Read chopi Matewu 19 Bible Online

Matewu 19 - chopi bible

Matewu 19

¹Jesu, a di gwitile kutxhumayela timhaka tiya, a to khukha Galileya e tsula madhawani ka Judheya, mtxhatuko ka Jordhani.

²Se mabutho o tala ma to mlondisa, se ene a txi va hanyisa konaho.

³Sekoko Vafarisi, ngu kulava ku mu duka, va to ta kwakwe, va txi ta kha vona: “Ina ta tumeleka ka wamwamna kutovela msikati wakwe ngu mhaka yihi ni yihi kani?”

⁴Ene a to xamula, a txi khene: “Ina kha ma gonda tito: ‘Muvangi, kukhatani, a va mahile mwamna ni msikati.’

⁵Se, a txi khene: ‘Ngu konaho wamwamna a na siya tate wakwe, a txi namarela ka msikati wakwe, se vona ngu wumbidi wawe va na va nga m'thu mmweyo dwe.’

⁶Ngu toneto, se hi nga ngadi vambidi, yo va mmweyo dwe. Ngu konaho, asiya Txizimu txi nga si patanisa, m'thu a nga thuke a txi si abanisa.”

⁷Sekoko vona va to wotisa va txi kha vona: “Ngu kutxani Mosi a nga veka mlayo wa ku mninga dipapilo da kudaya wukati ni ku mu tovela kani?”

⁸Ene a xamute a txi khene: “Mosi, ngu mhaka ya kubanga ka timbilu tanu, a mi tumelete kutovela vasikati vanu, aniko kukhatani i ti si nga toneto.

⁹Sekoko, ani na mi gela ku khani: Awule a tovelako msikati wakwe, hahanze ka kuva a sa tekana nayo ngu mlayo, ngu msana a txi teka mmwani, a maha txionho txa wugango.”

¹⁰Vagondiswa va to kha vona kwakwe: “Ngako timhaka ta kutekana ka wamwamna ni wamsikati ti di zumbisile eto, kha ti tshuri kutekana.”

¹¹Ene a to khene kwawe: “Hi nga votshe va di manako dipswi diya, hahanze ka vale va nga ningwa.

¹²Nguko ya ho mithenwa yi nga velekiswa toneto ngu mndani ka vamame vawe; ya ho kambe mithenwa yi nga mahwa ngu vathu; se ya ho yimwani mithenwa kambe yi nga ti thena yipune ngu kufela Mfumo wa nzumani. Awu a sikotako ku ti pfisisa a na ti pfisise.”

¹³Sekoko, va to tiswa kwakwe vanana kasiku e va sanzeka manza ni ku va kombelela; se vagondiswa va txi va tsimbisela.

¹⁴Aniko Jesu a wombile kwawe, a txi khene: “Lekani sivananana, mi nga si tsimbiseleni kuta kwangu, nguko Mfumo wa nzumani wu lumba vo nga sona.”

¹⁵Ngako a di va sanzekile manza, a to khukha a txi tsula.

¹⁶Konaho, mmweyo a to mtshuketela, a txi khene kwakwe: “M'gondisi wamnene, nji txani txa txinene ni fanelako ku txi maha, kasiku ni mana wutomi wo mbi guma kani?”

¹⁷Jesu a to mu wotisa a txi khene: “U wotisela txani ngu mhaka ya tiya i ku ta tinene kani? Wamnene i mmweyo basi. Aniko, u txi lava kuwulela wutomini ko mbi guma, veketa milayo.”

¹⁸Ene a to wotisa, a txi khene: “Ngu yihi kani?” Jesu a mu xamute, a txi khene: “U nga daye, u nga mahe wugango, u nga pe, u nga ve fakazi ya makuhu,

¹⁹thava tate wako ni mame wako; randa muakelani wako nga ti nawe u ti randisako tona.”

²⁰Awule wa dijaha, a to angula, a txi khene: “Totsheleleto ni ti veketile kukhukhela ha wananani kwangu. Nji txani kambe txi nga sala kani?”

²¹Jesu a to xamula, a txi khene: “Ngako u txi lava kumaha m'thu wo hetiseka, tsula u txi ya xavisa sotshe si u ku naso, u txi ninga sisiwana, u na ya mana thomba nzumani; se ngono u txi ni londisa.”

²²Ngako a txi engisa tiya, awule wa dijaha a to tsukula e khukha, nguko a ti ni tithomba.

²³Se konaho, Jesu a to gela vagondiswa vakwe a txi khene: “Kha ditshuri na mi gela ku khani: Ta karata kuwulela Mfumoni ka nzumani awule a ku ni tithomba.

²⁴Na engeta ni txi mi gela ku khani: Ta hehuka ngutu kuwulela dikamelu ha ditshokoni ka txhingani, kupinda kuwulela nyatithombe Mfumoni ka Txizimu.”

²⁵Vagondiswa, ngako va txi engisa tiya, va to xamala ngutu, va txi kha vona: “Se i di to, ku na huluka mani?”

²⁶Jesu a to va wonisisa, a txi khene kwawe: “Ka vathu eto kha ti koteki, aniko ka Txizimu totshe ta koteka.”

²⁷Pedro a to womba kwakwe a txi khene: “Athu hi lekile sotshe, hi kulondisa, se hi na dihelwa ngu txani kani?”

²⁸ Jesu a to xamula a txi khene: “Kha ditshuri na mi gela ku khani: Ka mbimo ya kuwusetwa ka wuphya wa sotshe, ditshiku diya Mwanana wa M'thu a nota khalahatsha ha txikhaloni kwakwe ka wukoma wa kupfaliswa, na nanu, mi nga ni londisa, mi nata khalahatsha ka digumi da sikhalo sa wukoma ni simbidi, mi txi lamula tihunzu ta digumi ni timbidi ta ka Israyeli.

²⁹Se wuhi ni wuhi, a nga leka tinyumba, vanawe, tindiyakwe, tate, mame, msikati, vanana mwendo tithembwe ngu mhaka ya ditina dangu, a na amukela sa kupinda ngutu asile, se ngu msana a na mana thomba ya wutomi wo mbi guma.

³⁰ Vavangi vo thanga va na va i di vo gwitisa, ani vavangi vo gwitisa va na i di vo thanga.”