Read chopi Marku 11 Bible Online

Marku 11 - chopi bible

Marku 11

¹Ngako va txi tshuketela Jerusalema, hafuhi ni Bhetfage ni Bhetaniya, mmangoni ka Miolivha, Jesu a to rumela vambidi ka vagondiswa vakwe,

²a txi va gela a txi khene: “Tsulani ka m'ti wule wu ku masoni kwanu. Mbimo yi mi no wulela, mi na ya mana tximbongolana txi di sungilwe, atxi txi sinziko kugadhwa ngu m'thu. Txi thukunyuleni mi wuya natxo.

³Ngako m'thu wokari a txi mi wotisa tito, ‘Mi txi thukunyulela txani’, mi na khanu: ‘Mkoma ngene a txi lavako, a na kuluveta ku txi tshumeta txi wuya kona hawa.’ ”

⁴Vona va to tsula veya mana tximbongolana hahanze, txi di sungilwe masoni ka ditimba, hafuhi ni nzila, se ve txi thukunyula.

⁵Vathu va va nga ti ti ho kona hale, va to va wotisa va txi kha vona: “Mi thukunyulela txani txibongolanetxo kani?”

⁶Vona va to xamula kota nga ti Jesu a nga va gelisa tona, se ve va leka ve tsula.

⁷Sekoko, va to neha tximbongolana ka Jesu; ve kapekela tinguwo tawe txitimwi ka txona, se Jesu e txi gadha.

⁸Vathu vavangi va txi ateta tinguwo tawe ha nzila, vamwani va txi veketela matshanzu awa va nga ti gangete tithembweni.

⁹ Ava va nga ti thangete masoni kwakwe ni va va nga ti londetela ngu msana, va txi kwangula va txi kha vona: “Hozana! A na dhumiswe awule a tako ngu ditina da Mkoma!

¹⁰Wu katekile Mfumo wu wu tako wa tate wathu Dhavhidha. Hozana txitimwi ka txitimwi nzumani!”

¹¹Se Jesu a to wulela Jerusalema ni mu Dithepeleni. Ngako a di rumarumile sotshe, ni kuwa kambe di nga ti swite, a to huma eya Bhetaniya kumweko ni va digumi ni vambidi.

¹²Mangwanani ka kona, ngako va txi huma ngu Bhetaniya, ene a to pfa nzala.

¹³Ngako a txi wona, a di kule, mndonga wa mkuwu, awu wu ku ni mazokoro, a to hambuka eya wona ku mwendo a nga mana txo maha ka wona, aniko ngako a di hokile ka wona, kha mana txilo hahanze ka ona mazokoro dwe, nguko i nga si nga mbimo ya makuwu.

¹⁴Se Jesu a to womba ka mkuwu, a txi khene: “Kukhukhela konkuwa, ku nga ve ni m'thu wu a dyako mihando yako kala kupinduka.” Vagondiswa vakwe va ti tipfa.

¹⁵Se ve hoka Jerusalema. Ku ti ngako Jesu a di wulete Dithepeleni, a to khata kutovela ava va nga ti xavisa ni va va nga ti xava Dithepeleni. A to khubhunyeta timeza ta vatxitxi va male ni sikalo sa vaxavisi va situvane.

¹⁶Se a ti si tumeleli m'thu kutshawunyeta Dithepele a di rwate somaha.

¹⁷Se a to va gondisa a txi khene kwawe: “Ina kha ka bhalwa tito: ‘Nyumba yangu yi na dhanwa ku i nyumba ya kukhongela ka otshe matiko kani?’ Kasi anu mi yi maha mkele wa makhokhokho.”

¹⁸Kambe vaphaxeli va hombe ni vabhali, ngako ve mu pfa na a txi womba tiya, va to lava marindi ya tiya va no m'dayisa tona, kambe va to mu thava, nguko dibutho dotshe di ti xamala ngu kugondisa kwakwe.

¹⁹Ku ti ngako di di swite, a to huma didhoropani.

²⁰Ni mixo, ngako va txi pinda, va to wona mndonga wa mkuwu wu di omile wotshe, kukhukhela mikolotini.

²¹Pedro a txi alakanya a txi khene kwakwe: “M'gondisi, wona mndonga wuwa wa mkuwu, u nga wu ruketela, wu omile.”

²²Jesu a to xamula a txi khene kwawe: “Vanani ni likholo ka Txizimu!

²³Kha ditshuri ni khani kwanu: Mmwani ni mmwani a no womba ka txitunga txiya, a txi khene: ‘Khukha u ya ti rinza lineneni’, na asi kanakani mbiluni kwakwe, kambe a txi kholwa ti ta ku ati a ti wombako ti na maheka, a na mahelwa tona.

²⁴Ngu konaho ni khani kwanu: Sotshe si mi si kombelako ngu kukhongela, tumelani ti to mi si amukete, si na va sanu.

²⁵ Kungako mi txi ema mi khongela, divalelani wu mi ku ni mhaka nayo, ti to nene Tate wanu wu a ku nzumani, e mi divalela kuonha kwanu.

²⁶[Aniko, ngako mi si divaleli vamwani, nene Tate wanu wu a ku nzumani, kha na mbi divalela sionho sanu.”]

²⁷Se va to engeta veya Jerusalema. Ku ti ngako va txi tsimbila-tsimbila amu Dithepeleni, vaphaxeli va hombe ni vabhali ni madhota va to ta kwakwe,

²⁸va ta mu wotisa, va txi kha vona: “I mtamo muni u mahako ngu wona tiya kani? Mwendo i mani a nga kuninga mtamo wa kumaha tiya kani?”

²⁹Jesu a to va xamula a txi khene: “Anani ni na mi wotisa mhaka yimweyo. Ni xamuleni, se nani ni na mi gela amuwa wu tako ngu kona mtamo wuwa ni mahako ngu wona atiya.

³⁰Mtamo wa kubhabhatisa ka Johani wuta ngu nzumani mwendo wuta ngu ka vathu kani? Ni xamuleni.”

³¹Vona va to womba-womba ngu txawe va txi kha vona: “Hi txi khathu wuta ngu nzumani, a na khene: ‘Ngu kutxani mi nga mbi kholwa kwakwe kani?’

³²Aniko, ngako hi txi khathu: ‘Wu ta ngu ka vathu!’ ” Va ti thava vathu, nguko votshe va ti kha vona, ngu ditshuri, Johani mprofeti.

³³Se va to mu xamula Jesu va txi kha vona: “Kha hi ti zivi.” Konaho Jesu a to xamula, a txi khene kwawe: “Nani kha ni na mbi mi gela mtamo wu ni mahako ngu wona tiya.”