Read chopi Matewu 20 Bible Online

Matewu 20 - chopi bible

Matewu 20

¹“Ngu koneho, Mfumo wa nzumani wu fana ni nyamne wa m'ti, awu a nga huma i di ngadi mixo ngutu, kasi kuya thola sithumi sa kuya thuma thembweni kwakwe ka mivhinya.

²Se a di tumelelani ni sithumi ngu muholo wa didhenari dimwedo ngu ditshiku, a to va rumela thembweni kwakwe.

³Se e huma ngu txikhati txa wuraru, e wona vamwani va nga ti ha mtendelani ka m'ti, nava si thumi txilo.

⁴Se a to khene kwawe: ‘Tsulani na nanu thembweni kwangu ka mivhinya, ni na mi ninga muholo wu wu fanelako. Nivona va to tsula’

⁵Se a txi engeta e huma ngu txikhati txa wutxhanu ni tximwetxo, ni txikhati txa wutxhanu ni mune, e mahisa toneto.

⁶A di humile ngu txikhati txa wugumi ni tximwetxo, a to engeta e mana vamwanyani, va nga ti emile, a txi khene kwawe: ‘Njitxani mi txi zumba hawa, ditshiku dotshe, mi si thumi txilo kani?’

⁷Vona va to mu xamula va txi kha vona: ‘Nguko kha ha tholwa ngu m'thu.’ Se ene a nje khene: ‘Tsulani na nanu thembweni kwangu ka mivhinya.’

⁸Na ku txi khata kumaha minova, nyamne wa thembwe ya mivhinya, a to gela mxayisi wa tithomba takwe a txi khene: ‘Dhana sithumi u txi si holela nthumo wa sona, aniko u na khata ngu vale vo gwitisa, kala u txi ya gwitisa ngu vale vo khata.’

⁹Ngako va di bwakile va va nga tholwa ngu txikhati txa wugumi ni tximwetxo, va to amukela male ya didhenari, m'thu ni m'thu.

¹⁰Se va di bwakile avale vo khata, va ti ti alakanya ti to va na hola male ya kupindisa, aniko ni vona va to amukela didhenari dimwedo m'thu ni m'thu.

¹¹Mbimo yi va nga holelwa, va to khata kukalala ka nyamne wa m'ti, va txi kha vona:

¹²‘Ava vo gwitisa, va thumile txikhati tximwetxo dwe, aniko ni vona u va ningile hakhelo yimweyo ni nathu hi nga timisela mikaralo ya ditshiku dotshe, hi txihya ngu lisani.’

¹³Aniko ene a to xamula a txi khene ka mmweyo wawe: ‘Ani kha ni ku dyeleli, mngana wangu; kasi kha ha tumelelana male ya didhenari kani?

¹⁴Ngu toneto, teka si si kulumbako, u txi tsula. Ni maha ati ni ti lavako ka wu wo gwitisa kufana ni kwako.

¹⁵Ina kasi kha ni nga ni fanelo yo maha kuranda kwangu ngu si i ku sangu kani? Mwendo awe wo va u di ni diso do biha, ngu kuva ani ni di wamnene kani?’

¹⁶Se ngu toneto, ava i ku vo gwitisa va na va i di vo khata, ani va i ku vo khata va na va i di vo gwitisa.”

¹⁷Se ngako Jesu a txi kwela eya Jerusalema, a to teka vagondiswa vakwe va digumi ni vambidi, ngu phuho, a txi va gela ku khene:

¹⁸“Wonani, konkuwa ha kwela hi ya Jerusalema, se Mwanana wa M'thu a na ningelwa ka vaphaxeli va hombe ni ka vabhali. Vona va na lamula ti to e dawa,

¹⁹va na mningela ka vamatiko, kasiku ve mu ruketela ni ku mu kwapela ni ku mu bethela ha txihambanoni. Aniko ene ngu ditshiku da wuraru a na wuka.”

²⁰Sekoko, mame wa vanana wa Zebhedhewu, a to mtshuketela a di ni vanana vakwe, a txi mu khizamela, kasi kumaha txikombelo.

²¹Jesu a to mu wotisa a txi khene: “U lava txani kani?” Ene a to mu xamula a txi khene: “Maha ti to vanana va vangu vavambidi ve zumba Mfumoni kwako, mmweyo txineneni kwako, mmwani txibhabha kwako.”

²²Aniko Jesu a to mu xamula a txi khene: “Kha mi txi zivi txi mi kombelako. Ina mi nga sikota kusela digombe da wuvi di ni no sela, kani?” Vona va to xamula va txi kha vona kwakwe: “Hi nga sikota.”

²³Ene a to khene kwakwe: “Ina, mi na sela digombe dangu. Aniko kukhalahatsha txineneni kwangu mwendo txibhabha kwangu, kha ti nga mtamoni kwangu; aniko ti na mahelwa avale Tate wangu a nga va lulamisela.”

²⁴Ngako vale va digumi va di ti pfite, va to henyela avale va vambidi va mkoma ni mnanda.

²⁵ Jesu a to va dhana a txi khene kwawe: “Ma tiziva ti to vafumeli va matiko va fuma ngu mtamo, se vahombe va kona va zumba ngu kudyiseta vathu.

²⁶ Aniko ti nga maheke eto hagari kwanu, aniko awule a lavako kumaha wa hombe, hagari kwanu, a na ti mahe txithumi txhanu;

²⁷ani wu a lavako kumaha wo khata hagari kwanu, a na mahe khumbi yanu.

²⁸Nga toneto, Mwanana wa M'thu nene, kha tela ku ta thumelwa, aniko a tete ku ta thumela, ni kuningela wutomi wakwe, kasi kutirula vavangi.”

²⁹Mbimo yi va nga ti huma ngu Jeriko, dibutho da vathu vavangi di to mu londisela.

³⁰Konako mabhofu mambidi ma nga ti khalahatshile hafuhi ni nzila, mbimo yi ma nga engisa ti to Jesu wa pinda, ma to khata kukwangula ma txi kha ona: “Mkoma Mwana Dhavhidha, hi pfele wusiwana!”

³¹Se dibutho di ti ti va kawuka kasiku ve malala, aniko vona va to kwangula ngutu, va txi kha vona: “Mkoma Mwana Dhavhidha, hi pfele wusiwana!”

³²Se Jesu a to ema e va dhana, a txi khene kwawe: “Mi lava ti to ni maha txani kwanu kani?”

³³Vona va to angula va txi kha vona: “Mkoma maha ti to maso athu ma txi tuleka!”

³⁴Jesu ngu kutalelwa ngu wumbilu, a to va gwesa mu ka maso awe, kunukunuko vona va to tshumela ve wona, se ve mu londisa.