Read chopi Marku 12 Bible Online

Marku 12 - chopi bible

Marku 12

¹Se a to khata kuwombawomba kwawe ngu sidinganiso, a txi khene: “M'thu a to phaya mivhinya e mi ranganyeta ngu libhiyo, a txi kelela nzeka yo kamela ka yona mihando, e aka txitezi. Msana keto, a to yi ningela ka vadimi, se ene e teka dipfhumba.

²Ngu mbimo ya kona, a to ruma txithumi ka vadimi ti to txi ya amukela mitxelo ya mivhinya.

³Kambe vona va to mñola, ve mu peka, se ve mu tshumeta asi na txilo.

⁴A to engeta e ruma tximwani txithumi kwawe. Aniko nene va to mu balisela msungo, va txi mu wisa tingana.

⁵A to engeta e va rumela mmwani; aniko eyo va to so m'daya. Se e ruma vamwani votala, ku txi pekwa vamwani, vamwani ve dawa.

⁶Kambe ngu kuva a di ngadi ni mwanana wammweyo, awu a randekako, nene a mu rumile kwawe, ngu kugwitisa, a txi khene: ‘Va na thava mwanana wangu.’

⁷Aniko vadimi va to langana, va txi kha vona: ‘M'dyi wa thomba ndiyo! Ngonani hi ta m'daya, thomba yi na maha yathu.’

⁸Se ve mñola, ve m'daya, ve mu tshotsha hahanze ka thembwe ya mivhinya.

⁹Nyamne wa thembwe a na maha txani kani? A nata a ta fuvisa vadimi, se thembwe ya mivhinya a na yi ningela ka vamwani.

¹⁰Kha mi nzi kugonda mibhalo yi yi ku: ‘Dirigwi diya vaaki va ngadi nyenya, ngu dona di nga mahwa da hombe do tsanisa.

¹¹Eto ti mahilwe ngu MKOMA, ina i mhaka yi yi xamalisako masoni kwathu kani?’ ”

¹²Va ti lava ku mñola, aniko ve thava dibutho ngukuva va di ti pfite ti to a womba-womba ngu vona ka txidinganiso txiya. Se ve mu leka, ve tsula.

¹³Se va to rumela Vafarisi vokari ni va ka Herodha, ka Jesu kasi ku mu bzweta ngu mapswi.

¹⁴Vona va to ta kwakwe va txi kha vona: “M'gondisi, ha tiziva ti taku u womba ti ti nga tsana ni ti taku khu thavi m'thu, nguko khu sawuli tikhohe ta vathu; aniko u gondisa nzila ya Txizimu ngu ditshuri. Ina hi na ni fanelo yo humisa mkhupo ka Khezari mwendo hi nga tona kani? Ha khupa mwendo kha hi khupi kani?”

¹⁵Sekoko ene, ngu kuziva kukanganyisa kwawe, a ti khene kwawe: “Mi ni dukela txani kani? Ni neheleni didhenari ni di wona.”

¹⁶Vona va to di neha. Se ene a txi khene kwawe: “Txifaniso txiya ni m'bhalo wuwa, nza mani kani?” Va txi kwakwe: “Nza Khezari.”

¹⁷Se Jesu e va xamula a txi khene: “Tshumetelani Khezari, asi i ku sa Khezari, ni Txizimu asi i ku sa Txizimu.” Se va to xamala ngutu.

¹⁸ Sekoko Vasadhusi va va wombako tito, kuwalo kuwuka ka vafi, va to ta kwakwe va ta mu wotisa va txi kha vona:

¹⁹“M'gondisi, Mosi a hi bhalete a txi khene: M'thu ngako a txi fa, e siya msikati a si nga ni mwanana, mwanawe a na mu sambele thaka e wusela liveleko mwanawe.

²⁰Va ti ti ho vavamna va mtxhanu ni vambidi, va txikoma ni txinanda. Wo khata a tekile msikati, se a txi fa, a sa nga siya mwanana.

²¹Wa wumbidi a mu tekile, a txi fa nene a si nga ni mwanana. Ti mahisile toneto ni ka wa wuraru.

²²Votshe va mtxhanu ni vambidi kha va siya mwanana. Msana ka votshe, a to fa nene wu wamsikati.

²³Ngu ditshiku da kuwuka ka vafi, ngako va di wukile, wamsikati wuwa a na va wa mani kani? Nguko a tekilwe ngu votshe va mtxhanu ni vambidi.”

