Read chopi Matewu 27 Bible Online

Matewu 27 - chopi bible

Matewu 27

¹Ngako di di txite, votshe vaphaxeli va hombe ni madhota a ditiko, va to tshangana ve maha txikungo txa kulenga Jesu, kasiku ve m'daya.

²Se va di mu sungile mawoko, va to mu heleketa veya mningela ka mfumeli Pilato.

³Sekoko, Judha, awu a nga mningela, a di woni ti to Jesu a abanisetwe kufa, a to ti laya se e tshumeta male yile ya magumi mararu, ya silivhela, ka vaphaxeli va hombe ni madhota a ditiko,

⁴a txi khene: “Ni onhile ni nga ningela mnoha wo mbi na mnandu!” Vona va to kha vona: “Ti womba txani eto kwathu kani? Eto ndako wekhelela!”

⁵Se a di vinzile male hahatshi, mu Dithepeleni, ene a to huma e tsula eya ti tshongisa.

⁶Vaphaxeli va hombe, va di rolete male, va to kha vona: “Kha ti laveki ti to yi vekwa mkwamani ka miningelo, nguko i male yi yi nga xava mnoha.”

⁷Msana ka kuva va di sungile txikungo, va to xava ngu yona “Thembwe ya Muwumbi,” kasi kutshotshela kona vathu va matiko.

⁸Ngu kota yeto, thembweyo kala ditshiku da nyamsi yi dhanwa ku i “Thembwe ya Mnoha.”

⁹Ngu toneto, ku tatisekile ati ti nga wombwa ngu mprofeti Jeremiya, a nga khene: “Va to teka magumi mararu a male ya silivhela, a nga xawa ngu yona m'thu, male yi a nga pimelwa ngu vanana va Israyeli.

¹⁰Va xavile ngu yona thembwe ya muwumbi, kota nga ti Mkoma a nga ni rumisa tona.”

¹¹Jesu a to yiswa masoni ka mfumeli Pilato, awu a nga mu wotisa a txi khene: “Ngawe mfumeli wa Vajudha kani?” Jesu a to xamula a txi khene: “U womba tona.”

¹²Kambe mbimo yi a nga ti mangalelwa ngu vaphaxeli va hombe ni madhota a ditiko, kha xamula txilo.

¹³Sekoko, Pilato a to khene kwakwe: “Khu engisi totshe ti va wombako ngu ngawe, kani?”

¹⁴Aniko ene kha xamula dipswi ni da dimwedo, se ngu kota yeto mfumeli a to xamala ngutu.

¹⁵Se ngu mbimo ya m'buso wa Pasika, mfumeli a ti ni toloveto ya kuthukunyula mmweyo wa vale vo sungwa, awu vathu va nga ti mu lava.

¹⁶Ka yoneyo mbimo, a ti ti ho mmweyo wa kusungwa, wa nduma yo biha, a nga ti dhanwa ku i Bharabhasi.

¹⁷Pilato a to womba ka vathu va nga ti tshanganile a txi khene: “Ngu wuhi mi ti lavako ti to e thukunyulwa, Bharabhasi mwendo Jesu wu a dhanwako ku i Kristu kani?”

¹⁸Nguko a tiziva ti to va mu ningete ngu livengo.

¹⁹Na ene a di khalahatshile ha txikhaloni ka kulamula, msikati wakwe a to rumela kuya mu gela tiya: “U nga thuke u txi ti wuleta ka mhaka ya m'thu wuwa wo lulama, nguko ni pandisekile ngutu hamnova ngu miloro ngu mhaka yakwe.”

²⁰Aniko vaphaxeli va hombe ni madhota a ditiko va to kujetela dibutho ti to ve thusa Bharabhasi, ve leka Jesu e dawa.

²¹Mfumeli a to tshumela a txi wotisa a txi khene: “Ngu wuhi ka va vavambidi mi lavako ti to ni mu thukunyula kani?” Se vona va nje kha vona: “Bharabhasi!”

²²Pilato a txi khene kwawe: “Sekoko ni na maha txani ngu Jesu, awu a dhanwako ku i Mesiya, kani?” Va to xamula votshe va txi kha vona: “A na bethelwe ha txihambanoni!”

