Read chopi Matewu 18 Bible Online

Matewu 18 - chopi bible

Matewu 18

¹ Ka yoneyo mbimo, vagondiswa va tile ka Jesu va txi ta kha vona kwakwe: “I mani i ku wa hombe Mfumoni ka nzumani kani?”

²Jesu a to dhana mwanana wam'dotho e mu emisa hagari kwawe,

³ a txi khene: “Kha ditshuri ni khani kwanu: Ngako mi si tshumeli mi txi fanana ni vanana vavadotho, kha mi na mbi sikota kuwulela Mfumoni ka nzumani.

⁴Ngu konaho, awu a no ti veka hahatshi a txi fanana ni mwanana wuwa wam'dotho, ngene a no va i di wa hombe Mfumoni ka nzumani.

⁵Sekoko, awu a no amukela ngu ditina dangu, mwanana wammweyo wa ku nga wuwa, ngani a ni amukelako.”

⁶“Aniko awu a no khuvekisa mmweyo ka vava vavadotho va tumelako kwangu, ti nga va i di txhuko ti to txiwindi txa kukhurula txi sungelelwa thamoni kwakwe, a txi rinzwa txizivani ka linene.

⁷Di na ni dikhombo ditiko ngu mhaka ya sikhuvekiso! Kha ditshuri sikhuvekiso si fanete ku va ho, aniko ana ni dikhombo m'thu wuwa sikhuvekiso si tako ngu kwakwe.

⁸Ngu toneto, ngako diwoko mwendo mnenge wako si txi kukhuvekisa, si wile, u si tshotsha kule ni nawe! I txhuko kwako kuwulela kuhanyani u di txilima mwendo u txi khwita, kupinda kutshotshwa mndiloni ko mbi gwita, u di ni mawoko a mambidi ni minenge ya yimbidi.

⁹Se ngako diso dako di txi kukhuvekisa, diphokonyole u txi di tshotsha kule ni nawe; nguko i txhuko kwako kuwulela kuhanyani ni diso dimwedo, kupinda kutshotshwa Gehena ka mndilo u di ni maso a mambidi.”

¹⁰“Ti woneleni ti to mi si kanyisi ni wammweyo ka va vavadotho, nguko ni khani kwanu: Tingelozi tawe, ani nzumani, ti maneka yotshe mbimo masoni ka Tate wangu a ku nzumani.

¹¹[Nguko Mwanana wa M'thu a tete ku ta hanyisa asi si nga ti mwalate.][9]

¹²Se mi khanu txani kani? Ngako m'thu a di ni 100 da tinvuta, se yimweyo ya tona yi txi mwalala, ina kha siyi ti ta mtxhanu ni mune wa magumi, ni mtxhanu wa tinvuta ni mune, mimangoni, e tsimbila e lava yi yi nga mwalala kani?”

¹³“Kungako a txi yi mana, kha ditshuri ni khani kwanu, wa tsaka ngutu ngu yona, kupinda tile ta mtxhanu wa magumi ni mune, ni mtxhanu wa tinvuta ni mune, ti nga ti sa mwalala.

¹⁴Ngu toneto, Tate wanu[10] wa nzumani kha ti lavi ti to ni mmweyo wa va vavadotho e mwalala.”

¹⁵“Ngako mwananu a txi kuonhela, tsula u txi ya mu kawuka i di anu mokha, awe ni nene. Ngako a txi kuengisa, u na va u di hanyisile mwananu.

¹⁶Aniko ngako asi kuengisi, teka mmwani m'thu, mwendo vambidi u txi tsula navo, kasiku yotshe mhaka yi txi lamulwa ngu wufakazi wa vathu vambidi mwendo vararu.

¹⁷Se ngako a txi lamba kambe ku va engisa, tsula u txi ya bika mhaka banzani. Sekoko, ngako a txi lamba ku di engisa ni dona dibanza, kwako a nave i di wa matiko mwendo mkhupisi.”

¹⁸ “Kha ditshuri na mi gela: Txihi ni txihi mi no txi sunga ha mafuni, txi na sungwa ni kona nzumani; txihi ni txihi mi no txi thukunyula ha mafuni, txi na thukunyulwa ni kona nzumani.

¹⁹Na mi gela kambe tito, ngako vambidi kwanu va txi tumelelana ahawa mafuni, va txi kombela txo maha, va na ningwa ngu Tate wangu a ku nzumani.

²⁰Ina, nguko ahawa va nga tshangana vambidi mwendo vararu, ngu ditina dangu, ani ni ho hagari kwawe.”

²¹ Sekoko konako, Pedro a di tshuketile hafuhi, a to khene kwakwe: “Mkoma kumaha tiya mwanathu e ni onhela, nzi khati singahi ni fanelako ku mu divalela kani? Mwendo mtxhanu ni kumbidi, kani?”

²²Jesu a to mu angula a txi khene: “Kha ni wombi ti to mtxhanu wa sikhati ni simbidi, aniko ni khani mtxhanu wa magumi ni magumi mambidi, a sikhati so balwa mtxhanu ni kumbidi.”

²³“Ngu toneto, Mfumo wa nzumani wu fana ni mfumeli wu a nga lava kusetxha sithumi sakwe.

²⁴Ngako a di khatile ku va setxha, a to nehwa kwakwe mmweyo a nga ti ni mnandu nayo wa 10.000 wa titalenta.”

²⁵Se ngako a di pwati so dihela ngu sona, nyamne wakwe a to rumela ku e xaviswa ene ni msikati wakwe ni vanana vakwe ni sotshe si a nga ti naso, kufela ku na dihela mnandu wule.

²⁶Sekoko txithumi txiya txi to mkhizamela txi mkombela ngu mapswi awa: Nyamne wangu, timisela ngu ngani, ni na kudiha sotshelele.

²⁷Sekoko nyamne a to txi pfela wusiwana, e txi leka txi tsula, a di txi divalete mnandu.

²⁸Aniko txithumi txiya, ngako txi di mani wammweyo wa txithumi kulowe, awuwa a nga ti ni mnandu ka txona wa dizana da madhenari, txi to mkama makolo, txi txi kha txona: Ni dihe male yangu!

²⁹Sekoko wule wa txithumi kulowe a to mu khizamela minengeni kwakwe a txi mkombela a txi khene: Timisela ngu ngani, ni na kudihela sotshelele.

³⁰Aniko txona txi so lamba, kambe txi ti ya mu sekela mkorani, kala kuza e dihela mnandu.

³¹“Se sithumi kulowe, si di woni tiya, si to pandiseka ngutu mbiluni, se si tsula si ya womba ka nyamne wa sona totshe ti ti nga ti mahekile.

³²Sekoko, nyamne wa sona a to dhana txithumi txile a txi khene: ‘Txithumiwe txa walo, ani ni ku divalete mnandu wako wotshe, ngu kuwa u nga ni kombela.

³³Ina u si nga ni fanelo nawe yo telwa ngu wusiwana ni txithumi kulonu, nga ti ani ni nga ku divalelisa tona kani?’

³⁴Se nyamne a to txi henyela, e txi ningela ka vakhawutisi, kala kuza txi diha wotshe mnandu wa txona.

³⁵Tate wanu wa nzumani nene ngu tona tiya a no mi mahisa tona, ngako mi si divaleli ngu timbilu tanu m'thu ni m'thu ka muakelani wakwe, minandu yakwe.”