako va di dhani nyamne wa nyumba va txi i Bhelzebhule va ha mwayani kwakwe va na dhanwa ngu kupindisa.”

²⁶ “Ngu toneto, mi nga va thaveni, nguko kha txi nga ho txo sisala, txi no mbi nga va ni kutumbulwa; kambe kha txi ngaho txo siswa, txi no mbi nga va ni kuziwa.

²⁷Ati ni mi gelako txidemani, ti wombeni kuwonekelani ka mitshikari; ani ti mi lengelwako tinzeveni kwanu, ti nuweleni txitimwi ka siroro sa tinyumba.”

²⁸“Mi nga thaveni ava va dayako mmidi, va si sikotiko kudaya moya. Aniko thavani Txizimu txi ku ni mtamo wa kulovisa mmidi ni moya Gehena.

²⁹Sindili simbidi ina kha si xaviswi ngu male ya peni yimweyo kani? Ni txa tximwetxo ka sona kha txi sikoti kuwa hahatshi, i si nga ngu kuranda ka Tate wanu.

³⁰Kasi anu, hambi ni misisi ya ha msungo kwanu yi batwe yotshe.

³¹Ngu toneto, mi nga thaveni txilo, nguko anu ma si pinda sindili.”

³²“M'thu ni m'thu a no ni tumela masoni ka vathu nanani ni na mtumela masoni ka Tate wangu a ku nzumani.

³³Aniko awule a no ni lamba masoni ka vathu, nanani ni na mlamba masoni ka Tate wangu a ku nzumani.

³⁴Mi nga alakanyeni ti to ni tete kuneha kudikha ha mafuni; kha na tela kuneha kudikha, aniko ditxhari.

³⁵Nguko ni tete ku ta hambanisa m'thu ni tate wakwe, ni mwanana wa dihorana e wukela mame wakwe, ni mamanyani e wukela masale wakwe.

³⁶Sekoko, valala va m'thu va na va i di va nyumbani kwakwe.”

³⁷“Awule a randako ngutu tate mwendo mame wakwe kupinda ani, kha ni faneli. Awule a dhundako ngutu mwanana wakwe wa mfana mwendo wa dihorana kupinda ani, kha ni faneli.

³⁸ Awule asi rwaliko txihambano txakwe, a txi ni londeta, kha ni faneli.

³⁹Awule a zamako kuxayisa wutomi wakwe a na luzekelwa ngu wona, ani wule a luzekelwako ngu wutomi wakwe ngu mhaka ya lirando ni nani, a na tshumela e wu mana.”

⁴⁰“Awule a mi amukelako, a amukela ani, se awule a ni amukelako, a amukela awule a nga ni ruma.

⁴¹Awule a amukelako mprofeti, ngu kuva ene i di mprofeti, a na ningwa hakhelo ya mprofeti; se awule a amukelako m'thu wo lulama, ngu kuva ene i di m'thu wo lulama, a na amukela hakhelo ya mlulami.

⁴²Ani wule a ningako ka mmweyo wa vale vavadotho, hambi i di muhindo wumwewo wa mati o titila, ngu mhaka ya kuva i di mgondiswa wangu, kha ditshuri na mi gela ti to kha na mbi luzekelwa ngu ditshungulo dakwe.”