Read chopi Matewu 23 Bible Online

Matewu 23 - chopi bible

Matewu 23

¹Sekoko konaho, Jesu a to womba-womba ka dibutho da vathu ni ka vagondiswa vakwe,

²a txi khene: “Ha txikhaloni ka Mosi va khalahatshile vabhali ni vafarisi.

³Ngu toneto, totshe ti va mi gelako ti maheni, mi ti veketa, kambe mi nga eteteleni mahanyelo awe, nguko vona va womba, aniko kha va mahi.

⁴Va sunga mirwalo yo nemela ni yo karata kurwala, ve yi rweka ha makata ka vathu, aniko vona kha va yi zinginisi hambi ngu litiho.

⁵Totshe ti va ti mahako, va ti mahela kasi kuwonwa ngu vathu. Ngu toneto, va dhunda kusunga ha mbanza mwendo mawokoni kwawe titxinda ta kuanama, ku di bhatwe mapswi a mlayo mndani ka tona ni kulaphisa titxinda ta tinguwo tawe.

⁶Va dhunda makhalo a masoni amu mibusoni, ni sikhalo sa masoni masinagogani,

⁷va dhunda kuloswa amu metendelani ni kudhanwa ku ‘M'gondisi M'gondisi’ ngu vathu.”

⁸“Kasi i di anu mi nga dhundeni kudhanwa ku mi M'gondisi, nguko M'gondisi wanu mmweyo, anu ngu txanu mi va txikoma ni txinanda.

⁹Ha mafuni hawa, m'thu mi nga mu dhaneni ku i tate wanu, nguko Tate wanu mmweyo, awule a ku nzumani.

¹⁰Mi nga tumeleni ve mi dhana ku mi vagondisi, nguko M'gondisi wanu i mmweyo: I ku Kristu.

¹¹Awu i ku wa hombe hagari kwanu, a na va i di txithumi txanu.”

¹² Awule a ti guletako, a na vekwa hahatshi; ani wule a ti vekako hahatshi a na guletwa.

¹³“Mi na ni dikhombo, anu vabhali ni nanu Vafarisi, vaxengeteli! Nguko ma tsivela vathu kuwulela Mfumoni ka nzumani, kha mi wuleli anu, kambe kha mi tuleli vale va lavako kuwulela.

¹⁴[Mi na ni dikhombo, anu vabhali ni nanu Vafarisi, vaxengeteli! Mi moxako silo sa tinoni, mi txi va xenga ngu mikombelo yo lapha; ngu toneto mi na lamulwa ngu malamulelo o karata ngutu.”]

¹⁵“Mi na ni dikhombo, anu vabhali ni Vafarisi, vaxengeteli! Mi dhawulako linene mafuni kasi kumana mlondeteli mmweyo; se mbimo yi mi nga mu mana, mi txi mñola ta tinene, mi mu maha wu a ku ni fanelo ya kuyiswa gehena, awu a mi pindako kambidi ngu wubihi.”

¹⁶“Mi na ni dikhombo, anu vakombisi va nzila na mi di mabhofu nanu, mi ku khanu: ‘Ngako m'thu a txi xambanya ngu Dithepele, kha ti na mhaka; aniko, ngako a txi xambanya ngu nzalama yile yi ku Dithepeleni, a ti sungile.’

¹⁷Sipumbu-nu, mi mabhofu! Kasi nji txani txi ku ni lisima ngutu, kani? I nzalama mwendo dithepele di sawulekisako nzalama, kani?”

¹⁸“Se anu mi khanu kambe: ‘Ngako m'thu a txi xambanya ngu txiluvelo, eto kha ti na mhaka ya txilo; aniko ngako a txi xambanya ngu mningelo wu wu ku ha txiluveloni, a ti sungile.’

¹⁹Mabhofu-nu! Kasi nji txani txi ku ni lisima ngutu, kani? Ngu mningelo mwendo ngu txiluvelo txi sawulekisako mningelo, kani?