²³Ene a tshumete kambe a txi khene: “Njionho muni a nga txi maha kani?” Aniko vona va to phikiza. Va txi kwangula ngu mtamo va txi kha vona: “A na bethelwe ha txihambanoni!”

²⁴Sekoko Pilato, a di woni ti to kha koti txilo, ni ti to dizunga da engeteleka ngutu, a to ruma kuve mu tisela mati, e samba manza masoni ka dibutho, na, a txi khene: “Kha ni na mnandu ka mnoha wa m'thu wuwa wo lulama! Ati ndanu mokha.”

²⁵Se votshe va to angula va txi kha vona: “Mnoha wakwe wu na thekele txitimwi kwathu ni txitimwi ka vanana vathu!”

²⁶Sekoko Pilato a to thukunyula Bharabhasi, e rumela ti to Jesu a na kwapelwe ngu sisepu, ngu msana e mningela kasiku eya bethelwa ha txihambanoni.

²⁷Konaho masotxhwa a mfumeli ma to teka Jesu me mu yisa dibanzani veya tshanganisa dotshe dibutho masoni kwakwe;

²⁸se va txi mtshambula syambalo sakwe, ve mu ambalisa nguwo yo bhilivila.

²⁹Se va di lukile tshimbo ya mipa, va to msanzeka ha msungo kwakwe, ngu msana ve mñolisa litshava ngu dianza da txinene. Se va txi khizama masoni kwakwe na va txi mtseketsela va txi kha vona: “Xeweni, mfumeli wa Vajudha!”

³⁰Na va txi mu thurela lure khoheni, ve teka litshava ve mu peka ngu lona ha msungo.

³¹Ngako va di mu tseketsete, va to mtshambula dibhaji dile do bhilivila, ve mu ambalisa syambalo sakwe, ve tsula nayo kuya mu bethela ha txihambanoni.

³²Se va di humile, va to mana m'thu wa mwamna, wa Kirene, a nga ti dhanwa ku i Simoni, ve mu kurumeta kupakata txihambano txa Jesu.

³³Se mbimo yi va nga hoka ka wukhalo wu wu dhanwako ku i Golgota, ati ti wombako ku “mmango wa txikwakwa,”

³⁴va to mninga vhinya yo patwa ni vhinagre, kasiku e sela; aniko, mbimo yi a nga yi danza, kha tumela ku yi sela.

³⁵ Msana ka ku mu bethela va to teka tinguwo takwe va txi abanela, va di thangile ngu kuxaxuva tixolo.

³⁶[11] Se ve khalahatsha konaho, ve mu woneleta.

³⁷Se ve nameketa ngu txitimwi ka msungo wakwe, m'bhalo wa mhaka ya kufa kwakwe, va txi kha vona: “Awu i Jesu Mfumeli wa Vajudha.”

³⁸Kumweko ni Jesu, si ti ti bethetwe sigevenga simbidi, tximwetxo ngu didhawa da txinene, tximwani ngu didhawa da txibhabha kwakwe.

³⁹Se ava va nga ti pinda, va txi mu ruketela, va txi zinginika misungo yawe, va txi kha vona:

⁴⁰“Awe u khundumuselako Dithepele da Txizimu, u txi di aketa ngu masiku mararu, ti hanyise ko! Ngako u di Mwanana wa Txizimu, txhika ngu ha txihambanoni!”

⁴¹Konaho vaphaxeli va hombe, ni vabhali, ni madhota a ditiko, va txi mtseketsela ni vona, va txi kha vona:

⁴²“A hanyisile vamwani, kambe ene kha sikoti ku ti hanyisa apune. Ngako i di mfumeli wa Israyeli, a na txhike konkuwa ngu ha txihambanoni, kufela ku hi mtumela!”

⁴³A thembile Txizimu, inna ko, txi na mu hulukise konakuwa, ngako txi txi m'dhunda, nguko a ti khene: “Ani ni Mwanana wa Txizimu!”

⁴⁴Hambi vale va sigevenga, va nga ti bethetwe kumweko nayo, va ti ti mu ruketela ni vona.

⁴⁵Se kukhukhela ka txikhati txa wutxhanu ni tximwetxo kala ka txa wutxhanu ni mune, txidema txi to fenengeta dotshe ditiko.

