Read chopi Marku 10 Bible Online

Marku 10 - chopi bible

Marku 10

¹Jesu ku ti ngako a di khukhile koneho, eya ditikoni ka Judheya, mtxhatuko ka Jordhani, vathu vavangi va to ta sengeletana kwakwe.

²Vafarisi va to tshuketela hafuhi kwakwe va txi mu wotisa, ngu ku mu duka, va txi kha vona: “Ina wamwamna a nga sikota kutovela msikati wakwe kani?”

³Ene a to angula a txi khene “Mosi a mi layisile kutxani?”

⁴Vona va ti kha vona: “Mosi a hi tumelete kubhala dipasi da kuhambana ni msikati ni ku mu tovela.”

⁵Jesu a nje khene kwawe: “Mosi a mi vekete mlayowo nguko mi ku vathu va timbilu ta kubanga.

⁶Kambe kukhatani Txizimu txi va vangile mwamna ni msikati.

⁷Ngu toneto, wamwamna a na siya tate wakwe ni mame wakwe a txi namarela ka msikati wakwe;

⁸se va na maha nyama yimweyo ngu wumbidi wawe; ngu toneto hi nga ngadi vambidi, vo va i di mmidi umwewo.

⁹Ngu toneto, asiya Txizimu txi nga si tshanganisa m'thu a nga thuke a txi si abanisa.”

¹⁰Se ngako va di m'tini, vagondiswa va to engeta ve mu wotisa mhaka yiya.

¹¹Jesu a va xamute a txi khene: “Awule a tovelako msikati wakwe e tekana ni mmwani, a maha wugango wa kuhoxela wule wo khata.

¹²Ngako wamsikati a txi tovela mwamna wakwe, a txi tekana ni mmwani, a maha wugango.”

¹³Vathu va to mu tisela sivananana kasiku e si gwesa, kambe vagondiswa va to va tsimbisela.

¹⁴Aniko Jesu, mbimo yi a nga wona tiya, a to henya, a txi khene: “Lekani sivananana si txi ta kwangu, mi nga si tsimbiseni, nguko Mfumo wa Txizimu wu lumba ava vo nga tiya.

¹⁵ Kha ditshuri na mi gela ku khani: Awule asi amukeliko Mfumo wa Txizimu nga mwanana, txima kha na mbi wulela ka wona.”

¹⁶Konako a to si singarela a txi si sanzeka manza, a txi si katekisa.

¹⁷Mbimo yi Jesu a nga huma a txi goxometa nzilani kwakwe, m'thu wokari a to tutuma a ta mu khizamela, a txi mu wotisa a txi khene: “M'gondisi wamnene, nji txani ni fanelako ku txi maha, kasiku ni mana thomba ya wutomi wo mbi guma kani?”

¹⁸Jesu a to mu angula a txi khene: “I mhaka muni u txi ni womba ti to ni wamnene kani? Kha nga ho wu i ku wamnene, hahanze ka Txizimu.

¹⁹ Wa yi ziva milayo yi yi ku: ‘U nga daye, u nga mahe wugango, u nga pe, u nga lumbete, u nga dyelele, thava tate ni mame.’ ”

²⁰Ene a to mu xamula a txi khene: “M'gondisi, totsheleleto ani ni ti veketile, kukhukhela ha wananani kwangu.”

²¹Konaho Jesu a to gula maso a txi mu wonisisa ngu ku m'dhunda, se a txi mu gela tiya: “U pwatekelwa ngu txilo tximwetxo dwe: Tsula u txi ya xavisa sotshe si u ku naso, u txi ningela ka sisiwana. U na mana thomba nzumani. Se ngono u txi ni londeta.”

²²Aniko m'thu wule a to thuvika khohe ngu kuengisa mapswi awa, a txi khukha e tsula ngu kupandiseka, nguko i ti nyatithombe.

²³Sekoko Jesu a to rumaruma, e gela vagondiswa vakwe a txi khene: “Ta karata ngutu ta tinene kuwulela Mfumoni ka Txizimu avale va ku ni tithomba.”

²⁴Vagondiswa va to xamala ngutu ngu mapswi akwe. Kambe Jesu a to engeta a txi khene: “Vanavangu, ti karatile ngutu kuwulela Mfumoni ka Txizimu!

²⁵Ta hehuka kuwulela dikamelu ka ditshoko da txhingani, kupinda kuwulela nyatithombe Mfumoni ka Txizimu.”

²⁶Se vona ve xamala ngutu ka kupindisa, va txi wotisana ngu txawe, va txi kha vona: “Se i mani a no sikota kuhuluka kani?”

²⁷Ngako ene a di gute maso a txi va wonisisa, a to va angula a txi khene: “Ka vathu, eto kha ti koteki, aniko ka Txizimu ta koteka, nguko ka Txizimu totshe ta koteka.”

²⁸Pedro a to angula a txi khene: “Hinga wona, athu hi lekile sotshe, hi txi kulondetela.”

