Read chopi Matewu 12 Bible Online

Matewu 12 - chopi bible

Matewu 12

¹Ngu yoneyo mbimo, Jesu a to tshawunyeta ngu hagari ka tithembwe ta fulaho, ngu ditshiku da Sabbata; se vagondiswa vakwe va ti ni nzala, veza ve khata kufunya maphumbu ve dya.

²Aniko mbimo yi Vafarisi va nga ti wona, va to mu gela va txi kha vona: “Hinga wona, vagondiswa vako va maha ti ti si dinganiko kumahwa ngu Sabbata.”

³Ene a to khene kwawe: “Kasi kha ma gonda ati ti nga mahwa ngu Dhavhidha ditshiku di a nga pfa nzala, ene ni va a nga ti navo kani?

⁴Ti to ene a wulelisite kutxani nyumbani ka Txizimu, e dya mapawu a mphaxo, aawa ma nga ti si faneli kudyiwa ngu ngene ni va a nga ti navo, kambe ma ti fanela kudyiwa ngu vaphaxeli vokha, kani?

⁵Mwendo kha ma gonda mu ka Mlayo ti to ngu ditshiku da Sabbata vaphaxeli va ndaka Mlayo wa Sabbata amu Dithepeleni, va si mani mnandu kani?

⁶Sekoko, ni khani kwanu: Wa ho kona hawa awu i ku wa hombe kupinda Dithepele.

⁷ Idiku anu mo di ziva dipswi di di wombako tito: Ni dhunda wumbilu, i si nga mphaxo, nga mi sa ninga mnandu ava va nga mbi onha.

⁸Nguko Mwanana wa M'thu i Mkoma kambe wa yona Sabbata.”

⁹Se ngako a di khukhile nguho, a to ya wulela disinagogani kwawe.

¹⁰Konemo ku ti ni m'thu wo khwanyela dianza. Va to wotisa Jesu, ngu ku mu duka va txi kha vona: “Ina ta tumetiswa kuhanyisa ngu ditshiku da Sabbata kani?”

¹¹Ene a ti khene kwawe: “I mani hagari kwanu, awu a ku a di ni nvuta, yi txi wela diphalani ngu ditshiku da Sabbata, asi yi ñoliko a txi yi humisa kani?

¹²Lisima muni li ku ni nvuta kupinda m'thu kani? Ngu toneto, ta tumetiswa kumaha ta tinene ngu ditshiku da Sabbata.”

¹³Se a to gela m'thu wule a txi khene: “Nawuluta dianza.” Ene a to di nawuluta, di so hanya kufana ni dimwani.

¹⁴Aniko Vafarisi va to huma veya txikungoni kasi kuya langana ti to va na m'dayisa kutxani.

¹⁵Jesu a di ti zivile, a to khukha ka wukhalo wule. Vavangi va to mu londetela, se ene e va hanyisa votshe,

¹⁶na a txi va laya ti to va si mu nuweli.

¹⁷Kasi kutatiseka ati Txizimu txi nga womba ngu mprofeti Isaya, txi txi kha txona:

¹⁸“Atxiya ngu txona Txithumi txangu, ni nga txi sawula, i ku txo randeka kwangu, atxiya mbilu yangu yi txi tsakelako. Ni na veka Moya wangu txitimwi kwakwe, a na txhumayela kulamula kwangu ko lulama ka otshe matiko.

¹⁹Kha na mbi henya ni kukwangula. Dipswi dakwe kha di na mbi pfiwa mu mitendelani.

²⁰Litshava li li nga thidyaka, kha na mbi li funya. Kha na mbi tima ngoti ya dilambu, ayi yi tuvikako, kala e ninga mtamo wa kuxula ka wululami.

²¹Matiko ma na themba ditina dakwe.”

²²“Sekoko, va to neha kwakwe m'thu wa madhimoni, i nga ti dibhofu ni txiduma. Ene a to mu hanyisa, se awu wa txiduma e khata kuwombawomba ni kuwona.”

²³Dibutho dotshe di to xamala di txi kha dona: “Ina awu hi nga ene Mwanana wa Dhavhidha kani?”

²⁴Aniko Vafarisi, ngako va txi pfa eto, va to kha vona: “Awuwa kha toveli madhimoni i si nga ngu mtamo wa Bhelzebhule, i ku mkoma wa mimoya yo biha.”

²⁵Kambe Jesu, ngu kuziva mialakanyo yawe, a to khene kwawe: “Mfumo wuhi ni wuhi wu ti bhandako ngu hagari wu txi ti lwisa wu na hasuka; ni didhoropa dihi ni dihi di ti bhandako ngu hagari di ti lwisa, mwendo mwaya wuhi ni wuhi wu ti bhandako ngu hagari wu ti lwisa kha wu na kutsana.

²⁶Ngu toneto, ngako Sathani a txi tovela Sathani, a ti bhandile ngu hagari, se mfumo wakwe wu na tsanisa kutxani, kani?

²⁷Sekoko, ngako ni txi tovela madhimoni ngu mtamo wa Bhelzebhule, valondeteli vanu va ma tovela ngu mtamo wa mani kani? Ngu toneto, vona va na va i di valamuli vanu.