²⁰Ngu toneto, kuxambanya ngu txiluvelo ndimweto ni kuxambanya ngu txona txiluvelo ni sotshe si si ku txitimwi ka txona.

²¹Kuxambanya ngu Dithepele, ndimweto ni kuxambanya ngu dona, ni wule a zumbako mndani ka dona.

²²Kuxambanya ngu nzuma, ndimweto ni kuxambanya ngu txikhalo txa wukoma txa Txizimu, ni nene wule a nga khalahatsha txitimwi ka txona txikhalo.”

²³“Mi na ni dikhombo, anu vabhali ni nanu Vafarisi, vaxengeteli, nguko ma dihela sa wugumi ka nyatximbowane ni ka dianetha ni ka dikumina, kambe kha mi khatali ngu ditshina da Mlayo, i ku kululama, wumbilu ni kuthembeka. Mi ti ni fanelo ya kumaha tiya, mi si leki ni tona tile.

²⁴Vaxengetelinu va mabhofu, mi sefako tshuna, mi txi mita dikamelu!”

²⁵“Mi na ni dikhombo, anu vabhali ni Vafarisi, vaxengeteli, nguko mi kuwula hahanze ka muhindo ni ka mbiya, kasi mnadani kwanu mi tate ngu wukhokhokho ni kwa mbi ti ñola.

²⁶Mfarisi-we wa dibhofu! Thanga ngu mndani ka muhindo ni ka mbiya u txi kukuwula, kasi hahanze ka sona ni kona ku na basa.”

²⁷ “Mi na ni dikhombo, anu vabhali ni Vafarisi, vaxengeteli, nguko mi fana ni mayiva a kupendwa ngu mhemba, ma tshurako hahanze, kasi mndani ka ona ma tate ngu marambu a vafi ni lotshe lixaka la nzambwa.

²⁸Ngu toneto, na nanu mi woneka hahanze nga mi lulamile, kasi mndani mi tate ngu wukanganyisi ni wubihi.”

²⁹“Mi na ni dikhombo, anu vabhali ni Vafarisi, vaxengeteli, mi akelako mayiva a marigwi vaprofeti, mi txi tshurisela mayiva a valulami, mi txi khanu:

³⁰‘Idiku hi ti hanya ka mbimo ya vatate vathu, nga hi sa ema navo ka mhaka ya kudaya vaprofeti’.

³¹Ngu konaho, ma ti landula ti to mi vanana va vale va nga daya vaprofeti.

³²Ngu toneto, tatisani mpimo wa vatate vanu!

³³ Minyoka-nu, lixaka la timamba! Mi na hulukisa kutxani kuavanyiswani ka gehena?”

³⁴“Ngu konaho, na mi rumela vaprofeti, titxhari ni vabhali. Mi na daya vamwani kwawe mi va bethela ha txihambanoni, mi na kwapela vamwani masinagogani kwanu, mi na va xanisa va txi pepeseka ngu ka didhoropa ni didhoropa.

³⁵Kasiku wu txi thekelela txitimwi kwanu wotshe mnoha wo lulama wu nga theketwa ha mafuni, kukhukhela ka mnoha wa m'lulami Abhele kala kuhoka ka mnoha wa Zakariya, mwanana wa Bharakiya, awu mi nga m'daya hagari ka wukhalo wo sawuleka ni txiluvelo.

³⁶Kha ditshuri na mi gela ku khani: Sotshe siya si na welela lihunzu liya.”

³⁷“Jerusalema! Jerusalema! U dayako vaprofeti, u txi balisela ngu marigwi ava va rumelwako kwako! Nzi khati singani ni nga navela kusengeleta vanana vako nga kule ka khukhu yi fundamelako sisondwana sa yona ngu mabhapi, se awe u txi lamba!

³⁸Ngu toneto, m'ti wako wu na maha dirumbi.

³⁹ Nguko ani na mi gela ku khani: Kha mi na mbiswa mi ni wona, kala mbimo yi mi no womba mi txi khanu: A na bongwe awu a tako ngu ditina da Mkoma!”