²⁹Jesu a to xamula a txi khene: “Kha ditshuri na mi gela: Kha ku nga ho m'thu wu a nga leka nyumba, vanawe, tindiyakwe, mame, tate, vanana mwendo tithembwe, ngu mhaka yangu ni ngu mhaka ya Evhangeli,

³⁰awu a no mbi amukela, ka txona txikhati txa nyamsi, 100 da tinyumba, da vanawe, da tindiya, da vamame, da vanana mwendo da tithembwe, kumweko ni sixaniso; se ka txhikhati txi txi tako, wutomi wo mbi guma.

³¹ Kambe vavangi vo thanga va na va va magwito, se va magwito va na va vo thanga.”

³²Ngako va di ngadi ha nzila, va txi kwela kuya Jerusalema, Jesu a to thangela masoni kwawe. Vona va ti xamala, ve mu londetela na va txi thava. Se ene a to engeta eya phuho ni va digumi ni vambidi a txi khata ku va gela ati ti no mu humelela, a txi khene:

³³“Wonani, hi kwelela Jerusalema, se Mwanana wa M'thu a na ningelwa ka vaphaxeli va hombe ni ka vabhali. Vona va na mu avanisela lifo ve mningela ka vamatiko.

³⁴Va na mu poyilela ve mu thurela lure, ve mu kwapela ni ku m'daya, aniko msana ka masiku mararu, a na tshumela a txi wuka.”

³⁵Jakobe ni Johani, vanana va Zebhedhewu, va to tshuketela Jesu va txi mu angula ngu mapswi awa: “M'gondisi, hi lava ku u txi hi mahela ati hi no kukombela.”

³⁶Jesu a to wotisa a txi khene: “Kasi mi lava ni txi mi mahela txani?”

³⁷Vona va mu xamute va txi kha vona: “Hi tumelele ti to mmweyo wathu u txi mu khalahatshisa txineneni kwako, mmweyo u txi mu khalahatshisa txibhabha kwako, wudhumoni kwako.”

³⁸Jesu a to va xamula a txi khene: “Kha mi txi zivi txi mi kombelako txona. Ina mi nga sikota kusela ka digombe da wuvi adi ani ni no sela dona, ni kuamukela txibhabhatiso txi ani ni no txi amukela kani?”

³⁹Se vona ve xamula va txi kha vona: “Ina! Hi nga sikota.” Se Jesu a nje khene kwawe: “Digombe di ani ni no sela ka dona, na nanu mi na di sela, ni txibhabhatiso txi ni no txi amukela, na nanu mi na txi amukela.

⁴⁰Kambe kukhalahatsha txineneni kwangu, mwendo txibhabha kwangu, eto kha ti nga mtamoni kwangu, ti lumba avale va nga longiselwa tona.”

⁴¹Mbimo yi va nga tiengisa ava va digumi, va to khata kuhenyela Jakobe ni Johani.

⁴²Jesu a to va dhana a txi va gela ku khene: “Ma tiziva ti to avale va dhanwako ku mbafumeli va matiko, va fuma ngu mitamo, madhota a kona ma tsotsorola vathu.

⁴³Kambe kha ti laveki eto hagari kwanu. Awule a lavako kumaha wa hombe hagari kwanu, a na ti mahe txithumi txanu,

⁴⁴ani wule a lavako kumaha mthangeli a na ti mahe txithumi txa votshe.

⁴⁵Nguko Mwanana wa M'thu kha tela ku ta thumelwa, a tete ku ta thumela vamwani, ni kuningela wutomi wakwe, kasi ku na tirula vavangi.”

⁴⁶Va to hoka Jeriko. Se ngako Jesu a txi huma ngu Jeriko ni vagondiswa vakwe ni dibutho da vathu votala, Bhartimewu, mwanana wa Timewu, awu i nga ti dibhofu da kuzumba ha nzila a txi kombela,

⁴⁷ngako a di engisile ti to awule a pindako i Jesu wa Nazareta, a to khata kukwangula a txi khene: “Jesu Mwanana wa Dhavhidha, hinga ni mahela wumbilu.”

⁴⁸Vavangi va ti ti mu kawuka va txi a na malale, kambe ene a so tamarisa a txi kwangula ngu mtamo a txi khene: “Mwanana wa Dhavhidha, hinga ni mahela wumbilu!”

⁴⁹Se Jesu a to ema, a txi khene: “M'dhaneni!” Vona va to m'dhana wule wa dibhofu, va txi mu gela va txi kha vona: “Tsana msana, khukha, ene wa kudhana!”

⁵⁰Ene a to tshotsha nguwo yakwe, a so lepu a ya ka Jesu.

⁵¹Jesu a to mu wotisa a txi khene: “U lava ni txi ku mahela txani kani?” Wa dibhofu a to angula a txi khene: “M'gondisi, maha ti to ni tshumela ni wona.”

⁵²Jesu a to mu gela a txi khene: “Tsula, likholo lako li ku hanyisile.” Konaho, a to tshumela e mana kuwona, se e mlondisa nzilani.