Read chopi Matewu 7 Bible Online

Matewu 7 - chopi bible

Matewu 7

¹“Mi nga lamuleni kasiku mi si lamulwi nanu.[4]

² Nguko mi na lamulwa nga ti mi lamulisako tona vamwani; ni mpimo wu mi pimako ngu wona vamwani, mi na pimwa ngu wona nanu.

³Ngu kutxani u txi wona txizokoro txi txi ku disoni ka mkwanu, u si woni mtanda wu wu ku disoni kwako kani?

⁴Mwendo u nga wombawombisa kutxani ka mkwanu u txi khawe: ‘Thutha ni thavisa txizokoro disoni kwako’ kasi mtanda wu ho disoni kwako nawe, kani?

⁵Mxengeteli, thanga ngu kuthavisa mtanda wu, wu ku disoni kwako, ngu kona u no wonisisa ta tinene kuthavisa txizokoro txi txi ku disoni ka mkwanu.”

⁶“Mi nga thukeni mi ninga timbwa silo si si nga sawulwa, hambi kutshotsha tidhayimana tanu ka tikhumba, kasiku ti si ti kandeteli ngu mikondo, ti mi wukela, ti txi mi vhandamulela ngu makwasa.”

⁷“Kombelani, mi na ningwa; lavani, mi na si mana; gogotani, mi na tulelwa.

⁸Nguko mmwani ni mmwani a kombelako, wa ningwa; awu a lavako, wa si mana; ni wule a gogotako, a na tulelwa.

⁹Ngu wuhi m'thu hagari kwanu, a ningako mwanana wakwe dirigwi, ngako a txi mkombela dipawu kani?

¹⁰Mwendo ngako a txi kombela txihaka, a nga mninga mnyoka, kani?

¹¹Ngu konaho, hambi anu mi ku vathu va tshofu mi zivako kuninga sa sinene ka vanana vanu, ngutu-ngutu Tate wanu wa nzumani kha na mbi pindisa kuvaninga sa sinene ava va mu kombelako kani?

¹²Ngu toneto, koko, totshe ti mi ti lavako kuve mi mahela vathu, va maheleni nanu. Awuwa ngu wona Mlayo ni gondo ya vaprofeti.”

¹³“Wulelani ngu txike txo songa, nguko txike txa kuanama ni nzila ya kuanama si yisa kulovani; se mbavangi va wulelako ngu sona.

¹⁴Nguko txike txi songile, ni nzila ya kona yi khwete, ayi yi yisako wutomini, kambe mbadotho va yi manako.”

¹⁵“Ti woneleni ka vaprofeti va makuhu, va tako kwanu va di ambate madhowo a tinvuta, kasi timbiluni kwawe maxolwa ma vhandamulako.

¹⁶Mi na va ziva ngu mihando yawe. Ina mi nga hapha mauvha amu ka tikwakwati, mwendo maxanvu amu ka sihaha kani?

¹⁷Ngu toneto, wotshe mndonga wa wunene wu veleka mihando ya yinene, ani mndonga wo biha wu veleka mihando yo biha.

¹⁸Mndonga wa wunene kha wu sikoti kuveleka mihando yo biha, ni mndonga wo biha kha wu sikoti kuveleka mihando ya yinene.

¹⁹ Mndonga wuhi ni wuhi wu si velekiko mihando ya yinene, wu na gangwa wu vinzwa ha mndiloni.

²⁰Ngu konaho, mi na va ziva ngu mihando yawe.”

²¹“Hi nga votshe vale va wombako kwangu va txi MKOMA, MKOMA ava va no wulela Mfumoni ka nzumani, aniko ngu wule a mahako kuranda ka Tate wangu a ku nzumani.”

²²“Ka edo ditshiku vavangi va nata womba kwangu va txi kha vona: MKOMA, MKOMA, ina athu kha ha profeta ngu ditina dako kani? Ina kha ha tovela madhimoni ngu ditina dako kani?’

²³ Konaho, ani ni nata va gela ha kubasani ni txi khani: ‘Txima kha na mi ziva; hambukani kule ni nani, anu vamahi va sionho.’ ”

²⁴“Ngu toneto, awu a engisako mapswi angu e ma veketa, a fana ni m'thu wo txhariha, a nga aka nyumba yakwe txitimwi ka dirigwi.

²⁵Se nzuma yi nite, minambo yi nje kutala kuva ni ndambi, txingulu txi peka ngu mtamo txitimwi ka nyumba yile, aniko kha ya wa, nguko yi aketwe txitimwi ka dirigwi.”

²⁶“Kasi awule a engisako mapswi angu, a txi lamba ku ma maha, a fana ni m'thu wa dibhemba a nga aka nyumba yakwe ha divhunyeni.

²⁷Se nzuma yi nite, minambo yi tala kuva ni ndambi, txingulu txi peka ngu mtamo txitimwi ka nyumba yile, se yona yi khundumuka yi txi wa. Kuwa ka yona yi wisa manyala.”

²⁸ Mbimo yi Jesu a nga gwita kuwombawomba timhaka tiya, mabutho ma to xamala ngutu ngu kugondisa kwakwe.

²⁹Nguko a ti ti va gondisa kufana ni m'thu wu a ku ni wukoma, asi fani ni vabhali.