Read chopi Matewu 6 Bible Online

Matewu 6 - chopi bible

Matewu 6

¹“Ti woneleni ti to mi si mahi mithumo yanu ya yinene masoni ka vathu, kasi kuwonwa ngu vona; ngako mi txi mahisa eto, kha mi na mbi tshungulwa ngu Tate wanu wa nzumani.”

²“Ngu konaho, ngako u txi ha sisiwana, u nga thuke u txi veta mpundu masoni kwako, nga ti va mahako vaxengeteli masinagogani ni tinzilani, kasiku ve dhumiswa ngu vathu. Kha ditshuri ni khani kwanu: Va amukete ditshungulo dawe.

³Aniko awe, u txi ha sisiwana, diwoko dako da txibhabha di nga zive ati ti mahwako ngu di da txinene;

⁴ti to asi u ningako si zumba kusisalani; se Tate wako a wonako kusisalani a na kutshumetela.”

⁵ “Se ngako mi txi khongela mi nga thukeni mi fana ni vaxengeteli va dhundako kukhongela va di emile masinagogani ni mahandakanyani ka tinzila, kasi kuwonwa ngu vathu; kha ditshuri na mi gela ti to va amukete ditshungulo dawe.

⁶Kambe awe, ngako u txi khongela, wulela nyumbani kwako, seka ditimba, u txi khongela ngu malengo ka Tate wako; se Tate wako a wonako ti ti ku kusisalani a na kutshumetela.”

⁷“Ngako mi txi khongela, mi nga tateni mapswi nga vamatiko, nguko va alakanya ti to va na engiswa ngu kuwombawomba ngutu.

⁸Ngu konaho, mi nga fananeni navo, nguko Tate wanu wa si ziva sotshe si mi si pwatako, mi sinzi ku mkombela.”

⁹“Ngu konaho, anu mi na khongelisa tiya: Tata wathu, u ku nzumani, ditina dako di na sawulwe,

¹⁰wu nate kwathu Mfumo wako, ku na mahwe kuranda kwako, amuwa mafuni nga nzumani.

¹¹Hi he nyamsi sakudya sathu sa ditshiku ni ditshiku.

¹²Hi divalele sionho sathu ngako nathu hi va divalelako ava va hi onhelako.

¹³U nga hi leke hi txi wa kudukwani, kambe hi thuse ka m'bihi.” [Ngukuva Mfumo mbwako, ni mtamo ni wudhumo kala kupinduka. Amen.][2]

¹⁴ “Ngako mi txi divalela vathu sionho sawe, Tate wanu wa nzumani a na mi divalela nanu sionho sanu.

¹⁵Aniko ngako mi si divaleli vathu sionho sawe, Tate wanu nene kha na mbi mi divalela sionho sanu.”

¹⁶“Ngako mi txi ti tona sakudya, mi nga kombiseni kuthuvika khoheni, nga vaxengeteli, ava va thuvikako khoheni kwawe, kasiku va na woneka ka vathu ti to va ti tonile sakudya. Kha ditshuri na mi gela ti to va amukete ditshungulo dawe.

¹⁷Aniko awe, mbimo yi u ti tonako sakudya, tola mafura ha msungo kwako, u txi samba khoheni,

¹⁸kasi u si woneki ka vathu ti to u ti tonile sakudya, aniko ti na ziwa ngu Tate wako a ku kusisalani, se Tate wako awu a wonako sa kusisalani, a na kutshumetela.”

¹⁹“Mi nga ti sengeleteleni tithomba ha mafuni, ahawa kubhirela ni sumba si dyako, ni hawa makhokhokho ma dolako ma txi pa.

²⁰Aniko sengeletelani tithomba tanu nzumani, ahawa sumba ni kubhirela si si dyiko, ni hawa makhokhokho ma si doliko ma txi pa.

²¹Nguko ahawa yi ku kona thomba yako, ni mbilu yako yi na va konaho.”

²²“Dilambu da mmidi ngu diso. Ngu konaho, ngako diso dako i di dinene, wotshe mmidi wako wu na tala ngu liwoningo.

²³Aniko, ngako diso dako di di bihile, wotshe mmidi wako wu na va mtemani. Ngu toneto, ngako liwoningo li li ku kwako i di txidema, txidema txa kona txi na va txo kulisa kutxani!”

²⁴“Ku walo m'thu wu a sikotako kuthumela vakoma vambidi, nguko mwendo a na vengela mmweyo e dhunda mmwani, mwendo a na namarela ka mmweyo e kanyisa mmwani. Kha mi na kusikota kuthumela Txizimu ni thomba ya mafu.”

²⁵“Ngu toneto, na mi gela ku khani: Mi nga karatekeni ngu sa kuhanya kwanu, asi mi fanelako kudya mwendo asi mi fanelako kusela, hambi ngu si mi fanelako kuambala ha mmidi kwanu. Kasi kuhanya kha ku pindi sakudya kani? Ni wona mmidi ina kha wu nga ni lisima ngutu kupinda sa kuambala kani?

²⁶Wonani sinyana sa nzumani: Kha si phayi, kha si eluli, kha si sengeleteli txilo txisangalani, aniko Tate wanu wa nzumani wa si dyisa. Ina anu kha mi nga ni lisima kupinda sona kani?

²⁷I mani, hagari kwanu, a sikotako kuengetela kudotho txiemo txakwe[3] kani?”

²⁸“Nji txani mi txi karateka ngu syambalo kani? Pimisani ati ma kulisako tona makhoñwa a txitinga: Kha ma thumi, kha ma luki.

²⁹Aniko na mi gela ku khani: Hambi Solomoni ka wotshe wudhumo wa kufuma kwakwe, kha ambala kufana ni dimwedo ka ona.

³⁰Se ngako koko Txizimu txi txi ambekisa tiya mwasi wa txitingani, awu nyamsi wu hanyako, se mangwana wu no wilwa wu tshotshwa ha mndiloni, ina txi nga lamba ku mi ambeka ngutu anu, vathunu va likholo la lidotho kani?”

³¹“Ngu toneto, mi nga vileleni mi txi khanu: ‘Hi na dya txani kani?’ Mwendo: ‘Hi na sela txani kani?’ Niku mwendo: ‘Hi na ambala txani kani?’

³²(Nguko vamatiko ngu vona va karatekako ngu kulava eso simaha). Kasi anu, Tate wanu wa nzumani wa tiziva ta tinene ti to sotsheso sa laveka kwanu.”

³³“Kukhata, lavani Mfumo wa Txizimu ni kululama ka txona, ani sotshe siya mi na engetelwa.

³⁴Ngu toneto, mi nga karatekeni ngu sa ditshiku da mangwana, nguko ditshiku da mangwana di na ni sikarato sa dona. Ditshiku ni ditshiku di dinganelwa ngu sikarato sa dona.”