Read chopi Matewu 15 Bible Online

Matewu 15 - chopi bible

Matewu 15

¹Sekoko, Vafarisi ni vabhali va Jerusalema va to tshuketela Jesu, va txi kha vona kwakwe:

²“Vagondiswa vako va ndakela txani sihena sa vakale, kani? Nguko kha va sambi manza mbimo yi va dyako sakudya.”

³Aniko ene a to va xamula, a txi khene: “Nananu mi ndakela txani Mlayo wa Txizimu ngu mhaka ya sihena sanu kani?

⁴Nguko Txizimu txi layile txi txi kha txona: ‘Thava tate wako ni mame wako’ ni tito: ‘Awu a ruketelako tate mwendo mame wakwe, a nafe ngu kudawa.’

⁵Aniko anu mi khanu: ‘Awu a gelako tate wakwe mwendo mame wakwe ti to asiya a nga ti fanete ku mu vhunetela ngu sona, si ningetwe ka Txizimu,

⁶khaswi a txi kurumetwa kuvhuna tate wakwe mwendo mame wakwe.’ Ngu toneto, mi onhile Mlayo wa Txizimu, ngu sihena sanu.

⁷Vaxengetelinu, Isaya a profetile kwati ngu nganu, a txi khene:

⁸‘Avava vathu va ni dhumisa ngu sisofu sawe; aniko mbilu yawe yi kule ni nani.

⁹Va ni khizamela walo, nguko tigondo ti va gondisako nzileleto sa vathu dwe.’ ”

¹⁰Sekoko, ene a to dhana dibutho, a txi khene kwawe: “Engisani, mi ti pima!

¹¹Hi nga sona si si wulelako mkanani si bihisako m'thu; aniko asiya si humako ngu mkanani ka m'thu ngu sona si mu bihisako.”

¹²Sekoko vagondiswa va to mtshuketela va txi kha vona kwakwe: “Ina wa tiziva ti to Vafarisi va khuvekile, ngako va di engisile dipswi diya dako kani?”

¹³Ene a to va xamula a txi khene: “Sotshe so phaywa, asiya si nga mbi phaywa ngu Tate wangu wa nzumani, si na dulwa.

¹⁴ Va lekeni! Mabhofu ma thangelelako mabhofu-kulowe; se ngako dibhofu di txi ñoleta lisole dimwani dibhofu, votshe va na wela diphalani ngu wumbidi wawe.”

¹⁵Se Pedro a to xamula a txi khene: “Hi txhamusele txidinganiso txiya.”

¹⁶Aniko Jesu a to khene: “Kasi na nanu mi ngadi mi pwata kupima kani?

¹⁷Kha mi tizivi ti taku sotshe si si wulelako mkanani sa pinda siya mndani, se si humiswa hahanze kani?

¹⁸ Aniko asi si humako ngu mkanani, si khukhela mbiluni, eso ngu sona si bihisako m'thu.

¹⁹Nguko mbiluni, ngu kona kuhumako mialakanyo yo biha, kudaya, wugelegele, wugango, wukhamba, kusingeta ni kuruketela.

²⁰Asiya ngu sona si bihisako m'thu; kasi kudya u sa samba manza kha ku bihisi m'thu.”

²¹Jesu a to khukha konaho e tsula madhawani ka Tiro ni Sidhoni.

²²Se mmweyo wamsikati, wa mu Kanana, a nga ti tile ngu Kanana, a to kwangula a txi khene: “Mkoma Mwana Dhavhidha, ni pfele wusiwana. Mwanana wangu wa txihoranana wa xupheka ngutu ngu madhimoni.”

²³Aniko ene kha mu angula txilo. Vagondiswa va to ta kwakwe ve ta mkombela, va txi kha vona: “Mtshumete, nguko wa hi londetela, na a txi hi kulumela.”

²⁴Jesu a to xamula a txi khene: “Ani kha na rumelwa vamwani hahanze ka tinvuta ti ti nga mwalala ta nyumba ya ka Israyeli.”

²⁵Sekoko awule wamsikati a to ta hafuhi kwakwe, e ta mu khizamela, a txi khene: “Mkoma ni vhune!”

²⁶Se ene a txi mu angula, a ti khene: “Hi nga ta tinene kuteka sakudya sa vanana si tshotshwa ka timbwa.”

²⁷Se nene a nje khene: “Ina, Mkoma nditshuri; aniko siwana ni sona sa dya maruru ale ma wako ngu ha mezani ka vanyamne va sona.”

²⁸Sekoko Jesu a to mxamula a txi khene: “Wamsikati, kukholwa kwako nga hombe! Ti na maheke nga ti u ti lavisako tona.” Se kukhukhela ka yona yile mbimo, mwanana wakwe wa muhorana a to kalamuka.

²⁹Jesu a di khukhile konaho, a to ya lineneni ka Galileya, se a di kwete mmango a to ya khalahatsha konaho.

³⁰Se dibutho da vathu votala, va to mtshuketela, va txi neha silima, mabhofu, sidiya, siduma ni vamwani vavangi, se veya va veka minengeni kwakwe. Ene a to va hanyisa.

³¹Ahawa ka kuva mabutho ma txi xamala ngu kuwona siduma si txi womba-womba, mabhofu ma txi wona. Se ve dhumisa Txizimu txa Israyeli.

³²Jesu, a di dhani vagondiswa vakwe, a to va gela a txi khene: “Na di pfela wusiwana dibutho diya, nguko va zumbile ni nani masiku mararu, na va si dyi txilo. Anani kha ni ti lavi ku va tshumeta ni nzala, nguko ni thava ti to va nga thuka ve jiyela ha nzila.”

³³Vagondiswa va to kha vona kwakwe: “Hi na ma mana hani mapawu txiwulani muwa o dingana kukhurisa vathu vo talisa tiya kani?”

³⁴Jesu a to khene kwawe: “Mapawu mangahi mi ku nawo kani?” Se vona va to kha vona: “Mtxhanu wa mapawu ni mambidi, ni sihakanyana sa sidotho.”

³⁵Sekoko a to gela vathu ti to ve khalahatshela hahatshi.

³⁶Ngako a di tekile mapawu yale ya mtxhanu ni mabidi ni sihaka sa kona, a to bonga a txi si bhandelela, a txi si ningela ka vagondiswa, se vona va to avela dibutho.

³⁷Votshelele va dyite ve khura, se ve tata mtxhanu wa sirundu ni simbidi ngu sile si nga sala.

³⁸Aniko ava va nga dya i ti mune wa magumi a mazana a vavamna, ku si balwi vavasikati ni vanana.

³⁹Se msana ka kuva a di tshumetile dibutho, a to wulela ngalavani eya ditikoni ka Magadhani.