Read chopi Matewu 21 Bible Online

Matewu 21 - chopi bible

Matewu 21

¹Ngako va di hafuhi ni Jerusalema, na se va di hokile Bhetfage, mmangoni ka Miolivha, Jesu a to ruma vambidi ka vagondiswa vakwe.

²A txi va gela ku khene: “Tsulani ka m'ti wule wu ku masoni kwanu; konaho mi na ya mana mbongola ya makati, yi nga sungwa, na yi di ni tximbongolana. Yi thukunyuleni mi txi wuya nayo.

³Ngako m'thu a txi mi angula to kari, mi na khanu: ‘Mkoma wa ti lava’, kambe a na kuluveta ku ti wuyisa.”

⁴Totsheleleto ti mahekile kasi kutatiseka ati ti nga wombwa ngu mprofeti, a nga khene:

⁵“Gelani dihorana da Siyoni, mi txi khanu: Ndiyo wata Mkoma wako wa kuthutha, a di gadhile mbongola, yi ku ni tximbongolana, txi i ku mwanana wa yona.”

⁶Se vagondiswa va to tsula, veya mahisa tona ti Jesu a nga va gelisa tona.

⁷Va to wuyisa mbongola ni tximbongolana, ve kapeka tinguwo txitimwi ka tona, se ve mu gadhisa.

⁸Se vathu votala ngutu, va txi ateta tinguwo tawe ha nzila, vamwani va txi ganga matshanzu a mindonga, ve ma atetela ha nzila.

⁹ Dibutho dile da vathu va nga ti thangela masoni kwakwe, ni vale va nga ti londetela ngu msana, va ti ti embelela va txi kha vona: “Hozana ka Mwanana wa Dhavhidha! A na dhumiswe awu a tako ngu ditina da Mkoma! Hozana txitimwi nzumani!”

¹⁰Se mbimo yi Jesu a nga wulela Jerusalema, didhoropa dotshelele di to dhuka, vathu va txi kha vona: “I mani wuwa kani?”

¹¹Dibutho di txi angula, di txi kha dona: “Awuwa i Jesu, mprofeti wa Nazareta ka Galileya.”

¹²Se Jesu a to wulela Dithepeleni, e tovela votshe va va nga txi xavisa, ni votshe va va nga ti xava, e hangalasa timeza ta vatxitxi va timale, ni madhando a vale va nga ti xavisa situvane.

¹³A txi khene kwawe: “Ti bhatwe ku kha vona: ‘Nyumba yangu yi na dhanwa ku i nyumba ya kukhongelela ka yona.’ Kambe anu mi yi maha wubaramelo wa makhamba!”

¹⁴Va to tshuketela kwakwe, kona Dithepeleni mule, mabhofu ni silima sa minenge, se ene a txi va hanyisa.

¹⁵Ngu mhaka ya sixamaliso si a nga ti si maha, ni vanana va nga ti embelela Dithepeleni va txi kha vona: “Hozana ka Mwanana wa Dhavhidha,” vaphaxeli va hombe ni vabhali va to henya,

¹⁶ va txi mu gela ku kha vona: “Ina wa tipfa ti va wombako kani?” Jesu a to xamula a txi khene: “Ina! Kasi kha mi nzi kugonda ti taku: ‘Ka mapswi a txisofu txa vanana vavadotho ni txa tikekere u ti lulamisete wudhumo, kani?’ ”

¹⁷Msana keto, a to khukha a txi va siya, e huma didhoropani e tsula Bhetaniya, ahawa a nga ya otela kona.

¹⁸Mbimo yi Jesu a nga ti wuya didhoropani, ni mixo ngutu, a to pfa nzala.

¹⁹Se a to wona mkuwu hafuhi ni nzila, a txi wu tshuketela, aniko kha mana txilo ka wona, hahanze ka mazokoro. Konaho, a to womba, a txi khene: “Yi nge ngadi yi velekwa mihando kwako!” Se kunukunuko mkuwu wu so oma.

²⁰Vagondiswa, ngu kuwona tiya, va to diwuka va txi kha vona: “Ti mahisile kutxani mkuwu kukuluveta wu txi oma, kani?”

²¹Jesu a xamute a txi khene: “Kha ditshuri na mi gela ku khani: Ngako mi di ni likholo, mi si kanakani, kha mi na mbi maha dwe, ati ni nga maha ani ka mkuwu wuwa, hambi idiku mi khanu ka mmango wuwa: ‘Khunuka eho u txi ti tshotsha lineneni’, ti na maheka.

²²Se sotshe si mi no kombela ngu kukholwa, na mi txi khongela, mi na si amukela.”

²³Msana keto, a to wulela Dithepeleni. Mbimo yi ene a nga ti gondisa, vaphaxeli va hombe ni madhota a ditiko va to mu yela va txi ya kha vona kwakwe: “U wu mana hani mtamo wa kumaha tiya kani? I mani a nga kuninga mtamo wo ngeto kani?”

²⁴Jesu a va angute a txi khene: “Nanani ni lava ku mi mahela txiwotiso, se ngako mi txi ni xamula ka txona, anani ni na mi gela ti to ni maha tiya ngu mtamo muni.

