Read chopi Matewu 13 Bible Online

Matewu 13 - chopi bible

Matewu 13

¹Ka dile ditshiku, Jesu a to huma ngu nyumbani eya khalahatsha hafuhi ni linene.

² Se ku to tshangana masoni kwakwe dibutho da hombe ngutu da vathu, ahawa a nga za e wulela ngalavani eya khalahatsha ka yona, na dotshe dibutho di di emile mabambe.

³Se a to va gela timhaka ta tingi ngu sidinganiso, a txi khene: “Wonani mphayi a to huma a txi ya phaya.

⁴Mbimo yi a nga ti phaya, yimwani mbewu yi to wela ha nzila, se si ta sinyana si ta yi jokotela.

⁵Yimwani mbewu yi to wela ha wukhaloni ka marigwi, ahawa ku nga ti si nga ni mafu amangi; se yi mila ngu txikuluveta, nguko mafu ma ti sa tshima.

⁶Aniko mbimo yi ditambo di nga huma, mbewu yi to hya ngu lisani, yi oma, nguko yi si nga ni mikuluti.

⁷Yimwani mbewu yi to wela hagari ka mipa, se mipa yi txi kula kumweko nayo, yi so yi kura.

⁸Yimwani, ngu kugwitisa, yi to wela ka mafu amanene yi veleka mihando: Nyingi yimweyo yi veleka dizana, yimwani mtxhanu wa magumi ni dimwedo, yimwani makumararu.

⁹Awule a ku ni tinzeve to engisa, a na engise!”

¹⁰Vagondiswa va to mtshuketela hafuhi, va txi kha vona: “Njitxani u txi va wombawombela ngu sidinganiso kani?”

¹¹Se ene a to va xamula a txi khene. “Nguko anu mi ningilwe kuziva misisalo ya Mfumo wa nzumani, aniko vona kha va ningwa txilo.

¹²Nguko awule a ku naso, a na ningwa kasiku e tatiselwa; aniko awule a si nga naso, a na tekelwa hambi ni sile a ku naso.

¹³Ngu toneto, ni wombako navo ngu sidinganiso; nguko va wona, aniko kha va wonisisi; va engisa aniko kha va engisisi ni kupimisa.

¹⁴Ti na tatiseka atiya ti nga wombwa ngu mprofeti Isaya, a nga khene: ‘Mi na engisa walo ngu tinzeve, aniko kha mi na mbi ti mana; mi na wona ngu maso, aniko kha mi na mbi ti wonisisa.’

¹⁵Nguko timbilu ta vathu vava ti bangile, kambe tinzeve tawe ti tsivekile, maso awe ma vhalekile, kasiku va si woni ngu maso, va si engisi ngu tinzeve, va si pimisi ngu timbilu tawe, va nga thuka ve hunduluka ve mana kuhanyiswa.”

¹⁶ “Kambe ma katekile maso anu, nguko ma wona, ni tinzeve tanu nguko ta engisa.

¹⁷Nguko ngu ditshuri na mi gela ni khani: Vaprofeti vavangi ni valulami, va navete kuwona ati mi ti wonako, aniko kha va ti wona; va navete kuengisa ati mi ti engisako, aniko kha va engisa.”

¹⁸“Ngu konaho engisani kha kwati txidinganiso txa mphayi.

¹⁹Ngako m'thu a txi engisa dipswi da Mfumo, asi di engisisi, kuta m'bihi e ta fukula asile si nga ti phayilwe mbiluni kwakwe; awuwa njifananiso txa mbewu ya kuwela ha nzila.

²⁰Awule a nga amukela mbewu ha wukhaloni ka marigwi, ngu wule a engisako dipswi ngu txikuluveta ni kutsaka, aniko wo ziva ku di amukela ka txonetxo txikhati,

²¹kambe ene apune kha na mikoloti, kha tsana: Ngako ku txi ta kupandiseka mwendo kuxaniseka ngu mhaka ya dipswi, wa kuluveta e rereka.

²²Awule a nga amukela mbewu hagari ka mipa, ngu wule a engisako dipswi, aniko sithikamezo sa ditiko ni kuxengwa ngu tithomba, sa kama dipswi kasi di si veleki mihando.

²³Ani wule a nga amukela mbewu ka mafu amanene, ngu wule a engisako dipswi, e di veketa; eyo ngene a velekako mihando, ahawa a txi veleka dizana, ahawa mtxhanu wa magumi ni dimwedo, ahawa makumararu.”

²⁴Jesu a to va mahela tximwani txidinganiso, a txi khene: “Mfumo wa nzumani wu fana ni m'thu a nga phaya mbewu ya yinene thembweni kwakwe.

²⁵Aniko, hagari ka wusiku, vathu, va di otete, a tile mlala wakwe a ta phaya nyasavari hagari ka fulaho, se ngu msana e huma.

²⁶Mbimo yi fulaho yi nga mila yi txi veleka, ku to humelela nyasavari nene.

²⁷Se sithumi si to ya gela nyamne wa m'ti si txi kha sona: ‘Nyamne wathu, ina hi nga mbewu ya yinene u nga phaya thembweni kwako kani? Se a humela hani nyasavari, kani?’

²⁸Ene a to xamula a txi khene: ‘Mlala a nga maha eto.’ Se sithumi si nje kha sona kwakwe: ‘Wa ti lava kani hi tsula hi ya dulela nyasavari kani?’

²⁹Ene e va xamula a txi khene: ‘Ahim-him, nguko mi nga, ma thavisa nyasavari, mi thuka mi pata ni fulako mi dula.’

