Read chopi Marku 1 Bible Online

Marku 1 - chopi bible

Marku 1

¹Makhato a Evhangeli ya Jesu Kristu, Mwanana wa Txizimu.[1]

²Nga ti ti nga bhalwa ngu mprofeti Isaya, a nga khene: “Wona, na ruma masoni kwako mtumi wangu, awu wu no longisa nzila yako.”

³Nga ti ti nga bhaliswa tona dibhukuni ka Mprofeti Isaya, a nga khene: “Dipswi da wule a kwangulako txiwulani di kha dona: ‘Longisani nzila ya MKOMA, lulametani maphango akwe.’ ”

⁴Se ene a to tsimbila ka dotshe ditiko da Jordhani, a txi txhumayela txibhabhatiso txa kuhunduluka, kasiku ve mana divalelo ya sionho.

⁵Dotshe ditiko da Judheya ni votshe vathu va Jerusalema va ti ti ya kwakwe, veya bhabhatiswa votshe mnamboni ka Jordhani, va txi ti tshanza sionho sawe.

⁶Johani a ti ambate didhowo da dikamelu, e ti sunga txiwunu ngu libhande la didhowo, a txi dya humbi ni wulombe wa txitinga.

⁷A ti txhumayela a txi khene: “Msana kwangu, wata mmwani, awu a ku ni mtamo kupinda ani, awu ani ni si nga ni fanelo hambi ya kunama masoni kwakwe ni thukunyula tingoti ta tikathula takwe.

⁸Ani ni mi bhabhatisa ngu mati, aniko ene a nata mi bhabhatisa ngu Moya wo Sawuleka.”

⁹Ka oneyo masiku, Jesu a tile ngu Nazareta ka Galileya, a ta bhabhatiswa ngu Johani, mnamboni ka Jordhani.

¹⁰Mbimo yi a nga txi huma ngu matini, a to wona nzuma yi txi tuleka, se Moya wo Sawuleka wu txi txhika nga txituvani txitimwi kwakwe.

¹¹Ku to huma dipswi da kuta ngu nzumani, di txi kha dona: “Awe u Mwanana wangu wo randeka ngutu, awu ni mu tsakelako.”

¹²Se konako Moya wo Sawuleka wu to yisa Jesu txiwulani.

¹³Ene a ti ya fungala mune wa magumi a masiku txiwulani, a txi dukwa ngu Sathani. A ti ti hanya hagari ka sihari sa txitinga, se tingelozi ti txi mthumela.

¹⁴Ku ti ngako Johani a di khotetwe mkorani, Jesu a to ya Galileya, eya txhumayela Evhangeli ya Txizimu, a txi khene:

¹⁵ “Mbimo yi tatisekile, se Mfumo wa Txizimu wu hafuhi. Hundulukani mi txi kholwa ka Evhangeli!”

¹⁶Ngako a txi tsimbila hafuhi ni Linene la Galileya, a to wona Simoni ni mwanawe Andreya, va txi beta tikoka tawe lineneni, nguko i ti vadoti va sihaka.

¹⁷Jesu a to va gela a txi khene: “Ni londiseni, ni na mi maha vadoti va vathu.”

¹⁸Kunukunuko, vona va to leka tikoka tawe, ve mu londisa.

¹⁹Se ngako a txi ya masoni, a to wona Jakobe, mwana Zebhedhewu, ni Johani, mwanawe, va di mu ngalavani, va txi rungetela tikoka tawe.

²⁰Kunukunuko ene a to va dhana. Vona va to siya tate wawe Zebhedhewu kumweko ni sithumi mu ngalavani ve mu londisa.

²¹Se va to wulela Kapernawume. Ngu ditshiku da Sabbata, Jesu a to wulela disinagogani, a txi gondisa.

²² Kambe va ti xamala ngu gondo yakwe, nguko a ti va gondisa nga wu a ku ni mtamo, asi fanani ni vabhali.

