Read chopi Matewu 25 Bible Online

Matewu 25 - chopi bible

Matewu 25

¹ “Sekoko ka yoneyo mbimo, Mfumo wa nzumani wu na fanana ni timbiri ta digumi, ati ti nga teka malambu a tona, ti huma kasi kuhingeta mteki.

²Aniko mtxhanu wa tona ti ti divate, se timwani ta mtxhanu i ti to txhariha.

³Timbiri tile ta kudivala, ti di tekile malambu a tona, kha ta teka mafura ngu phuho;

⁴kasi atile to txhariha, ti to teka malambu, ti teka ni mafura kambe amu ka mabhojela.

⁵Ku ti ngako mteki e swela kubwaka, tona ti to khata kukhudhahela ti otela.

⁶Se ngu hagari ka wusiku, ku to pfala dipswi, va txi kha vona: ‘Ndiyo wata mteki! Mu hingeteni!’

⁷Sekoko ti to wuka totshe timbiri ti longela malambu a tona.

⁸Atile to divala ti to womba ka tile to txhariha ti txi kha tona: ‘Hi hunguleleni mafura anu, nguko malambu athu ma timeka’.

⁹Aniko timbiri to txhariha ti to angula ti txi kha tona: ‘Ahim-him, mafura ma nga thuka ma si hi eneleli athu ni nanu; tsulani ka vale va xavisako, mi ya ti xavela nanu.’

¹⁰Ngako tona ti di tsute kuxavani ka mafura, mteki a to bwaka, se atile ti nga ti ti lulamisete, ti to wulela nayo m'busoni ka mtxhadho; se di sekwa ditimba.

¹¹Ngu msana ka mbimo ti to bwaka nitona atile to divala, ti txi kha tona: ‘Mkoma, Mkoma, hi tulele ditimba!’

¹²Aniko ene a to ti xamula a txi khene: ‘Kha ditshuri na mi gela ti to kha ni mi zivi.’

¹³Ngu toneto, wonelelani, nguko ditshiku kha mi di zivi, hambi ni txikhati.”

¹⁴“Nguko ti na nga m'thu wokari, awu, mbimo yi a nga lava kuendela kule, a nga dhana sithumi sakwe e si ninga txuma txakwe.

¹⁵Ka wammweyo a mningile mtxhanu wa titalenta, ka mmwani a mningile titalenta timbidi, ka mmwanyani kambe e mninga yimweyo, madingano ni mtamo wa mmwani ni mmwani.

¹⁶Awule a nga amukela mtxhanu wa titalenta, a to bhindula ngu tona, e mana timwani ta mtxhanu.

¹⁷Nga toneto kambe, awule a nga amukela timbidi, a bhindute e mana timwani ta timbidi.

¹⁸Aniko awule a nga amukela yimweyo dwe, a to ya yi kelela mafuni, e sisa male ya nyamne wakwe.

¹⁹Se msana ka mbimo ya hombe, a to wuya nyamne wa vale va sithumi e va kombela dibhindu da mithumo yawe.

²⁰Sekoko wule a nga ti emukete mtxhanu wa titalenta, a to womba a txi khene: ‘Nyamne wangu, u ni ningile mtxhanu wa titalenta, se ndite timwani ta mtxhanu ni nga bhindula’.

²¹Nyamne wakwe a ti khene kwakwe: ‘Ngu tona, txithumi txa txinene, txa kuthembeka, u thembekile ka simaha sa sidotho, ni na kuveka txitimwi ka sasingi. Wulela litsakoni ka nyamne wako.’

²²Ngu kulondeta, awule a nga ti amukete titalenta timbidi a ti khene: ‘Nyamne wangu, u ni ningile titalenta timbidi, se ndite timwani ta timbidi ni nga bhindula.’

²³Nyamne wakwe a ti khene kwakwe: ‘Ngu tona, txithumi txa txinene, txa kuthembeka, u thembekile ka simaha sa sidotho, ni na kuveka txitimwi ka sasingi. Wulela litsakoni ka nyamne wako.’

²⁴Ngu kugwitisa, awule a nga ti amukete talenta ya yimweyo, a ti khene: ‘Nyamne wangu, na kuziva ngu kale ti to awe u m'thu wo karata, ngu ku u dhunda kuelula amuwa u nga mbi phaya, ni kusengeleta ahawa u nga mbi xwaya.

²⁵Ngu konaho, ni ti ya sisa talenta yako, ngu dizowa, hahatshi ka mafu. Nditxe tximaha txi txi kulumbako.’

