Read chopi Matewu 14 Bible Online

Matewu 14 - chopi bible

Matewu 14

¹Ka yoneyo mbimo, mfumeli Herodha, a di engisile nduma ya Jesu,

²a to gela malanda akwe, a txi khene: “Awuwa i Johani Mubhabhatisi a nga wuka ngu ka vafi; ngu konaho mtamo wu wa kumaha sidiwukiso wu thumako kwakwe.”

³ Nguko Herodha a ti ñote Johani a txi mu sunga e mu khotela mkorani, ngu mhaka ya Herodhiya, msikati wa Filipi, mnanda wakwe.

⁴ Nguko Johani a ti ti khene kwakwe: “Kha ti tumeleki ku mteka e maha msikati wako.”

⁵Se a ti lava nzila ya ku m'daya, aniko e thava vathu, nguko vona va ti ti kha vona i mprofeti.

⁶Ngu ditshiku da kutshanganisa malembe a kuvelekwa ka Herodha, mwanana wa muhorana wa Herodhiya a sinyile hagari ka vathu, e tsakisa Herodha.

⁷Ngu toneto, ene a to mu thembisa, ngu kuxambanya, ti to a na mninga ni txihi txi a no kombela.

⁸Se ene, ngu kukujetelwa ngu mame wakwe, a to khene: “Ni ninge kona hawa, amu ka mbiya, msungo wa Johani Mubhabhatisi.”

⁹Se mfumeli a to pandiseka, aniko ngu mhaka ya kuxambanya kwakwe, ni mhaka ya vale a nga ti navo ha mezani, a to ruma ti to ve mninga.

¹⁰Ngu toneto, a to ruma vathu veya wila msungo wa Johani, mkorani.

¹¹Vona va to neha msungo wakwe mu ka mbiya, ve wu ningela ka wule wa txihoranana, se ene e wu heleketa ka mame wakwe.

¹²Vagondiswa va Johani va tile va ta teka txirumbi txakwe va txi ya kelela, se ve tsula va txi ya zivisa Jesu.

¹³Ngako Jesu a di engisile tiya, a to khukha konaho ngu ngalava e tsula ka wukhalo wa txiwula ene ekhalela; aniko vathu, mbimo yi va nga tiengisa, va to khukha ve mu londeta ngu minenge, va txi khukhela mitini kwawe.

¹⁴Se a di humile ngu ngalavani, Jesu a to wona dibutho da hombe da vathu, se e va pfela wusiwana, a txi hanyisa valwali vawe.

¹⁵Se ni minova, vagondiswa va to tshuketa hafuhi kwakwe, va txi mu gela tiya: “Awuwa wukhalo njiwula, ditambo ni dona se di swite, tshumeta vathu vava, veya mitini va txi ya ti xavela sakudya.”

¹⁶Aniko Jesu a to va gela a txi khene: “Ahim-him, kha kulaveki va txi tsula; va ningeni anu sakudya.”

¹⁷Vona va to xamula va txi kha vona: “Ahawa kha hi nga ni txilo, hahanze ka mtxhanu wa mapawu ni sihaka simbidi.”

¹⁸Ene a to womba a txi khene: “Si wuyiseni kheno kwangu.”

¹⁹Ngu msana keto, a to gela vathu ti to ve khalahatshela ha mwasini. Se e teka mapawu ale a mtxhanu, ni sihaka simbidi, e guleta maso a txi wona nzumani, e si katekisa, a txi si bhandelela, ngu msana e si ningela ka vagondiswa, se vagondiswa ve si abanisela ka vathu.

²⁰Votshe va dyite ve khura; ngu sikhwemu si si nga sala va to tata digumi da sirundu ni simbidi!

²¹Kambe avava va nga dya i ti 5.000 wa vavamna, ku si balwi vavasikati ni vanana.

²²Se kunukunuko Jesu a to kurumeta vagondiswa ti to ve wulela ngalavani, ve thangela kuya mtxhatuko, na ene a di ngadi a txi salisana ni dibutho.

²³Ngako a di gwitile kusalisana ni vathu, a to kwela mmangoni Ene ekhalela, kasi kuya maha mkombelo. Se diswa ditambo, ene a di ekhalela konaho.

²⁴Se ngalava yi ti tsimbite mnava wa kuya kule ni mafu mametru amangi, yi txi pengapengiswa ngu mavimbi, nguko diphuho di ti va lambela.

²⁵Ngu txikhati txa wumune txa kupilela, Jesu a to va yela, na a txi tsimbila ngu txitimwi ka mati.

²⁶Mbimo yi va nga mu wona a txi tsimbila txitimwi ka mati, vagondiswa va to dhuka, va txi kha vona: “Txigono!” Va txi peka tihuwa ngu kuthava.

²⁷Ka txonetxo txikhati, Jesu a to va angula a txi khene: “Tsanani misana, ngani, mi nga thaveni txilo!”

²⁸Pedro a to xamula a txi khene: “I di awe, Mkoma ni dhane ni txi ta kwako ngu txitimwi ka mati.”

²⁹Jesu a nje khene: “Ngono!” Pedro a di txhikile ngu ngalavani, a to tsimbila txitimwi ka mati a txi ya ka Jesu.

³⁰Aniko txikhati txi a nga pfa diphuho kuvhukuka, a to telwa ngu dizowa, e khata kubhwabhwamela, e peka huwa, a txi khene: Mkoma ni hulukise!”

³¹Jesu kunukunuko a to nawuluta diwoko dakwe, e mñola, na a txi mu gela tiya: “M'thu wa kukholwa ka kudotho, nji txani u txi kana-kana?”

³²Se va di wulete ngalavani, diphuho di to renga.

³³Se ava va nga ti ngalavani, va to tshuketa ve mu khizamela, va txi kha vona: “Kha ditshuri u Mwanana wa Txizimu!”

³⁴Ngako va di txhatukile va to hoka ka ditiko da Genezareta.

³⁵Se ngako vathu va kona va di mu zivile ti to ngene, va to nuwela ka otshe maphambo a ditiko dile ti to ve neha kwakwe votshe va va nga ti ni malwati.

³⁶Se va txi mkombela ti to e va tumelela kugwesa hambi tshoka ya nguwo yakwe dwe; se votshe va va nga m'gwesa, va to hanyiswa.