Read chopi Matewu 17 Bible Online

Matewu 17 - chopi bible

Matewu 17

¹Sekoko, ku di pindile mtxhanu wa masiku ni dimwedo, Jesu a to teka Pedro ni Jakobe ni Johani, mwanawe Jakobe, e tsula navo, vona vokha, ka mmango wo lapha.

²Se konaho a to phinduka masoni kwawe: Khohe yakwe yi phatima kufana ni ditambo, ni tinguwo takwe ti hinduka ti txi basa kufana ni liwoningo.

³Koneko va to woneka Mosi ni Elija, va nga ti bhula nayo.

⁴Se Pedro a to womba ka Jesu a txi khene: “Mkoma ndinene ku hi zumba konahawa. Ngako u txi ti lava, hi na aka kona hawa midhuti yiraru, wumwewo mbwako, wumwani mbwa Mosi ni wumwani mbwa Elija.”

⁵Ene a di ngadi a txi womba tiya, ku to humelela direfu do woninga, di nga va fenengeta, se direfuni mule ku to pfala dipswi, di di nga womba tiya: “Awuwa i Mwanana wangu wo randeka ngutu, awu ni tsakiswako ngutu ngu ngene. Mu engiseni!”

⁶Mbimo yi va nga engisa mapswi awa, vagondiswa va to wa hahatshi ngu timbanza, va txi telwa ngu dizowa da hombe ngutu.

⁷Sekoko, Jesu a to va tshuketela, e va wusa, a txi khene: “Khukhani mi txi ema, mi nga thaveni txilo!”

⁸Mbimo yi va nga gula maso, kha va wona mmwani, hahanze kwakwe ene Jesu.

⁹Se mbimo yi va nga ti relela ngu mmangoni niya, Jesu a va layile, a txi khene: “Mi nga wombeni ni ka wammweyo txidiwukiso txi mi nga txi wona, kala mbimo yi Mwanana wa M'thu a no wuka ngu ka vafi.”

¹⁰ Vagondiswa vakwe va mu wotisile va txi kha vona: “Ngu kutxani vabhali va wombako ti to Elija a fanela kuthanga ene a txi ta, kani?”

¹¹Se ene a txi angula, a to khene kwawe: “Kha ditshuri, Elija a fanela kuta, a ta longisela sotshe.

¹²Aniko ani na mi gela ku khani: Elija a tile, kambe kha va m'ziva; va mmahile totshe ti va nga ti lava. Ngu toneto, Mwanana wa M'thu nene a na xaniswa ngu vona.”

¹³Sekoko vagondiswa vakwe va ti mani tito, a womba-womba ngu Johani Mubhabhatisi.

¹⁴Ngako va di hokile ka dibutho, mmweyo wa mwamna a to mtshuketela hafuhi kwakwe, a txi mu khizamela, a txi khene kwakwe:

¹⁵“Mkoma pfela wuxinji mwanana wangu, a lwalako ngu txitshanuka; wa xaniseka ngutu. Sikhati so tala a wela ha mndiloni ni matini.

¹⁶Ni mu nehile ka vagondiswa vako, aniko va mu tandi ku mu hanyisa.”

¹⁷Jesu a to xamula a txi khene: “Liveleko la vathu va ku ambi kholwa ni vo soholoka, ni na va ni nanu kala txikhati muni kani? Ni na timisela ngu nganu kala ditshiku muni kani? Mu tiseni hawa kwangu.”

¹⁸Jesu a to dhusa didhimoni, se didhimoni di huma ngu ka mfana wule, se ene e hanyiswa ka yoneyo mbimo.

¹⁹Sekoko, vagondiswa va to tshuketela Jesu, va txi mu gela ngu phuho va txi kha vona: “Hi tandekisile kutxani athu kutovela didhimoni diya kani.”

²⁰Jesu a va xamute a txi khene: “Ngu mhaka ya kutumela kwanu ka kudotho, nguko kha ditshuri ni khani kwanu: Ngako mi di ni kukholwa ko fana ni mbewu ya txinapi, mi na womba ka mmango wuwa, mi txi khanu: ‘Khukha hawa u txi ya haleya’, wona wu na khukha. Txi walo ni tximwetxo mi no txi tanda.

²¹[Aniko lixaka liya la madhimoni kha li tovelwi, hahanze ka kukombela ni kutitona sakudya.”]

²²Ngako va di sengeletanile Galileya, Jesu a to va gela vagondiswa vakwe a txi khene: “Mwanana wa M'thu a na ningelwa manzani ka vathu;

²³vona va na m'daya, aniko ngu ditshiku da wuraru a na wuka.” Konako, vona va to telwa ngu dikhodho ngutu.

²⁴ Ngako va di hokile Kapernawume, vasengisi va mkhupo wa Dithepele va to ta ka Pedro, va txi ta kha vona: “M'gondisi wanu kha humisi mkhupo wa Dithepele kani?”

²⁵Ene a va xamute a txi khene: “Ina, wa humisa.” Mbimo yi a nga wulela nyumbani, Jesu a to thanga ene a txi khene ka Pedro: “U wona txani ngu mhaka yiya, awe Simoni, kani? Vafumeli va ha mafuni va sengisa ni kukhupisa vamani kani? Va khupisa vanana vawe, mwendo va khupisa vamatiko kani?”

²⁶Ene a xamute a txi khene: “Va khupisa vamatiko.” Jesu a nje khene kwakwe: “Ngu toneto, vanana vawe va va leka.

²⁷Aniko, kasiku hi si va khuvekisi, tsula lineneni u txi ya dota, teka txihaka txo khata txi no ñolwa ngu ndowo. Txi tule txisofu, u na mana male ya txitateri; yi teke u txi dihela ngu ngani ni nawe.”