Read chopi Matewu 26 Bible Online

Matewu 26 - chopi bible

Matewu 26

¹Se ku to maheka ta ku, Jesu a di gwitile kuwomba timhaka tiya totshelele, e gela vagondiswa vakwe a txi khene:

²“Ma tiziva ti to ngako ma di pindile masiku mambidi ku nava i di Pasika; se Mwanana wa M'thu a na ningelwa kasi kuya bethelwa ha txihambanoni.”

³Sekoko vaphaxeli va hombe ni madhota a ditiko va to tshangana digumani ka Mphaxeli wa Hombe a nga ti dhanwa ku i Kayifasi.

⁴Konaho va to ya sunga txikungo txa kuñola Jesu, kasi ku m'daya.

⁵Aniko va ti ti kha vona: “Ti nga mahwe tiya ha m'busoni, ku nga wuka mazunga hagari ka vathu.”

⁶Se ngako Jesu a di Bhetaniya, m'tini ka Simoni, awu a nga ti dhanwa ku wa tshekela,

⁷ a to mtshuketela mmweyo wamsikati, a di ni txikadyana txa alabhastru, txa mafura o bhumula ngutu, a txi ma thela ha msungo ka Jesu, mbimo yi ene a nga ti ha kudyani.

⁸Mbimo yi va nga wona tiya vagondiswa va to henya va txi kha vona: “Simaha siya si xakelelwa txani mahala kani?

⁹Nguko si ndi na xaviswa ngu kudhula ngutu, se male ya kona yi ningwa sisiwana!”

¹⁰Aniko Jesu, ngako a txi ziva mapswi awa, a to va gela ku khene: “Mi karatela txani wu wa wamsikati, kani? Khaditsuri ene a ni mahete mthumo wa lisima.

¹¹Kha ditshuri, sisiwana mi na va naso yotshe mbimo, kasi ani kha mi na mbi va ni nani yotshe mbimo.

¹²Nguko, ngu kuthela mafura ha mmidi kwangu, a mahela ditshiku da kutshotshwa kwangu.

¹³Kha ditshuri na mi gela ku khani: Hani ni hani ku no txumayelwa Evhangeli, ka dotshe ditiko, ti na xawutwa ni tona tiya a nga ti maha, kasi kuve mu alakanya.”

¹⁴Sekoko konako, mmweyo wa vale va digumi ni vambidi, a dhanwako ku i Judha Iskariyoti, a to ya ka vaphaxeli va hombe, a txi ya khene:

¹⁵“Mi na ni ninga txani, ngako ni txi ningela Jesu kwanu kani?” Vona va to m pimela magumi mararu a male ya silivela.

¹⁶Se kukhukhela konaho a to khata kulava mbimo ya yinene ya ku mningela ngu yona.

¹⁷Ka ditshiku do khata da M'buso wa mapawu o mbi tshumbelwa, vagondiswa va to ya ka Jesu, veya mu wotisa, va txi kha vona: “U lava ti to hi txi kulongisela hani wukhalo wa kudyela kona Pasika kani?”

¹⁸Ene a to angula, a txi khene: “Tsulani didhoropani, ka m'ti wa nombwe wokari, mi na ya mu gela tiya: ‘M'gondisi a khene: Mbimo yangu yi hafuhi. Ni lava ku ta mahela nyumbani kwako Pasika kumweko ni vagondiswa vangu.’ ”

¹⁹Vagondiswa va to maha nga ti Jesu a nga va rumisa tona, veya longisela Pasika.

²⁰Se ku di hokile minova, a to khalahatsha ha sakudyani ni vagondiswa vakwe va digumi ni vambidi.

²¹Se va di ngadi va txi dya, a to va gela a txi khene: “Kha ditshuri ni khani kwanu: Mmweyo wanu a na ni ningela.”

²²Se vona va to karateka ngutu, mmwani ni mmwani e khata ku mu wotisa a txi khene: “Mkoma i nga va i di ani kani?”

²³ Ene a to va xamula a txi khene: “Awu a betako dianza mbiyani kumweko ni nani, ngeneyo a na ku ni ningela.

²⁴Mwanana wa M'thu a na tsula nga ti ti nga bhaliswa tona, aniko dikhombo da wule ene Mwanana wa M'thu a no ningelwa ngu ngene! Ti ndi nava i di txhuko, ngako mthuyo a ti sa velekwa!”

²⁵Konaho Judha, awu a nga mningela, a to angula a txi khene: “M'gondisi, i nga va i di ani kani?” Jesu a to xamula a txi khene: “U ti landute upune!”

²⁶Va di ngadi va txi dya, Jesu a to teka dipawu a txi di katekisa, a txi di bhanda, a txi di ningela ka vagondiswa vakwe, a txi khene: “Tekani mi txi dya, asiya mmidi wangu.”

²⁷Ngu msana a to teka digombe, e bonga, se e va ninga, a txi khene: “Selani ngu dona motshenu.

