Read chopi Matewu 3 Bible Online

Matewu 3 - chopi bible

Matewu 3

¹Ka ale masiku, ku humelete Johani M'bhabhatisi e txhumayela txiwulani ka Judheya,

² a txi khene: “Hundulukani, nguko wu hafuhi Mfumo wa nzumani.”

³Johani ngene wu a nga wombwa ngu mprofeti Isaya, a txi khene: “Dipswi da wu a huwelelako txiwulani di kha dona: Longiselani nzila ya Mkoma lulamiselani magondo akwe.”

⁴Ene Johani a ti ambate tinguwo to mahwa ngu madhowo a makamelu, e sunga libhande la didhowo txiwununi. Sakudya sakwe i ti humbi ni wulombe wa txitinga.

⁵Se va txi huma veya kwakwe vathu va Jerusalema ni va dotshe ditiko da Judheya ni va wotshe wukhalo wa Jordhani.

⁶Va txi bhabhatiswa ngu ngene mnamboni ka Jordhani, va txi ti tshanza sionho sawe.

⁷Mbimo yi a nga wona Vafarisi ni Vasadhusi va txi lava ku ta bhabhatiswa ngu ngene, a txi khene kwawe: “Lixaka la timamba[1] i mani a nga mi laya, ti to mi thava txiviti txi txi tako kani?

⁸Humisani mihando yi yi dinganako kuhunduluka kwanu;

⁹mi nga ti kanganyiseni mi txi khanu: ‘Hi ni tate wathu Abrahamu’, nguko na mi gela ti to Txizimu txa sikota kuhindula marigwi awa ma txi maha vanana va Abrahamu.

¹⁰ Kambe ndzanga yi vekilwe ha mikolotini ka mindonga. Ngu toneto, mndonga wuhi ni wuhi wu si velekiko mihando ya yinene, wu na gangwa wu tshotshwa ha mndiloni.

¹¹Ani ni bhabhatisa ngu mati kasiku mi sikota kutilaya, kambe awule a tako msana kwangu, ana ni mtamo kupinda ani, se ani kha ni nga ni fanelo yo ñola hambi tikathula takwe. Ene a na mi bhabhatisa ngu Moya wo Sawuleka ni mndilo.

¹²Manzani kwakwe a ni txiselo, a na hiyela txithathe txakwe, se a na sengeleta fulaho yakwe txisangalani, aniko makamba a na ma hisa ngu mndilo wo mbi timeka.”

¹³Sekoko ka yoneyo mbimo, Jesu a tile ngu Galileya e ta manana ni Johani Mubhabhatisi, mnamboni ka Jordhani, kasi ku ta bhabhatiswa ngu ngene.

¹⁴Aniko Johani a to lamba a txi khene: “Ani ngani ni fanelako kubhabhatiswa ngu ngawe, se awe u ta kwangu kani?”

¹⁵Kambe Jesu a to mu xamula a txi khene: “Konakuwa ti leke eto, kulaveka hi txi londetela totshe ti hi fanelako ku ti maha.” Se Johani e mu tumelela.

¹⁶Jesu msana ka kuva a di bhabhatisilwe a to huma ngu matini. Konako, nzuma yi to tuleka, se Jesu e wona Moya wa Txizimu, wu nga ti relela nga dituva txitimwi kwakwe.

¹⁷Sekoko, kupfala dipswi da kuta ngu nzumani, di txi kha dona: “Awuwa i Mwanana wangu wo randeka, awu ni tsakiswako ngutu ngu ngene.”