Read chopi Matewu 16 Bible Online

Matewu 16 - chopi bible

Matewu 16

¹ Vafarisi ni vabhali va to ta kwakwe, va ta mu duka, va txi mkombela ti to e va kombisa txidiwukiso txa kuta ngu nzumani.

²Aniko ene a to va xamula, a txi khene kwawe: “Mbimo yi di swako, mi khanu: ‘Di na txa kwati, nguko nzuma yi bhilivite nga mndilo.’

³Ni mixo, mi khanu: ‘Nyamsi ku nava ni diphuho, nguko nzumani ku ni madhuvi.’ Ma tiziva ta tinene kutxhamusela khohe ya nzuma, se mi sindwa ngu txani kuziva sikombiso sa timbimo kani?[8]

⁴Lixaka la tshofu ni la ku ambi thembeka ka Txizimu li kombela sidiwukiso, aniko kha li na mbi ningwa tximwani txidiwukiso, hahanze ka txikombiso txa mprofeti Jona.” Se a to va leka e ti tsulela.

⁵Mbimo yi vagondiswa vakwe va nga txhatuka digova, va to wona ti to va divate mapawu.

⁶ Jesu a to va gela a txi khene: “Tulani maso, mi ti wonela ka mtshumbelo wa Vafarisi ni wa vasadhusi.”

⁷Se vona ve kombisana va txi kha vona: “Mwendo ngu kuwa hi nga mbi teka mapawu.”

⁸Kambe Jesu, ngukuva a di ti zivile totshe, a to khene kwawe: “Vathu va kukholwa ka kudotho! Nji txani mi wombawombisana mi txi khanu: Ngu kuwa mi nga mbi teka mapawu kani?

⁹Kasi kha mi nzi ku ti pfisisa, hambi kualakanya ta mtxhanu wa mapawu, awa ma nga khurisa mtxhanu wa magumi a mazana a vavamna, ni ti to nzirundu singani mi nga tata ngu si, si nga sala, kani?

¹⁰Ina kha mi alakanyi kambe mtxhanu wa mapawu ni mambidi, ma nga khurisa mune wa magumi a mazana a vavamna, ni ti to nzirundu singani mi nga tata ngu siya si nga sala kani?

¹¹Kha mi ti mani ngu txani ti to kha ni wombawombi ngu mapawu, aku ni nga khani: ‘Ti woneleni ka mtshumbelo wa Vafarisi ni wa Vasadhusi’ kani?”

¹²Ngu kona va nga ti mana ti to Jesu a sa womba ti to ve ti wonela ka mtshumbelo wa mapawu, aniko ka tigondo ta Vafarisi ni vasadhusi.

¹³Ngako Jesu a di hokile ditikoni ka Khezareya ka Filipi, a to wotisa vagondiswa vakwe a txi khene: “Kasi vathu va womba ku i mani Mwanana wa M'thu kani?”

¹⁴Se vona va to angula va txi kha vona: “Vamwani va kha vona i Johani Mubhabhatisi, vamwani va kha vona i Elija, vamwani va kha vona i Jeremiya, mwendo mmweyo wa vaprofeti.”

¹⁵Ene a to va wotisa a txi khene: “Se anu-ko, mi womba ku ngani mani kani?”

¹⁶ Simoni Pedro a to angula a txi khene: “Awe u Mesiya Mwanana wa Txizimu txi txi hanyako.”

¹⁷Jesu a to mu xamula a txi khene: “U katekile, Simoni, mwana Jona, nguko hi nga m'thu wa ha mafuni a nga kukombekisa eto, aniko i Tate wangu a ku nzumani.

¹⁸Ngu toneto, nani na kugela, ni khani: Awe u Pedro, se txitimwi ka dirigwi diya, ni na aka Dibanza dangu, ani mtamo wa lifo kha wu na mbi di xula.

¹⁹Ni na kuninga tikhiya ta Mfumo wa nzumani; txihi ni txihi u no txi sunga ha mafuni txi na sungwa ni nzumani, ani txihi ni txihi u no txi thukunyula ha mafuni txi na thukunyulwa ni nzumani.”

²⁰Ngu msana a to laya vagondiswa ti to va si geli m'thu ni wammweyo taku ene i Mesiya.

²¹Kukhukhela ka donedo ditshiku, Jesu a to khata kukomba vagondiswa vakwe ti to a fanete kutsula Jerusalema eya xaniswa ngutu ngu madhota ni vabhali, ni vaphaxeli va hombe, ni ti to a na dawa, se ngu msana a na tshumela e wuka ka vakufa ngu ditshiku da wuraru.

²²Pedro a to m'dhana ngu phuho e khata ku mu kawuka, a txi khene: “Txizimu txi na ku hulukise keto, Mkoma! Eto txima kha ti na mbi maheka kwako.”

²³Aniko ene a to tshembereka a txi khene ka Pedro: “Khukha hawa, Sathaniwe! Awe u txikhuvekiso kwangu, nguko khu pimisi ta Txizimu, kambe u pimisa ta vathu, dwe.”

²⁴Sekoko konaho, Jesu a to gela vagondiswa vakwe a txi khene: “Ngako m'thu a txi lava ku ni londisa, a na ti leke, e pakata txihambano txakwe, a txi ni londisa.

²⁵Awule a randako kuveketa wutomi wakwe a na wu mwalata, aniko awule a mwalatako wutomi wakwe ngu mhaka yangu, a na wu mana.

²⁶Kha ditshuri, ti siza txani m'thu kumana dotshe ditiko, na ngu msana a txi mwalalelwa ngu wutomi wakwe kani? Mwendo nji txani m'thu a no sikota kutekisa ngu txona wutomi wakwe?

²⁷Nguko Mwanana wa M'thu a nata ni wudhumo wa Tate wakwe, kumweko ni tingelozi takwe, se a nata hakela mmwani ni mmwani kota nga ti a nga hanyisa tona.

²⁸Kha ditshuri ni khani kwanu: Hagari ka va va kuho hawa, vaho vamwani va no mbi fa, va sa thanga ngu kuwona kuta ka Mwanana wa M'thu Mfumoni kwakwe.”