Read chopi Matewu 5 Bible Online

Matewu 5 - chopi bible

Matewu 5

¹Ngako Jesu a txi wona mabutho a to kwela txitimwi ka mmango. Msana ka kuva a di khalahatshile, vagondiswa vakwe va to mtshuketela hafuhi.

²Se ene a to tula txisofu, e khata ku va gondisa, Jesu a ti khene:

³“Va katekile ava i ku sisiwana moyani, nguko Mfumo wa nzumani mbwawe!

⁴Va katekile ava va dilako, nguko va na thavelelwa!

⁵ Va katekile ava vo thutha, nguko va na mana thomba ya mafu!

⁶Va katekile ava va ku ni nzala ni ditora da wululami, nguko va na khuriswa!

⁷Va katekile ava va ku ni wumbilu, nguko va na mahelwa wumbilu ni vona!

⁸ Va katekile ava va nga basa timbilu; nguko va na wona Txizimu!

⁹Va katekile ava va thumelako kudikha, nguko va na dhanwa ku mbanana va Txizimu!

¹⁰Va katekile ava va xaniswako, ngu kumaha kuranda ka Txizimu, nguko Mfumo wa nzumani mbwawe!

¹¹Mi katekile, ngako va txi mi ruketela ni ku mi xanisa, ni ku mi hembela, ve mi lumbeta makuhu ngu mhaka yangu.

¹²Tsakani ta tinene mi txi nengela, nguko nja hombe hakhelo yanu nzumani. Nguko va va xanisisile toneto vaprofeti va va nga mi thangela.”

¹³“Anu mi m'nyu ka vathu. Ngako m'nyu wu txi guma mtamo, wu na lungwa wona ngu txani kani? Kha wu vhuni txilo kambe, hahanze ka kutheketwa kule, kasi wu na kandetelwa ngu vathu.”

¹⁴ “Anu mi liwoningo ka ditiko. Kha di sikoti kusisala didhoropa di di ku txitimwi ka mmango.

¹⁵ Hambi dilambu kha va di lumekeli ku di khubhunyewa ngu txirundu, aniko va di hayeka txitimwi ka phande, ti to di woninga votshe va va ku nyumbani.

¹⁶Ngu toneto, kwanu ku na woninge masoni ka vathu, kasiku, ngako va txi wona mithumo yanu ya yinene, va na dhumisa Tate wanu a ku nzumani.”

¹⁷“Mi nga alakanyeni ti to ni tete ku ta fuvisa Mlayo wa Mosi mwendo gondo ya vaprofeti. Kha na tela ku ta fuvisa, aniko ni tete ku ta tatisa.

¹⁸ Nguko kha ditshuri na mi gela ku khani: Ku na za ku txi pinda nzuma ni mafu, na txima ku sa pfhutwa ni m'bhalo wawumwewo hambi ni txisesana txidotho txa Mlayo kala totshe ti txi tatiseka!

¹⁹Ngu mhaka yeto, awule a no ndaka wawumwewo ka milayo yileya, hambi i di wa wudotho, a txi gondisa toneto ka vathu, a na va i di wam'dotho ka Mfumo wa nzumani. Aniko awule a veketako milayo, e yi gondisa, a na va i di wa hombe Mfumoni ka nzumani.

²⁰Nguko ani na mi gela ti to ngako anu mi si mahi kuranda ka Txizimu ngu kuthembeka kupinda vabhali ni Vafarisi, kha mi na mbi wulela Mfumoni ka nzumani.”

²¹“Mi ti engisile ati ti nga wombwa ka vakale, va txi kha vona: ‘U nga daye; awule a dayako a fanete kuthethiswa.’

²²Aniko ani ni khani: Awule a henyelako mkwawe a na yiswa kuthethiswani. Awule a rukako mkwawe a txi khene: ‘Txiphukuphuku’ a na ya lamulwa banzani. Ani wule a rukako mkwawe a txi khene ‘Dihundwa’, a na sungwa e rinzwa mndiloni ka Gehena.

²³Ngu toneto, ngako u txi phaxa mhamba yako ha txiluveloni, se u txi khumbuka konaho ti to mkwanu ana ni mhaka ni nawe,

²⁴yi leke konaho mhamba yako txitimwi ka txiluvelo, u thanga ngu kuya khongotelana ni mwananu; se ngu msana, wuya u ta ningela mhamba yako.”