⁴⁶Kambe ngu txikhati txa wutxhanu ni mune, Jesu a to kwangula ngu dipswi da hombe, a txi khene: “Eli, Eli, lama sabaktani, kani?” Ati ti wombako ku: “Txizimu txangu, Txizimu txangu, u ni lekete txani kani?”

⁴⁷Vamwani ka vale va nga ti ti ho konaho, ngako va di mu engisile, va to womba va txi kha vona: “A dhana Elija!”

⁴⁸ Konaho mmweyo wa vona a to tutuma eya teka txiponja e txi beta mu ka vhinagre, e txi zomeka aha ka litshava, se e mninga kasiku e sela.

⁴⁹Aniko vamwanyani va to womba va txi kha vona: “Leka, hi lava kuwona ti to mwendo a nata Elija a ta mu hanyisa.”

⁵⁰Kambe Jesu a to engeta e kwangula ngu dipswi da hombe, se e ningela moya.

⁵¹ Se ti di mahile eto, nguwo ya Dithepele yi to vharuka ngu hagari, kukhukhela txitimwi kala hahatshi; mafu ma txi zinginikela, marigwi ma txi fayekela.

⁵²Mathuna me tulekela, se mimidi ya vafi votala va kusawuleka, yi to wuka.

⁵³Se va di wukile ngu mathunani, msana ka kuwuka ka Jesu, va to wulela ka Dithoropa do sawuleka, ve vonwa ngu vathu vavangi.

⁵⁴Sekoko, mthangeli wa dizana, ni vale yi nga ti navo ve woneleta Jesu, ngako va di woni kuzinginikela ka mafu ni timwani ti nga humelela, va to dhuka, va txi kha vona: “Kha ditshuri awu i ti Mwanana wa Txizimu!”

⁵⁵ Konaho kambe ku ti ti ho vavasikati votala, va txi wonetela tiya va di kule, avava, kukhukhela Galileya, va nga ti londetela Jesu, na va txi mu thumela.

⁵⁶Hagari ka vona, a ti ti ho Mariya wa Magdhala, ni mmwani Mariya, mame wa Jakobe ni Josefa, ni mame wa vanana va Zebhedhewu.

⁵⁷Se ni minova a tile m'thu wokari wa Arimateya, i nga ti nyatithombe, awu a nga ti dhanwa ku i Josefa, awu nene i nga ti mgondiswa wa Jesu.

⁵⁸Se a to tsula ka Pilato, eya kombela mmidi wa Jesu. Sekoko Pilato e rumela ti to mmidi wule wu ningelwa kwakwe.

⁵⁹Josefa a to teka mmidi, e wu phutela ngu nguwo yo basa,

⁶⁰e wu veka diyivani kwakwe, kakuphya, di nga ti mahilwe ha dirigwini. Ngu msana a to wumbuluta dirigwi da hombe e khubhunyeta ngu dona diyiva, e khukha e tsula.

⁶¹Se a ti tiho kona hale Mariya wa Magdhala ni mmwani Mariya, na va di khalahatshile masoni ka diyiva.

⁶²Mangwanani ka kona, i ku mixo ya ditshiku di di londetelako ditshiku da kulongisela, vaphaxeli va hombe ni Vafarisi va to tsula ka Pilato,

⁶³ veya mu gela tiya: “Awe mfumeli, ha khumbula ti to mxengeteli wule a wombile, a di ngadi a txi hanya, a txi khene: ‘Ni na wuka ngu ditshiku da wuraru.’

⁶⁴Ngu toneto, rumela vathu veya woneleta diyiva ta tinene, kala ka ditshiku da wuraru, va nga thuka va txi ta vagondiswa vakwe ve ta pa txirumbi, se va txi womba ka vathu tito: ‘A wukile ngu ka vo fa!’ Makuhu awa ma nga va i di o biha ngutu kupinda o thanga.”

⁶⁵Se Pilato a ti khene kwawe: “Vawoneleti mi navo, tsulani mi ya woneleta nga ti mi ti lavisako tona.”

⁶⁶Sekoko vona va to veka vawoneleti ha diyivani, ve tsanisa dirigwi ngu txixambanyo.