²⁸Aniko ngako ni txi tovela madhimoni ngu Moya wa Txizimu, kha ditshuri Mfumo wa Txizimu wu hokile kwanu.

²⁹M'thu a nga wulelisa kutxani nyumbani ka ndena, e tekela simaha sa yona, a sa thanga ngu ku yi sunga kani? Ngu kona a no sikota kuhanda sotshe nyumbani.

³⁰Awu asi emiko ni nani, walwa ni nani; ani wu asi sengeletiko ni nani, wa hangalasa.”

³¹“Ngu konaho ni khani kwanu: Vathu va na divalelwa sotshe sionho ni sotshe siruko, kambe kuruka Moya wo Sawuleka kha ku na mbi divalelwa.

³² Wuhi ni wuhi a wombawombako kubiha ngu Mwanana wa M'thu, a na divalelwa; aniko wuhi ni wuhi a wukelako Moya wo Sawuleka, kha na mbi divalelwa, hambi ka yiya mbimo, hambi ka mbimo yi yi tako.”

³³“Mi txi womba ti to mndonga wuwa mbunene, mihando ya wona ni yona njinene, mwendo kambe mi txi womba ti to mndonga wuwa wu bihile, mihando ya wona ni yona yi bihile; nguko mndonga wu ziwa ngu mihando ya wona.

³⁴ Lixaka la timamba,[6] mi nga sikotisa kutxani kuwomba ditshuri, na mi di vabihi kani? Nguko txisofu txi womba-womba ti ti nga tala mbiluni.

³⁵M'thu wamnene a humisa sa sinene ngu ka thomba yakwe ya yinene; kasi m'thu wa tshofu, a humisa sobiha ngu ka thomba yakwe yo biha.

³⁶Ngu toneto, na mi gela ku khani: Totshe timhaka ta walo, ati va wombawombako vathu, va na ya ti xamulela ngu tona ka ditshiku da kuthethisa.

³⁷Nguko ngu ditshiku da kuthethiswa, Txizimu txi na lamula ti to u wamnene mwendo u wo biha madingano ni mapswi ako.”

³⁸Sekoko konaho vabhali vokari ni Vafarisi va to kha vona kwakwe: “M'gondisi, hi lava kuwona txikombiso txo mahwa ngu ngawe.”

³⁹Se ene a to va xamula a txi khene: “Liveleko la tshofu ni la wugango li lava txikombiso, aniko kha li na mbi ningwa tximwani txikombiso, hahanze ka txikombiso txa mprofeti Jona.

⁴⁰Kufana ni Jona a nga zumba mndani ka txihaka masiku mararu ni wusiku wa kona, nene Mwanana wa M'thu a na zumba mndani ka mafu masiku mararu ni wusiku wa kona.

⁴¹Vathu va liveleko liya, va nata abaniswa, ngu kuwuka ka vathu va Ninivha, ka ditshiku da kuthethiswa, nguko vona va hundulukile ngu kuengisa kutxhumayela ka Jona. Kasi aho kona hawa wa hombe kupinda Jona.

⁴²Mfumeli wa wamsikati wa kuta ngu wulambwe, a nata ngu distsiku da kuthethiswa kumweko ni liveleko liya, a txi li kambula, nguko ene a tile ngu magemeta-mitshi ka mafu ku ta pfa wuzivi wa Solomoni. Kasi waho kona hawa, wa hombe kupinda Solomoni.”

⁴³“Ngako moya wa nzambwa wu txi huma ngu ka m'thu, wu tutumela txiwulani kuya lava wukhalo wo humula, aniko kha wu wu mani.

⁴⁴Sekoko, wutxi kha wona: ‘Ni na tshumela ni txi ya nyumbani kwangu, amu ni nga huma ngu kona.’ Mbimo yi wu nga bwaka, wu to yi mana yi di diphanga, yi di hiyetwe yi tshuriselwa.

⁴⁵Sekoko moya wule wu to ya dhana yimwani mimoya ya mtxhanu ni yimbidi, ya nzambwa ngutu kupinda wona, se yi wulela yi zumba konemo. Se mazumbelo o gwitisa a m'thu wule ma na pinda o khata ngu kubiha. Ku na mahisa toneto ka lona liveleko liya la tshofu.”

⁴⁶Mbimo yi ene a nga ti womba-womba ka dibutho, mame wakwe Jesu ni vanawe va to ema ngu hahanze, va txi lava kuwombawomba nayo.

⁴⁷Mmwani a to ya mu gela a txi khene: “Mame wako ni vananu va emile hahanze, va lava kuwombawomba ni nawe.” [7]

⁴⁸Jesu a to khene ka wu a nga m'zivisa: “I mani mame wangu ni vanathu kani?”

⁴⁹A to nawuluta diwoko e xungameta vagondiswa vakwe, a txi khene: “Mame wangu ni vanathu ngu vona vava.

⁵⁰Nguko wuhi ni wuhi a no maha kuranda ka Tate wangu a ku nzumani, ngene i ku mwanathu ni ndiyangu ni mame wangu.”