Read chopi Matewu 4 Bible Online

Matewu 4 - chopi bible

Matewu 4

¹Sekoko Jesu a to yiswa txiwulani ngu Moya wo Sawuleka, kasi a txi ya dukwa ngu Sathani.

²Se na a di ti toni amu ka mune wa magumi a masiku ni mune wa magumi a wusiku, a to pfa nzala.

³Sekoko m'duki a to tshuketa hafuhi kwakwe a txi khene: “Ngako u di Mwanana wa Txizimu, gela marigwi awa ti to me phinduka me maha mapawu.”

⁴Aniko Jesu a mu xamute a txi khene: “Ti bhatwe tito: ‘M'thu kha na kuhanya ngu dipawu dwe, aniko ngu otshe mapswi awa ma wombwako ngu Txizimu.’ ”

⁵Sathani a mu tekile e tsula nayo Didhoropani ko Sawuleka, a txi ya mu veka txiroroni ka Dithepele;

⁶ e mu gela tiya: “Ngako u di Mwanana wa Txizimu, ndaka u txi jatama hahatshi. Nguko ti bhatwe tito:” “Txizimu txi na ruma tingelozi ta txona, ti txi kuwonelela, kasiku ti na ku khamukela manzani ka tona, ti to u si ti dayisi mikondo ha ka dirigwi.”

⁷Se Jesu a to mxamute a txi khene: “Ti bhatwe kambe va txi kha vona: Khu na mbi duka Mkoma Txizimu txako.”

⁸Sathani a to engeta kambe e mteka a txi kwela nayo ka mmango wo lapha ngutu, e mkomba yotshe mifumo ya ditiko, ni tithomba ta yona;

⁹a txi mu gela tiya: “Ni na kuninga sotshe siya, ngako u txi khizama u ni khozela.”

¹⁰Se Jesu a to khene: “Khukha Sathani! Ti bhatwe tito: ‘U na khizamela Mkoma Txizimu txako, ngene ekha u no m'khozela.’ ”

¹¹Ti di mahile eto, Sathani a to khukha e mu leka. Konako tingelozi ti to tshuketa ti ta thumela Jesu.

¹² Ngako Jesu a di engisile ti to Johani a khotetwe, a to khukha e tsula Galileya.

¹³Se ngu msana, a txi khukha Nazareta, a to ya zumba Kapernawume, didhoropa di di ku hafuhi ni linene, ka ditiko da Zebhuloni ni Naftali,

¹⁴Kasi ti txi tatiseka ati ti nga wombwa ngu mprofeti a txi khene:

¹⁵“Ditiko da Zebhuloni ni da Naftali, nzila ya linene, mtxhatuko ka Jordhani, Galileya ka vamatiko;

¹⁶vathu va va nga ti zumbile ditikoni ka kuphuma, va woni liwoningo la hombe; ni ka va va nga ti zumbile ditikoni ka mtsudi wa lifo, ku humelete liwoningo txitimwi kwawe.”

¹⁷ Kukhukhela ka txonetxo txikhati, Jesu a to khata kutxhumayela a txi khene: “Hundulukani, nguko Mfumo wa nzumani wu hokile.”

¹⁸Na a txi tsimbila ngu mabambe ka Linene la Galileya, a to wona vathu vambidi va mkoma ni mnanda, Simoni, a dhanwako ku i Pedro, ni Andreya mnanda wakwe, va nga ti beta tikoka lineneni, nguko i ti vakukuti va sihaka.

¹⁹A to va gela a txi khene: “Ni londiseni, ni na mi maha vakukuti va vathu.”

²⁰Konako va to leka tikoka tawe, ve mu londisa.

²¹Se a txi pinda a txi ya masoni, a to wona vamwani va mkoma ni mnanda kambe, Jakobe, mwanana wa Zebhedhewu, ni Johani mnanda wake, mu ka ngalava, va nga ti rungetela tikoka tawe, kumweko ni tate wawe Zebhedhewu. Se e va dhana.

²²Vona kunukunuko, va to leka ngalava ni tate wawe, ve mu londisa.

²³Msana keto, a to khata kutsimbila ka dotshe ditiko da Galileya, a txi gondisa masinagogani, e txhumayela mahungu a maphya a Mfumo, na a txi hanyisa vathu ka otshe malwati ni ka yotshe mipando.

²⁴Sekoko nduma yakwe yi to pfala kotshelele Siriya. Ve va tisa kwakwe votshe va va nga ti lwala ngu mipando yihi ni yihi, ava va nga txi xaniswa ngu malwati ni simwani sikarato, va madhimoni ni va vo tshanuka, ni silima; se ene a txi va hanyisa votshe.

²⁵Se dibutho da vathu votala di to mu londisela, na va txi humela Galileya ni Dhekapoli ni Jerusalema ni Judheya ni mtxhatuko ka Jordhani.