²⁸Nguko awuwa mnoha wangu wa txitumelelano, wu na ku theketelwa vavangi, kasi ku na mana divalelo ya sionho.

²⁹Aniko ni khani kwanu: Kukhukhela konkuwa, kha ni na mbi sela kambe m'hando wa m'vhinya, kala ditshiku di ni nota wu sela i di wa wuphya, kumweko ni nanu, Mfumoni ka Tate wangu.”

³⁰Msana ka kuva va di embelete mzeno, va to huma veya mmangoni ka Olivheti.

³¹Sekoko, Jesu a to va gela a txi khene: “Ka wona wuwa wusiku, mi na khuveka motshenu ngu mhaka yangu, nguko kubhatwe ku kha vona: ‘Ni na peka m'dyisi, se tinvuta ta mtxhambi ti na hangalaka.’

³² Aniko msana ka kuwuka kwangu, ni na mi thangela masoni ni ya Galileya.”

³³Pedro a to angula, a txi khene: “Hambi votshe va txi khuveka ngu mhaka yako, ani kha ni na mbi khuvekiswa ni ka kudotho.”

³⁴Jesu a to mu angula a txi khene: “Ngu ditshuri na kugela tito, ka wona wusiku wuwa, wu sanzi kuemba mkuku, u na ni lamba kuraru.”

³⁵Pedro a to womba kambe a txi khene: “Hambi i di kulava kudawa kumweko ni nawe, kha ni na mbi kulamba.” Votshe vagondiswa va so wombisa toneto ni vona.

³⁶Sekoko, Jesu a to tsula navo ka wukhalo wu wu dhanwako ku i Getsemani, se e gela vagondiswa vakwe a txi khene: “Zumbani kona hawa, na nga ya aniya ni txi ya khongela.”

³⁷Ene a to teka Pedro ni vanana va vambidi va Zebhedhewu, se e khata kutelwa ngu dikhodho ni kukarateka ngutu.

³⁸Sekoko a to va gela a txi khene: “Moya wangu wu ha kuxanisekani ka hombe ka kufa; zumbani hawa mi txi wonelela ni nani.”

³⁹Se a di tshuketile kule nyana, a to ti wisa hahatshi, ngu mbanza, na a txi khongela, a txi khene: “Tata wangu, ngako ti txi koteka, digombe diya di na pinde kule ni nani; aniko, ti nga maheke nga kuranda kwangu, ti na maheke nga ti Awe u ti lavisako tona.”

⁴⁰Sekoko a di wuyile hafuhi ka vagondiswa a to va mana va di otete, se e womba ka Pedro a txi khene: “Mi tandekile ni kuwonelela txikhati txa tximwetxo ni nani kani?

⁴¹Wonelelani, mi txi khongela, kasi mi si wi kudukwani. Nguko moya wona wu tsani, aniko mmidi wa rereka.”

⁴²Ti di mahile eto, a to tsula ka wumbidi, eya khongela kambe, a txi khene: “Tata wangu, ngako ti si koteki ti to digombe diya di pinda ni sa di sela, ku na maheke kuranda kwako.”

⁴³Se a di tshumete e wuya kwawe, a to ta va mana kambe va di otete, nguko maso awe ma ti nemelwa ngu wukohe.

⁴⁴Se e va siya, a txi tsula kambe ka wuraru, eya khongela, a txi womba onayo mapswi o fana.

⁴⁵Sekoko a di tshumete kambe eya ka vagondiswa vakwe, a va gete a txi khene: “Konkuwa mi nga sikota kuotela, mi txi humula! Wonani, yi hokile mbimo yi Mwanana wa M'thu a no ningelwa ngu yona manzani ka vaonhi.

⁴⁶Khukhani hi tsula, se a hafuhi awu a lavako ku ni ningela!”

⁴⁷Ene a di ngadi a txi womba tiya, konaho ku to bwaka Judha, mmweyo wa va digumi ni vambidi, ni dibutho da hombe da vathu kumweko nayo, na va di ni matxhari ni migomba, va txi ta ngu kurumwa ngu vaphaxeli va hombe ni madhota a ditiko.

⁴⁸Se mningeli a ti ti langanile navo txikombiso txiya: “Awule ni na ku mu pswopswa, ngeneyo, mu ñoleni.”

⁴⁹Konako, Judha a to tshuketa hafuhi ka Jesu a txi khene: “Xeweni, M'gondisi!” Se e mu pswopswa.

⁵⁰Jesu a to mu angula a txi khene: “Mndoni, kasi u tete ku ta maha txani kani?” Sekoko vona va to mtshuketela, ve yisa mawoko hammidi ka Jesu, ve mñola.

⁵¹Mmweyo wa vale va nga ti kumweko ni Jesu, a to swomola ditxhari dakwe e peka txithumi txa mphaxeli wa hombe, e txi wila nzeve.

⁵²Sekoko Jesu a to khene kwakwe: “Tshumeta ditxhari dako msavani ka dona, nguko votshe vale va na kuthumisa ditxhari, va na loviswa ngu ditxhari.

