Read chopi Marku 13 Bible Online

Marku 13 - chopi bible

Marku 13

¹Ku ti ngako a txi huma Dithepeleni, mmweyo wa vagondiswa vakwe a ti khene kwakwe: “M'gondisi, hinga wona kuxamalisa ka marigwi awa ni maakelo a tinyumba ta kona!”

²Jesu a txi khene kwakwe: “Wa ti wona tinyumba tiya ta hombe kani? Kha ku na mbi sala dirigwi txitimwi ka dirigwi, adi di no mbi khundumuswa.”

³Ku ti ngako a di khate mmangoni ka Miolivha, na a di rendekelani ni Dithepele, Pedro ni Jakobe ni Johani ni Andreya, va to mu wotisa, va di vokha, va txi kha vona:

⁴“Hi gele timhaka tiya, ti na maheka mbimo muni kani, txi na va txikombiso muni txi no komba ti taku txi hokile txikhati txa kutatiseka ka totshe tiya kani?”

⁵Jesu a to khata ku va gela a txi khene: “Ti woneleni ti to mi si thuki mi wongwa ngu m'thu.

⁶Nguko votala va nata ngu ditina dangu, va txi kha vona: ‘Ani ngani ene.’ Kambe va na timeta va votala.

⁷Ngako mi txi pfa tiyimbi ni nduma ya tiyimbi, mi nga thaveni, nguko ati ti fanete kuhumelela. Aniko hi nga ona magwito.

⁸Nguko ditiko di na wukela ditiko, mfumo wu na wukela mfumo, kutsekatseka ka mafu ku na vaho ka tiphuho to tala, ni tipaya ti na vaho. Eto ngu khata ka kuxaniseka.”

⁹ “Kambe anu ti woneleni, nguko va na mi ningela mabanzani ko lamulwa, ni masinagogani, mi na kwapelwa, mi emiswa masoni ka tinduna ni ka vafumeli ngu mhaka yangu, kasiku mi va tifakazi tangu masoni kwawe.

¹⁰Kambe ti fanete ti to Evhangeli yi txhumayelwa kuthanga ka otshe matiko.

¹¹Ngako va txi mi ndinda va txi mi yisa kulamulwani mi nga thukeni mi vilela ngu ti mi no ya ti womba, aniko wombani ati mi no ningwa ka yoneyo mbimo, nguko hi nga anu mi no womba-womba, aniko i Moya wo Sawuleka.”

¹²“Mwanawe m'thu a na ningela mwanawe kudawani, tate wa m'thu a na ningela mwanana wakwe; vanana va na wukela vaveleki vawe ngu mtamo ve va dayisisa.

¹³Mi na vengelwa ngu votshe ngu mhaka ya ditina dangu, aniko awu a timiselako kala magwito, ngene a no hulukiswa.”

¹⁴“Ngako mi txi wona manyala a kuthisa ma di zumbile ahawa ku si faneliko (awu a gondako a na pfisise), ka yoneyo mbimo, ava va ku Judheya va na tutumele mimangoni.

¹⁵ Awu a ku txitimwi ka nyumba a nga txhike, a nga wulele kuya teka txilo nyumbani kwakwe.

¹⁶Awu a ku thembweni a nga tshumele eya teka nguwo yakwe.

¹⁷Ku nava ni dikhombo ka va va ku ni sirumbu, ni va va mamisako ka oneyo masiku.

¹⁸Khongelani ti to ti si humeleli ngu wuxika.

¹⁹Nguko ka oneyo masiku ku nava ni sixaniso sa hombe ngutu, saku kukhukhela makhatoni ka ditiko di Txizimu txi ngadi vanga kala konkuwa, kha si khali ku va ho, kambe kha si na mbi nga vaho.

²⁰Idiku Mkoma kha komisa masikuyo, nga ku si huluki m'thu; aniko ngu mhaka ya va a nga va sawula, a komisile masikuyo.”

²¹“Keyo mbimo, ngako m'thu a txi khene kwanu: ‘Wonani Mesiya ndiyo’, mwendo ku: ‘Ndiyole haleya’, mi nga kholweni.

²²Nguko ku na humelela Vamesiya va makuhu ni vaprofeti va makuhu; va na maha sidiwukiso ni sixamaliso kasi kupengisa ni va va nga sawulwa, ti txi koteka.

²³I di anu, ti woneleni. Ani ni songolete ku mi gela totshe.”

²⁴“Ka masikuyo, msana ka kuxaniseka kuleya, ditambo di na maha txidema, mtxima wu na mbi woninga.

²⁵Tinyeleti ti na wa ngu nzumani, mitamo yi yi ku nzumani yi na tsekatsekiswa.

²⁶Konaho mi na wona Mwanana wa M'thu na a txi ta a di marefuni, a di ni mtamo wa hombe ni wudhumo.

²⁷Ene a na rumela tingelozi takwe, ti txi tshanganisa votshe vale va nga sawulwa, va otshe madhawa a mune, kukhukhela magemeta-mitshi ka mafu kala magemeta-mitshi ka nzuma.”

²⁸“Gondani ngu txifaniso txa mkuwu. Ngako madhavi a wona ma di thambile, se ku txi thunga mazokoro, ma tiziva ti to malanga ma hafuhi.

²⁹Ngu toneto, ngako mi txi wona ti txi maheka tiya, ti ziveni ti to ene a hafuhi, a ha txikeni.

³⁰Kha ditshuri na mi gela: Liveleko liya kha li na mbi pinda, na totshe tiya ti sa maheka.

³¹Nzuma ni mafu si na pinda, kambe mapswi angu kha ma na mbi pinda.”

³² “Se ngu mhaka ya ditshiku da kona ni txikhati txa kona, awalo asi zivako, hambi tingelozi ta nzumani, hambi ene Mwanana; hahanze ka Tate.

³³Ti woneleni, rinzelani, khongelani, nguko kha mi tizivi taku i nava mbimo muni.

³⁴Nguko ti fana ni m'thu wu a nga maha dipfhumba. Mbimo yi a nga khukha ha m'tini, a ningile mtamo ka sithumi sakwe, mmwani ni mmwani a txi mninga mthumo wakwe, se e leleta ni muwoneleti wa ha txikeni ti to e wonisisa.

³⁵Ngu toneto, ti woneleni, nguko kha mi yi zivi mbimo yi a no wuya ngu yona nyamne wa m'ti, mwendo ni minova, mwendo ni hagari ka wusiku, mwendo mbimo yi wu embako mkuku, mwendo ni mixo.

³⁶Kasiku, ngako a txi wuya a sa zivisa, asi ta mi mana mi di otete.

³⁷Ati ni wombako kwanu, ni ti womba ka votshe; ni khani: Wonelelani!”