Read chopi Matewu 2 Bible Online

Matewu 2 - chopi bible

Matewu 2

¹Ngako Jesu a di velekilwe Bhetlehema ka Judheya, ka mbimo ya mfumeli Herodha, konaho titxhari ta wutxani ti to bwaka Jerusalema,

²ti txi kha tona: “Ahani mfumeli wa Vajudha awu a nga velekwa, kani? Nguko hi woni nyeleti yakwe wutxani, se hi tile ku ta mu khozela.”

³Se a txi engisa tiya Herodha, a to dhuka ngutu, ene ni dotshe didhoropa da Jerusalema.

⁴Se a to dhana vaphaxeli va hombe ni vabhali va ditiko, a txi va wotisa ahawa a nga ti fanela kuvelekelwa kona Mesiya.

⁵Se vona va mgete va txi kha vona: I Bhetlehema ka Judheya nguko ti bhatwe toneto ngu mprofeti a txi khene:

⁶“Awe Bhetlehema, ditiko da Judheya, khu nga m'dotho hagari ka madhoropa a hombe a ka Judha, nguko mthangeli wu a no xayisa ngamu yangu Israyeli a na velekelwa kwako.”

⁷Sekoko Herodha, a di dhani phuho titxhari tile, a to ti wotisisa kwati mbimo yi nyeleti yi nga va humela ngu yona.

⁸Se a txi va rumela Bhetlehema, a to va gela a txi khene: “Tsulani mi txi ya wotisela ta tinene mhaka ya mwananeyo; kambe ngako mi txi mu mana, ni ziviseni, kasiku nanani ni tsula ni ya mu khozela.”

⁹Se ngako vona va di engisile mapswi a mfumeli, va to tsula, se nyeleti yi va nga ti yi woni wutxani yi to thangela masoni kwawe, yi za yi txi ya ema txitimwi ka wukhalo wu mwanana a nga ti ka wona.

¹⁰Ngako va di yi woni kambe nyeleti yileya, va to tala ngu litsako la hombe.

¹¹Se va di wulete nyumbani, va mani mwanana ni mame wakwe Mariya, se va to khizama, ve mu khozela; va di tute mikwama yawe va to mluva ngu nzalama ni dibaselo ni mira.

¹²Ngako va di zivisilwe ngu mu ka miloro, ti to va si pindi ngu ka Herodha, va to tshumela ngu yimwani nzila ve tsula ditikoni kwawe.

¹³Msana ka kuva ti di khukhile titxhari, Ngelozi ya MKOMA yi to woneka ngu miloro ka Josefa, yi txi mu gela tiya: “Khukha, teka mwanana ni mame wakwe, thava u txi ya Egipta. Inda ya zumba konakheyo kala nita kuzivisa, nguko Herodha a na lava mwanana wu kasiku e m'daya.”

¹⁴Josefa a to khukha ni wusiku, e teka mwanana ni mame wakwe, ve tsula Egipta.

¹⁵A ti ya zumba koneyo kala efa Herodha, kasi kutatiseka ati Mkoma a nga womba ngu txisofu txa mprofeti, a nga khene: “Ni dhani Mwanana wangu e huma ngu Egipta.”

¹⁶Sekoko, ngako Herodha a di woni ti to a kanganyisilwe ngu titxhari, a to henya ngutu, se e rumela kuya dayela votshe vanana va sizambiana va Bhetlehema ni va dotshe ditiko da kona, va tanga ya malembe mambidi ni kuya hahatshi, madingano ni mbimo yi a nga wotisisa ngu yona ka titxhari.

¹⁷Konaho ku tatisekile ati ti nga wombwa ngu mprofeti Jeremiya, a nga khene:

¹⁸ “Huwa yi pfate Rama, kudila ni kupandiseka ka hombe: I Rakeli a dilako vanana vakwe asi tumeli ni kuthavelelwa, nguko vanana kha va nga ngadi ho.”

¹⁹Mbimo yi Herodha a nga fa, Ngelozi ya Mkoma yi to woneka ngu miloro ka Josefa, kona ditikoni ka Egipta, yi txi mu gela tiya:

²⁰“Khukha u teka mwanana ni mame wakwe, u txi tsula ditikoni ka Israyeli, nguko avale va nga ti bheja kudaya mwanana se va fite.”

²¹Sekoko Josefa a to khukha e teka mwanana ni mame wakwe, e wuya ditikoni ka Israyeli.

²²Aniko mbimo yi a nga engisa ti to Arkelawu ngene a fumako Judheya, kutsiveta tate wakwe Herodha, Josefa a to kana-kana kuwuya. Se a di zivisilwe ngu miloro, a to khukha a txi ya ditikoni ka Galileya;

²³ eya aka ka didhoropa di di dhanwako ku i Nazareta ahawa a nga ya zumba kona, kasi kutatiseka ati ti nga wombwa ngu vaprofeti va txi kha vona: “A na dhanwa ku i Munazareta.”