²⁵Mtamo wa kubhabhatisa ka Johani wuta ngu hani kani? Wu ta ngu nzumani mwendo wuta ngu ka vathu kani?” Aniko vona va to khata kualakanya timbiluni kwawe va txi “Ngako hi txi angula tito: ‘Wu ta ngu nzumani’, a na hi wotisa tito: ‘Njani hi nga mbi kholwa kani?’

²⁶Se hi txi angula ti to khathu: ‘Wu ta ngu ka vathu’ hi thava kuwukelwa ngu dibutho, nguko votshe va kholwa ti to Johani i mprofeti.”

²⁷Se va to angula ka Jesu va txi kha vona: “Kha hi ti zivi.” Sekoko, nene a nje khene: “Nanani kha ni na mbi mi gela ti to ni maha tiya ngu mtamo muni.”

²⁸“Mi yi wonisa kutxani mhaka yiya kani? M'thu wokari a ti ni vanana vambidi. A txi gela mkoma wa kona, a txi khene: ‘Mwanangu, tsula nyamsi u ya thuma thembweni ka mivhinya’.

²⁹Aniko ene a to angula a txi khene: ‘Kha ni ti lavi’. Kambe ngu msana a to ti laya se e tsula.

³⁰A di yite ka mnanda wa kona, a to mu gela nene toneto, se ene e xamula a txi khene: ‘Ina, ni na tsula, tata’. Kambe kha tsula.

³¹Se i mani ka vona va vavambidi, awu a nga maha kuranda ka tate wakwe, kani?” Se vona va txi kha vona: “Ngu wule wo khata.” Jesu a to va gela a txi khene: “Ngu ditshuri nanani na mi gela: Vakhupisi ni magelegele va na mi thangela kuwulela Mfumoni ka Txizimu.

³²Nguko Johani a tile kwanu a ta mi gondisa nzila ya kululama, kambe kha ma kholwa ngu ngene, kasi vakhupisi ni magelelegele va khotwe ngu ngene; kasi anu, hambiko mi nga wona tiya, kha ma sikota kuhunduluka mi txi kholwa ngu ngene.”

³³“Engisani txidinganiso tximwani: A ti ti ho m'thu, i nga ti di nyamne wa m'ti, awu a nga phaya mivhinya e yi bhiyela ngu libhiyo la mindonga, a txi kelela nzeka ya kukamela ka yona mihando yakwe, e aka txitezi, ngu msana a txi ningela thembwe yiya ka vadimi, se ene a txi teka dipfhumba da kuendela ditikoni ka kule.

³⁴Mbimo yi ku nga hoka nyango ya kuelula, a to ruma sithumi sakwe ka vadimi kasi kuya amukela mitxelo yakwe.

³⁵Aniko vadimi va to ñola sithumi, ve peka mmweyo, ve daya mmwani, se wa wuraru ve mu balisela ngu marigwi.

³⁶Se ene a to engeta e ruma simwani sithumi, sasingi ngutu kupinda so khata, aniko ka vonavo ni vona, va to va mahela tonati va nga maha ka va vo khata.

³⁷Se nyamne wa m'ti e za e ruma mwanana wakwe apune, a txi khene: ‘Va nava ni txithavo ngu ngene.’

³⁸Aniko vadimi, mbimo yi va nga wona mwanana wakwe, va to langana va txi kha vona: ‘Awuwa ngene i ku m'dyi wa thomba. He m'dayeni, hi na sala ni thomba yakwe.’

³⁹Se va to mñola, ve mu ruruvisa ve mu yisa hahanze ka thembwe ya mivhinya, ve m'daya.

⁴⁰Ngako a txi ta nyamne wa mivhinya yile a nata maha txani ngu vathu vale va vadimi kani?”

⁴¹Vona va to angula va txi kha vona: “A na va fuvisa vathuvo vo biha, senikoko a na ningela thembwe ya mivhinya ka vamwani vadimi, ava va na ku mu wuyisela mihando yakwe ngu nyango yi yi lavekako.”

⁴² Jesu a to va gela a txi khene: “Kasi kha ma gonda ka Mibhalo ti taku: ‘Dirigwi dile di nga lambwa ngu vaaki di tshumete di maha dirigwi da hombe do tsanisa. Atiya ti mahilwe ngu Mkoma kambe ta xamalisa masoni kwathu.’

⁴³Ngu toneto, na mi gela ku khani: Mfumo wa Txizimu wu na thaviswa kwanu, wu ningelwa ka dimwani ditiko, adi di no sikota kuhumisa mihando ya wona.

⁴⁴[Awule a no wela txitimwi ka dirigwi diya a na bhandekela e khatukela; awule a no welwa ngu dona, a na phwaraselwa.”]

⁴⁵Vaphaxeli va hombe ni Vafarisi, ngako va txi engisa sidinganiso sakwe, va to ti mana ti to a womba-womba ngu vona.

⁴⁶Se va ti lava ku mñola, aniko va to thava dibutho da vathu, nguko vona va ti ti m'ziva nga mprofeti.