²⁵“Kuluveta u txi divalelana ni wu u phikizanako nayo, u di ngadi ha nzila kumweko nayo, kasiku asi ku ningeli ka mlamuli, awuwa nene a no kuningela ka diphoyisa, se ve kurumela ku khotelwani.

²⁶Ngu ditshuri na kugela ku khani: Eho khu na mbi humiswa kala kuza u txi dihela yotshe male.”

²⁷“Mi ti engisile ati ti nga wombwa va txi kha vona: ‘U nga mahe wugango.’

²⁸Aniko ani ni khani kwanu: Awule a wonetelako wamsikati ngu ku mu navela, se a mahile nayo wugango mbiluni kwakwe.

²⁹Ngako diso dako da txinene di txi kukhuvekisa, di phokonyole, u txi di tshotsha kule ni nawe nguko i txhuko kuluzekelwa ngu txihango txako txa tximwetxo, kupinda kutshotshwa mndiloni ka Gehena wotshe mmidi wako.

³⁰ Ngako diwoko dako da txinene di txi kukhuvekisa, di wile u txi di tshotsha kule ni nawe, nguko i txhuko kuluzekelwa ngu txihango txako txa tximwetxo, kupinda kutshotshwa mndiloni ka Gehena wotshe mmidi wako.”

³¹“Ti wombilwe kambe va txi kha vona: ‘Awule a tovelako msikati wakwe, a na mu ninge dipasi da kum'sengula.’

³²Aniko ani ni khani: Awule a tovelako msikati wakwe, hahanze ka kuva a sa tekana nayo ngu mlayo, a mu mahisa wugelegele; se awule a tekanako ni wu a nga tovelwa, a maha wugango.”

³³“Mi ti engisile kambe ati ti nga wombwa ka vakale va txi kha vona: ‘U nga thuke u tshumelela msana kuxambanyani kwako, aniko veketa ati u nga xambanyela Mkoma.’

³⁴Kasi ani ni khani: Mi nga xambanyeni ni ka kudotho. Mi nga xambanyeni ngu nzuma, nguko njikhalo txa wukoma txa Txizimu.

³⁵Mi nga xambanyeni ngu mafu, nguko njikhigetelo txa mikondo yakwe. Mi nga xambanyeni ngu Jerusalema, nguko ndidhoropa da mfumeli wa hombe.

³⁶U nga xambanye ni ka kudotho ngu msungo wako, nguko khwa ningwa mtamo wa kuhindula hambi msisi wumwewo wu txi maha wo basa mwendo wa mtima.

³⁷Kambe kuwomba-wombani kwanu, ‘Ina’, a nave i di ‘Ina’, ‘Ahim-him’ a nave i di ‘Ahim-him’; totshe ti ti engetelwako ka tiya, ti huma ngu ka m'bihi.”

³⁸“Mi ti engisile atiya ti nga wombwa va txi kha vona: ‘Diso di na dihwa ngu diso, dikwasa, ngu dikwasa.’

³⁹Aniko ani ni khani kwanu: Mi nga lambeleni m'thu wo biha, ngako m'thu a txi ku haphata mpama ka dithama da txinene, tshembereka u txi ningetela dimwani.

⁴⁰Ngako m'thu a txi kumangala ngu kulava ku kutekela dibhaji, mu ninge ni dona dijasi.

⁴¹Ngako m'thu a txi kukurumeta ku mu heleketa mnava wumwewo, mu helekete minava yimbidi.

⁴²Mu ninge awu a ku kombelako, ani wu a lombako txomaha kwako, u nga mtshuralele.”

⁴³“Mi ti engisile ati ti nga wombwa va txi kha vona: ‘U na randa muakelani wako, u txi vengela mlala wako.’

⁴⁴Aniko ani ni khani: Randani valala vanu, mi txi khongelela avale va mi xanisako.

⁴⁵Ngako mi txi maha tiya, mi na va vanana va Tate wanu a ku nzumani; nguko nene wa humisela ditambo vavanene ni vo biha, ni kumaha ti to nzuma yi txi nela vo lulama ni vo mbi lulama.

⁴⁶Nguko, ngako mi txi randa ava va mi randako dwe, ditshungulo muni mi na ku di mana kani? Hi nga toneto va ti mahako ni vona vakhupisi kani?

⁴⁷Ngako mi txi losa vananu vokha, nji txani mi txi mahako txo pala vamwani kani? Ina vamatiko kha va ti mahi toneto ni vona kani?

⁴⁸Ngu kota yeto, mahani vo hetiseka nga ti nene Tate wanu wa nzumani i ku wo hetiseka.”