Read chopi Matewu 8 Bible Online

Matewu 8 - chopi bible

Matewu 8

¹Ku ti ngako Jesu a txi relela ngu mmangoni, mabutho a vathu votala ma to mu londisa.

²Sekoko a txi ta kwakwe m'thu wa tshekela,[5] a txi mu khizamela a txi khene: Mkoma ngako u txi ti lava, u na ni mtamo wa ku ni basisa.”

³Sekoko Jesu a to nawuluta dianza dakwe a txi mu gwesa, a txi khene: “Na ti lava, basiswa awe.” Kunukunuko a to basiswa ka tshekela yakwe.

⁴Jesu a txi khene kwakwe: “Ti wonele, u nga gele m'thu, aniko tsula u txi ya ti kombisa ka mphaxeli, u txi humisa mningelo wu wu nga emiswa ngu Mosi, kasi ku na maha wufakazi kwawe.”

⁵Ngako Jesu a di wulete Kapernawume, nduna ya dizana yi to mtshuketela yi txi mkombela,

⁶yi txi kha yona: Mkoma txithumi txangu txi otete nyumbani, txi to tsotsowolo kuoma sihango txa xaniseka ngutu.”

⁷Jesu a to khene kwakwe: “Ni nata ni ta mu hanyisa.”

⁸Aniko nduna ya dizana yi to xamula yi txi kha yona: Mkoma kha ni fanelwi ngu ti to awe u txi wulela nyumbani kwangu, aniko womba dipswi dimwedo kugwita, se txithumi txangu txi na hanya.

⁹Nguko nani ni m'thu wu ni fumwako, na ni di ni masotxhwa, ni ma fumako nani, se ni txi womba ka mmweyo ni txi khani: ‘Tsula’ ene wa tsula; ni txi ka mmwani: ‘Ngono’ ene wata; ni ka txithumi txangu, ni txi khani: ‘Thuma tiya’ ene wa ti thuma.”

¹⁰Ngako Jesu a di pfite tiya, a to xamala, a txi khene ka vava va nga txi mu londisa: “Kha dithuri, na mi gela, ni khani: Kha na mana likholo la hombe lo nga liya, hambi hagari ka va ka Israyeli.

¹¹ Aniko na womba kwanu, ni khani; mbavangi va nota ngu wutxani ni mswa-ditambo, va ta zumba ha sakudyani ni Abrahamu ni Isaake ni Jakobe Mfumoni ka nzumani.

¹²Kambe vanana va Mfumo va na tshotshwa hahanze mtemani, ahawa ku no va ni tihuwa ni kugegeresela ka makwasa.”

¹³Sekoko Jesu a to khene ka nduna ya dizana: “Tsula, ti na maheke kwako, nga ti u kholwisako tona.” Se txithumi txakwe txi to hanyiswa ngu yona yile mbimo.

¹⁴Se ngako Jesu a di bwakile nyumbani ka Pedro, a to ya mana mkokati wa Pedro a di otete, a txi lwala ngu txindeyandeya.

¹⁵Jesu a to mu gwesa diwoko dakwe, se txindeyandeya txi to huma, ene e wuka a txi va thumela.

¹⁶Ni minova va to neha kwakwe vavangi, ava va nga ti ni madhimoni, se ene a to ma tovela ngu dipswi dakwe, e hanyisa votshe va va nga ti lwala;

¹⁷Kasi kutatiseka ati ti nga wombwa ngu mprofeti Isaya, a txi khene: “Ene a tekile sikarato sathu, a txi rwala ni malwati athu.”

¹⁸Ngako Jesu a txi wona dibutho da hombe da vathu, va nga ti mu randete, a to gela vagondiswa ti to va txi pinda va txi ya mtxhatuko ka digova.

¹⁹Se m'bhali mmweyo a to ta kwakwe, a ta khene: “M'gondisi, hayi ni hayi u no ya kona, ni na kulondisa.”

²⁰Jesu a ti khene kwakwe: “Vanyapwe va ni mikele, ni sinyana sa nzuma si ni sisaka, kambe Mwanana wa M'thu kha na wukhalo wuwa a khigetako ka wona msungo wakwe.”

²¹Se mmwani wa vagondiswa vakwe a to khene kwakwe: Mkoma ni tumelele ni thanga ngu kuya tshotsha tate wangu.”

²²Aniko Jesu a to khene kwakwe: “Ni londise, u txi leka vafi va txi tshotsha vafi vawe.”

²³Ngako a di wulete ngalavani, vagondiswa wakwe va to wulela ni vona ngalavani kumweko nayo.

²⁴Se ku to dhuka ku txi huma txihuhuri txa hombe lineneni, ahawa ka kuza mavimbi ma txi lava kukhubhunyeta ngalava; aniko Jesu a ti otete.

²⁵Vagondiswa vakwe va to mtshuketela, va txi mu wusa va txi kha vona: Mkoma hi hulukise, ha lova.”

²⁶Se Jesu a to khene kwawe: “Anu vathu va kukholwa ka kudotho, mi ni dizowa ngu txani kani?” Sekoko a to khukha a txi ema, e dhusa txihuhuri ni linene; ngu msana keto, ku to tenga ngutu.

²⁷Se vathu va to xamala va txi kha vona: “I m'thu muni wuwa wa ku hambi txihuhuri ni linene si txi mu engisa kani?”

²⁸Ngako a di hokile mtxhatuko ka digova, ditikoni ka Gadhara, a to hingetwa ngu vathu vambidi, va nga ti ni madhimoni, na va txi huma ngu mayivani; i ti vo thisa ngutu, ti to ni m'thu wammweyo asi tsani kupinda ngu nzila yile.

²⁹Vona va to peka huwa va txi kha vona: “I mhaka muni hi ku nayo ni nawe, Jesu Mwanana wa Txizimu kani? U tile hawa ku ta hi xanisa, yi sinzi kuhoka mbimo kani?”

³⁰Se, kule nyana navo, ku ti ti ho mtxhambi wa hombe wa tikhumba, ti nga ti ti dya.

³¹Madhimoni ma to mkombela, ma txi kha ona khene: “Ngako u txi hi tovela hawa, hi rumele hi txi ya wulela mtxhambini ka tikhumba.”

³²Jesu a nje khene ka ona: “Tsulani!” Se ona ma to huma me ya wulela mtxhambini ka tikhumba. Se mtxhambi wotshe wu to tutumela mkovani ka linene, wu so ya vhoma matini wu txi lova.

³³Vadyisi va tikhumba va to tutuma ve tsula m'tini veya xawutela totshe, ngutu-ngutu atiya ti nga humelela ka va va nga ti ni madhimoni.

³⁴Se votshe vathu va didhoropa va to huma va txi hingeta Jesu; se ngako va di mu woni, va to mkombela ti to e khukha ditikoni kwawe.