⁵³Ina u pimisa ti to ni nga tandeka kukombela ka Tate wangu e ni rumela kunukunukuwa mitxawa ya tingelozi, ya kupinda digumi ni yimbidi kani?

⁵⁴Se yi na tatisekisa kutxani Mibhalo yi yi wombako ti taku: Totshe tiya ti fanela kumaheka?”

⁵⁵Sekoko Jesu a to khene ka dibutho: “Mi tela ku ta ni ñola mi di xomile matxhari ni migomba, nga no va dikhokhokho kani? Ditshiku ni ditshiku ni ti zumba hagari kwanu, ni gondisa Dithepeleni, aniko kha ma ni ñola.

⁵⁶Sekoko totshe tiya, ti mahekile kasi kutatiseka Mibhalo ya vaprofeti.” Ngu konaho votshe vagondiswa, va to mleka, ve thava.

⁵⁷Ava va nga ta ñola Jesu, va to mu yisa m'tini ka Kayifasi, i nga ti mphaxeli wa hombe, ahawa vabhali ni madhota a ditiko va nga ti sengelatanile kona.

⁵⁸Pedro a ti mu londisela a di kule kala kuhoka digumani ka mphaxeli wa hombe. Se a di hokile hafuhi, a to wulela e khalahatsha kumweko ni sithumi, kasi kuwona magwito a totshe timhaka.

⁵⁹Vaphaxeli va hombe ni dotshe dibanza va to lava wufakazi wa makuhu ha mmidi ka Jesu, kasiku e mana kudawa.

⁶⁰Aniko kha va wu mana, hambiko ti nga humelela tifakazi ta tingi ta makuhu. Va gwitile ngu vambidi,

⁶¹ ava va nga kha vona: “Awuwa m'thu a ti khene: ‘Ni nga sikota kukhundumusa Dithepele da Txizimu ni tshumela ni di aketa ngu masiku mararu.’ ”

⁶²Konaho a to khukha mphaxeli wa hombe a txi khene kwakwe: “Khu xamuli txilo ka mhaka yi va ku mangalelako ngu yona kani?”

⁶³Aniko Jesu a to simama e malala. Se mphaxeli wa hombe a to mu gela a txi khene: “Na ku xambanyisa ngu Txizimu txi txi hanyako ti to u hi gela mwendo ngawe Mesiya, Mwanana wa Txizimu kani?”

⁶⁴Jesu a to xamula a txi khene: “U wombile tona. Se nanani na mi gela tito, kukhukhela konkuwa, mi na wona Mwanana wa M'thu, a di khalahatshile txineneni ka Txizimu, Nyamne wa Mtamo wotshe, a txi ta ngu txitimwi ka marefu a nzumani.”

⁶⁵Sekoko mphaxeli wa hombe a to vharula syambalo sakwe, a txi khene: “A rukile Txizimu! Hi ngadi hi txi lava wufakazi wa txani kani? Mi mu engisile konkuwa, a txi ruka Txizimu.”

⁶⁶Mi wona to txani kani? Vona va to xamula va txi kha vona: “A fenetwe ngu kufa!”

⁶⁷Sekoko va to khata ku mu thurela khoheni, ve mpeka ngu sibhakela. Vamwani va txi mu haphata ngu mipama, va txi kha vona:

⁶⁸“Mesiya, hinga huta: I mani a nga kupeka kani?”

⁶⁹Ka yoneyo mbimo, Pedro a ti khalahatshile hahanze, digumani. Se mmweyo wa txithumi txa wamsikati a to tshuketa hafuhi kwakwe, a txi khene: “Anawe u ti kumweko ni Jesu wa Galileya.”

⁷⁰Aniko ene a kanetile masoni ka votshe, a txi khene: “Kha ni tizivi eto u wombako.”

⁷¹Se a di khukhile ha txikeni, a to wonwa ngu tximwani txithumi txa wamsikati, awu a nga gela ava va nga ti ti ho konaho, a txi khene: “Awuwa nene a ti kumweko ni Jesu wa Nazareta.”

⁷²Ene a to kaneta kambe, na a txi xambanya, a txi khene: “Ani kha ni mu zivi eyo m'thu!”

⁷³Se ngu msana ka mbimo yokari, va to tshuketela hafuhi ava va nga ti konaho, va txi kha vona ka Pedro: “Kha ditshuri, na nawe u mmweyo wawe, nguko mawombawombelo ako ma kumangala.”

⁷⁴Sekoko a to khata kuruketela, e xambanya a txi khene: “Kha ni mu zivi eyo m'thu!” Se ka yoneyo mbimo mkuku wu nje kuemba.

⁷⁵Sekoko, Pedro a to alakanya mapswi a Jesu, a nga khene: “Wu sinzi kuemba mkuku, u na ni lamba kararu.” Msana keto, a to huma hahanze e dila ngu kupandiseka.