³⁰Si lekeni si txi kula ngu wumbidi wa sona kala kuelulani. Se ngu txikhati txa kuelula, nata gela vaeluli ni txi khani: ‘Dulelani nyasavari, kuthanga, mi msungelela ngu tinyanda, kasi e hiswa; aniko fulaho yi theleteleni txisangalani kwangu.’ ”

³¹Se a to va mahela kambe tximwani txidinganiso a txi khene: “Mfumo wa nzumani wu fana ni mbewu ya txinapi, ayi m'thu wokari a nga yi teka, e yi phaya thembweni kwakwe.

³²I mbewu ya yidotho ngutu ka totshe timbewu, aniko msana ka kuva yi di kute, yi maha tximilwa txa hombe kupinda sotshe similwa sa thembweni, yi txi kula yi maha mndonga, ahawa koza hambi sinyana sa nzuma si ta zumba madhavini ka wona.”

³³Se a to engeta e va gela tximwani txidinganiso a txi khene: “Mfumo wa nzumani wu fana ni mtshumbelo, awu wamsikati wokari a wu tekako e wu pata mu ka mipimo yiraru ya mpupu, kala kuza sotshe si vila.”

³⁴Totshe timhaka tiya Jesu a ti wombile ngu sifananiso ka dibutho; a ti si va geli txilo, na i si nga ngu sifananiso;

³⁵ kasi kutatiseka ati ti nga wombwa ngu mprofeti, a nga khene: “Ni na tula txisofu txangu ni womba-womba ngu sidinganiso; ni nuwela timhaka ti ti nga ti sisilwe kukhukhela kumahwani ka ditiko.”

³⁶Sekoko ngako a di lekile mabutho, Jesu a to wulela nyumbani. Se vagondiswa vakwe ve tshuketela hafuhi kwakwe, va txi kha vona. “Hi txhamusele txidinganiso txa nyasafari wa thembweni.”

³⁷Ene a to xamula a txi khene: “Awule a phayako mbewu ya yinene ngu Mwanana wa M'thu;

³⁸thembwe ngu ditiko; mbewu ya yinene ngu vanana va Mfumo; nyasavari ngu vanana va m'bihi.

³⁹Mlala wu a nga phaya nyasavari ngu Sathani; kuelula ngu kugumani ka ditiko; ani vaeluli ngu tingelozi.

⁴⁰Kufana ni kuleya nyasavari a wungeletelwako e hiswa ngu mndilo, ngu toneto ti no mahwa kugumani ka ditiko.

⁴¹Mwanana wa M'thu a na rumela tingelozi takwe, ati ti no thavisa ka Mfumo wakwe votshe va i ku vakhuvekisi ni votshe va va mahako to biha,

⁴²ti na va tshotsha mu mdhikilani ka mndilo, ahawa ku no va i di ka kudila ni kugegeresela ka makwasa.

⁴³Se valulami va na phatima nga ditambo Mfumoni ka Tate wawe. Awu a ku ni tinzeve a na engise!”

⁴⁴“Mfumo wa nzumani wu fana ni txuma txi txi nga siswa thembweni kokari, txuma txi m'thu a nga txi tumbula, se e engeta e txi sisa. Kambe kutsakani kwakwe, a to tsula eya xavisa sotshe si a ku naso e xava thembwe yile.

⁴⁵Mfumo wa nzumani kambe wu fana ni wule a thumelako dibhindu, awu a tsimbilako a txi hodha tidhayimana totshura.

⁴⁶Se a di mani dhayimana yimweyo ya dibhindu da hombe, a to tsula eya xavisa sotshe si a ku naso, kasi ku ta yi xava.”

⁴⁷“Mfumo wa nzumani kambe wu fana ni likoka, li nga nawulutwa lineneni, li sengeletako totshe tixaka ta sihaka.

⁴⁸Se ngako li di tate, vakoki va ndinda ve li yisa mabambe, ve khalahatsha ve sawulela sa sinene, ve si sengeleta amu siyani kwawe; se asi i ku so biha, ve si tshotsha kule.

⁴⁹Ngu toneto, ti no maheka kugumani ka ditiko: Tingelozi ti na huma ti tekela ava vo biha hagari ka va vo lulama.

⁵⁰Ti na va tshotsha mdhikilani ka hombe ka mndilo wo tura, koneyo ku nava i di ka kudila ni kugegeresela ka makwasa.”

⁵¹“Se Jesu a to khene ka vagondiswa vakwe: Mi ti mani totshe timhaka tiya kani?” Se va nje kha vona kwakwe: “Ina!”

⁵²Se a to va gela kambe a txi khene: “Ngu toneto, m'bhali wuhi ni wuhi a nga gondiswa timhaka ta Mfumo wa nzumani, a fana ni wu i ku nyamne wa m'ti, awuwa, ka txuma txakwe, a humisako sasiphya ni sa kale.”

⁵³Ngako Jesu a di gwitile kuwomba sidinganiso siya, a to khukha konaho.

⁵⁴Se a di hokile ditikoni kwawe, a ti gondisa masinagogani kwawe, ahawa koza ve xamala, va txi kha vona: “Ene a kumana hani kuziva kuwa ni sidiwukiso siya kani?

⁵⁵Kasi hi nga ene mwanana wa m'vati kani? Mame wakwe hi nga ene wu a dhanwako ku i Mariya kani? Ni vanawe hi nga vona va Jakobe, ni Josefa, ni Simoni, ni Judha, kani?

⁵⁶Ni tindiyakwe kha ti nga ho totshelele kona hawa kani? Se totshe tiya a ku nato ti ta ngu hani kani?”

⁵⁷Se vona ve khuveka ngu ngene. Aniko Jesu a to khene kwawe: “Mprofeti, ditikoni kwawe ni nyumbani kwawe, kha ningwi txithavo.”

⁵⁸Se kha maha sidiwukiso so tala aho, ngu mhaka ya ku ambi tumela kwawe.