²⁶Nyamne wakwe, a txi mu angula, a to khene: ‘Txithumi txa tshofu, txa mkara!’ U ti zivile ta ku ani na elula amuwa ni nga mbi phaya, ni sengeleta amuwa ni nga mbi xwaya.

²⁷Ngu kota yeto, nga u di vekile male yangu ka vale va bhindulisako, kasiku, kuwuyani kwangu, ni ta mana male yangu yi di velekete.

²⁸Mtekeleni talenteyo, mi yi ningela ka wule a ku ni digumi da titalenta,

²⁹ nguko wuhi ni wuhi a ku naso, a na ningwa ngu kuengetelwa; aniko awule a si nga naso, a na tekelwa ni txile a ku natxo.

³⁰Txithumi-txo txa mkara, txo mbi vhuna txilo, txi tshotsheni hahanze mtemani; konamo ku na vaho kudila ni kugegeresela ka makwasa.”

³¹ “Mbimo yi a nota Mwanana wa M'thu ni wudhumo wakwe, kumweko ni tingelozi takwe, ene a nata khalahatsha ha txikhaloni kwakwe ka wukoma.

³²Se votshe vathu va na ya tshangana masoni kwakwe. Ene a na va abanisa ngu mitxhambi yimbidi, nga kule ka m'dyisi a abanisako tinvuta ni tiphongo,

³³A na teka tinvuta a txi ti veka txineneni kwakwe, e teka tiphongo a txi ti veka txibhabha kwakwe.”

³⁴“Sekoko Mfumeli a na gela vale va ku txinene a txi khene: ‘Ngonani anu mi nga katekiswa ngu Tate wangu, amukelani thomba ya Mfumo, ayi mi nga lulamiselwa kukhukhela di txi mahwa ditiko.

³⁵Nguko mbimo yi ni nga ti ni nzala, anu mi ni phamete sakudya; mbimo yi ni nga ti ni ditora, mi ni ningile mati ni sela; mbimo yi ni nga ti muendi, mi ni amukete.

³⁶Ni ti si nga ni sakuambala, aniko mi ni ambekile; ni ti ti lwala, se mi tile mi ta ni xola; ni ti ti ku khotelwani, mi tile mi ta ni dingula.’ ”

³⁷“Sekoko valulami va na mu angula va txi kha vona: ‘Mkoma ngu dihi ditshiku hi nga kuwona u di ni nzala hi txi ku phamela, u di ni ditora, hi txi ku ha mati o sela kani?

³⁸Ngu dihi ditshiku hi nga kuwona u di muendi, hi txi kuamukela, mwendo u di ni wusakato hi txi kuambeka, kani?

³⁹Ngu dihi ditshiku hi nga kuwona u txi lwala, mwendo u di ku khotelwani, hi txi ta kwako, kani?’ ”

⁴⁰“Se Mfumeli a na va xamula a txi khene: ‘Kha ditshuri na mi gela ti to khani: Yotshe mbimo yi mi nga ti maha eto ka mmweyo wa vanathu vavadotho, mi mahete ani nipune’.

⁴¹Sekoko ngu msana, a na gela ava va txibhabha kwakwe, a txi khene: ‘Hambukani kule ni nani, anu vathu va kurukwa, tsulani mndiloni ko mbi na magwito, awu wu nga longiselwa Sathani ni tingelozi takwe.

⁴²Nguko mbimo yi ni nga ti ni nzala, kha ma ni phamela; mbimo yi ni nga ti ni ditora, kha ma ni ninga so sela;

⁴³mbimo yi ni nga ti muendi, kha ma ni amukela; ni ti ti ni wusakato, aniko kha ma ni ambeka; mbimo yi ni nga ti ti lwala mwendo ni nga ti ku khotelwani, kha mata mi ta ni xola.’ ”

⁴⁴“Sekoko ni vona va na wotisa va txi kha vona: ‘Mkoma ngu dihi ditshiku hi nga kuwona u di ni nzala, mwendo u di ni wusakato, mwendo malwati, mwendo u di ku khotelwani, hi txi lamba ku kuvhuna, kani?’

⁴⁵Sekoko ene a na va angula a txi khene: ‘Kha ditshuri na mi gela ku khani: Yotshe mbimo yi mi nga leka ku ti maha tiya ka mmweyo wa vanathu vavadotho, ni nani kha ma ni mahela.’

⁴⁶Se avava va na tsula kutsayiswani ko mbi guma; ani valulami va na yiswa ka wutomi wo mbi guma.”