²³Sekoko, a ti ti ho, kona disinagogani mule kwawe, m'thu wu a nga ti wuleletwe ngu moya wa nzambwa, awu a nga kwangula a txi khene:

²⁴“Nji txani u ku natxo ni nathu, Jesu wa Nazareta kani? U tela ku ta hi lovisa kani? Ani na kuziva ti to ngawe mani: U Msawuleki wa Txizimu.”

²⁵Aniko Jesu a to wu dhusa a txi khene: “Malala, u txi huma keyo m'thu!”

²⁶Sekoko moya wa nzambwa, msana ka ku mu zuzazuza, wu to peka huwa wu txi huma ka m'thu wule.

²⁷Se votshe va txi diwuka ngutu, va txi wotisana va txi kha vona: “Nji txani txiya kani? I gondo ya yiphya! Hambi mimoya ya nzambwa ene a yi dhusa ngu mtamo, yi txi mu engisa!”

²⁸Kunukunuko nduma yakwe yi to hangalaka ka otshe makhalo a Galileya.

²⁹Mbimo yi Jesu a nga huma ngu disinagogani, a to tsula kumweko ni Jakobe ni Johani nyumbani ka Simoni ni Andreya.

³⁰Mkokati wa Simoni a ti otete ha ditahoni, ngu kulwala ngu txindeyandeya, se ve kuluveta ve mu wombela ka Jesu.

³¹Sekoko ene a to tshuketa a txi mñola ngu diwoko a txi mu wusa; txindeyandeya txi to mu leka, se ene e khata ku va thumela.

³²Minovani ka kona, mbimo yi di nga swa ditambo, va to tisa ka Jesu votshe valwali ni va va nga ti ni madhimoni.

³³Vathu va dotshe didhoropa va ti ta sengeletana ha txikeni.

³⁴A hanyisile valwali va nga txi karatwa ngu mipando yo hambana, a txi tovela madhimoni amangi. Kambe asi tumeli ti to madhimoni me womba-womba, nguko ona ma ti m'ziva.

³⁵Ni mixo, ku di ngadi phum, a to huma nyumbani eya ka wukhalo wa ekhalela, a txi ya khongela kona.

³⁶Kambe Simoni ni va a nga ti navo va to mu londisa.

³⁷Mbimo yi va nga mu mana, va mgete va txi kha vona: “Votshe va kulava.”

³⁸Ene a to va xamula a txi khene: “He tsuleni ka wumwani wukhalo, he tsuleni ka miti yile ya hafuhi, hi txi ya txhumayela kona, nguko ni tete toneto.”

³⁹ Ene a to tsimbila ngu dotshe da Galileya, a txi txhumayela masinagogani, a txi tovela madhimoni.

⁴⁰M'thu wa tshekela a to ta kwakwe, e ta khizama a txi mkombela, a txi khene: “Ngako u txi ti lava, u nga ni basisa.”

⁴¹Jesu, ngu kutalelwa ngu wumbilu a to nawuluta diwoko a txi m'gwesa, a txi khene kwakwe: “Na ti lava. Basiswa.”

⁴²Kunukunuko tshekela yi to mu leka, ene a txi sala a di basile.

⁴³Jesu a to tekela ku mlaya ngutu, a txi mtsutisa ngu kukuluveta,

⁴⁴a txi khene kwakwe: “U nga thuke u txi womba txilo ka m'thu, aniko tsula u txi ya ti kombekisa ka mphaxeli, u txi maha mningelo wa kubasiswa kwako, kota nga kuruma ka mlayo wu wu nga leletwa ngu Mosi, kasi kumaha wufakazi kwawe.”

⁴⁵Kambe ene, neti a nga huma, a to khata kuhuwelela, asi malali, e hangalasa mahungu ale, se Jesu e tandeka ni kuwulela ka m'ti wuhi ni wuhi, na ti txi ziwa; aniko a ti zumbela hahanze, ekhalela, se vathu ve huma ngu ka otshe makhalo ve ta kwakwe.