²⁴Jesu a to va xamula a txi khene “Ina kha mi timeli ngu kuwa mi si ziviko mibhalo ni mtamo wa Txizimu kani?

²⁵Nguko ngako va txi na wuka ngu ka vafi, kha va na mbi ngadi ve teka, hambi i di kutekwa; se vathu va na va nga tingelozi nzumani.

²⁶Ngako i di vafi ni kuwuka kwawe ina kha ma gonda dibhukuni ka Mosi, ngu tiya Txizimu txi nga womba nayo txipoponi txi txi kha txona: ‘Ngani Txizimu txa Abrahamu, Txizimu txa Isaake, Txizimu txa Jakobe?’

²⁷Txona hi nga Txizimu txa vafi, kambe i Txizimu txa va va hanyako. Idito, mi timete ngutu.”

²⁸ Mmwani wa vabhali, awu a nga va pfa va txi kanetisana, ku ti ngako a txi wona ti to a va xamute ta tinene, a to mtshuketela e ta mu wotisa, a txi khene: “Ngu wuhi mlayo wo khata ka yotshelele kani?”

²⁹Jesu a to mxamula a txi khene: “Wo khata ngu wuwa: ‘Israyeli, engisa: MKOMA, Txizimu txathu, ngene ekha i ku Mkoma.

³⁰U na randa Mkoma Txizimu txako ngu yotshe mbilu yako, ngu wotshe muhefemulo wako, ngu otshe mapimo ako ni wotshe mtamo wako.’

³¹Wa wumbidi ngu wuwa: ‘U na randa muakelani wako, nga ti u ti randisako tona awe upune.’ Kha wu nga ho wumwani mlayo wo pinda yiya.”

³²Se m'bhali a to khene kwakwe: “U womba tona, M'gondisi! Kha ditshuri, eto, u ti womba ngu kona, tito: ‘Txizimu ngu txona txokha i ku MKOMA, hahanze ka txona, kha nga ho mmwani’;

³³ni ti kambe to: ‘Kuranda Txizimu ngu yotshe mbilu, ngu otshe mapimo, ngu wotshe mtamo, ni kuranda muakelani nga ti m'thu a ti randisako tona’, ti ni lisima kupinda totshe timhamba to hiswa ni totshe tixaka ta timhamba.”

³⁴Jesu a di woni ti to ene a xamute ngu wuzivi, a mgete a txi khene: “Khu nga kule ni Mfumo wa Txizimu!” Se ni mmweyo a ti si tsani kambe ku mu wotisa txilo.

³⁵Jesu, ngako a txi gondisa, Dithepeleni, a to womba-womba a txi khene: “Vabhali va wombisa kutxani ti to Mesiya i Mwana Dhavhidha kani?

³⁶ Kasi Dhavhidha ene a wombile ngu Moya wo Sawuleka, a txi khene: ‘Mkoma a ti khene ka Mkoma wangu: Khalahatsha txineneni kwangu kala ni maha valala vako txikhigetelo txa mikondo yako.’

³⁷Se akuwa Dhavhidha a m'dhanako ku i MKOMA, a nga va mwanakwe ngu ha ko txani kani?” Se dibutho di da hombe di ti mu engisa ngu kutsaka.

³⁸Jesu a ti ti womba, na a txi gondisa, a txi khene: “Ti woneleni ka vabhali. Vona va dhunda kutsimbila va di ambate syambalo so lapha, va dhunda ni kuloswa mu mitendelani.

³⁹Va dhunda makhalo o thanga mu mibusoni.

⁴⁰Va xakela silo sa tinoni, va txi ti dyelela ngu kulaphisa mikombelo. Va na mana txitsayiso txo karata.”

⁴¹Msana keto, Jesu a to khalahatsha hafuhi ni hawa va vekako kona male ya miningelo, a txi wonetela ati vathu va ningelisako tona. Vavangi va nyatithombe va txi thela male yayingi.

⁴²Se a txi ta mmweyo wa noni, i nga ti txisiwana, a ta ningela simaleana simbidi, sa sidotho.

⁴³Jesu a to dhana vagondiswa vakwe a txi khene: “Kha ditshuri na mi gela ni khani: Awu wa noni, wa txisiwana, a vekile mu ka msengo male yayingi ngutu kupinda votshe.

⁴⁴Votshe vamwani va vekile male, na yi txi khukhela kutalelwani kwawe; kasi ene, kupwatani kwakwe, a ningete sotshe simaleana si a nga ti naso, asi a nga ti fanela kuhanya ngu sona.”