Read chopi Marku 14 Bible Online

Marku 14 - chopi bible

Marku 14

¹Ku txi sala masiku mambidi kasi ku yi mahwa Pasika ni M'buso wa mapawu o mbi na mtshumbelo, vaphaxeli va hombe ni vabhali va to lava marindi a ku mñola ngu wutxhari, kasiku ve m'daya.

²Aniko va txi womba tiya: “Kha kulaveki ku ti maha hagari ka msaho, vathu va nga wusa dizunga.”

³ Se mbimo yi Jesu a nga ti Bhetaniya, m'tini ka Simoni, awule wa tshekela, na se va di ha sakudyani, a to ta wamsikati, a di ni txikadyana txa alabhastru, txi nga ti ni mafura o bhumula a nardhu ya yinene, yo dhula ngutu, se e faya txikadyana e thela mafura ha msungo ka Jesu.

⁴Vamwanyani vathu va nga ti ho, va to ngurangura va txi kha vona: “A xakela mafura awa ngu txani kani?

⁵Nguko ma ndi na xaviswa ngu male yo pinda mazana mararu a madhenari, kasi maleyo yi txi avelwa ka sisiwana.” Se va txi mu kawuka.

⁶Aniko Jesu a to khene: “Mlekeni, mi mu karatela txani kani? Ene a ni mahete mthumo wa wunene.

⁷Nguko sisiwana mi naso yotshe mbimo hagari kwanu, se mi nga sikota ku si mahela wunene ka dihi ni dihi ditshiku, ngako mi txi ti lava; aniko ani kha mi na mbi va ni nani yotshe mbimo.

⁸Ene a mahile ati a nga ti kota; a songolete kutotela mafura mmidi wangu kasi ku wu longisela kuya tshotshwa.

⁹Ngu ditshuri na mi gela: Ka wuhi ni wuhi wukhalo ku no txhumayelwa Evhangeli, ka mafu otshe, ti na xawutwa ni tona ti ene a nga ti maha, kasi kumaha txialakanyiso ngu ngene.”

¹⁰Sekoko, Judha Iskariyoti, mmweyo wa va digumi ni vambidi, a to tsula ka vaphaxeli va hombe kasi kuya mningela kwawe.

¹¹Vona va di engisile ti a nga womba, va to tsaka, ve mu thembisa ku mninga male. Se ene a to lava mbimo ya yinene kasi ku mningela ngu yona.

¹²Ka ditshiku do khata da M'buso wa mapawu o mbi tshumbelwa, i ku ditshiku da kubhawa Txinvutana txa Pasika, vagondiswa va to mu wotisa va txi kha vona: “Ngu hani u lavako ku hi ya kulongisela kudyela kona Pasika kani?”

¹³Konaho ene a to rumela vambidi ka vagondiswa vakwe, a txi va gela ku khene: “Tsulani didhoropani, se mi na ya manana koneyo ni wamwamna, a di rwate lidhuwa la mati. Mu londiseni.

¹⁴Se ahawa ene a no wulela, mi na ya gela nyamne wa m'ti mi txi khanu: ‘M'gondisi a hi rumile ku ta womba tiya: Yi hani nyumba yi ni nota dyela ka yona Pasika ani ni vagondiswa vangu kani?’

¹⁵Ene a na mi komba wukhalo wa hombe nyumbani, wu ku txitezini, amuwa ku nga longiselwa, ku txi tshuriselwa. Mi na ya hi longisela kona.”

¹⁶Vagondiswa va to khukha ve tsula didhoropani veya mana sotshe nga ti a nga va gelisa tona, ve longisela Pasika.

¹⁷Mbimo yi di nga swa ditambo, a to tsula navo va digumi ni vambidi.

¹⁸ Txikhati txi va nga ti ha mezani va txi dya sakudya, Jesu a ti khene: “Ngu ditshuri na mi gela ku khani: Mmweyo wanu a dyako ni nani a na ni ningela.”

¹⁹Vona va to khata kutelwa ngu dikhodho, mmwani ni mmwani a txi wotisa ku khene: “Ina ngani kani?”

²⁰Kambe ene a to va xamula a txi khene “I mmweyo wa va digumi ni vambidi, awu a tsunulako mbiyani kumweko ni nani.

²¹Kha ditshuri Mwanana wa M'thu a tsulisa ti ti nga bhaliswa tona ngu ngene. Aniko dikhombo da wule a no ningela Mwanana wa M'thu! I ti ta tinene kwakwe eyo m'thu, idiku a sa nga va ni kuvelekwa.”

²²Mbimo yi va nga ti ha sakudyani, ene a to teka dipawu, a txi di katekisa, a txi di bhanda, a txi va ninga, a txi khene: “Tekani, asiya mmidi wangu.”

²³Ngu msana a to teka digombe a txi bonga, a txi va ninga. Votshe va sete ngu dona.

²⁴Ene kambe a va gete a txi khene: “Asiya mnoha wangu, mnoha wa txitumelelano, awu wu theketelwako vavangi.

²⁵Kha ditshuri na mi gela ni khani: Kha ni na mbiswa ni txi sela kambe mihando ya m'vhinya kala ditshiku dile ni no ya yi sela yi di yiphya Mfumoni ka Txizimu.”

²⁶Se ngako va di gwitile kuembelela tindando, va to huma ve tsula mmangoni ka Olivheti.

²⁷Jesu a to va gela a txi khene: “Motshenu mi na khuvekiswa, nguko ti bhatwe ti taku: ‘Ni na peka m'dyisi, se tinvuta ti na hangalaka.’

²⁸ Aniko ngu msana ka kuva ni di wukile ngu ka vakufa, ni na mi thangela kuya Galileya.”

²⁹Konaho Pedro a to angula a txi khene: “Hambi votshe va txi khuveka, ani kha ni na mbi khuveka ni kudotho.”

³⁰Jesu a to mu xamula a txi khene: “Kha ditshuri na kugela ti to nyamsi, ka wona wusiku wuwa, na mkuku wu sinzi kuemba kambidi, awe u na ni lamba kararu.”

³¹Aniko ene a to engeta e tsanisa ngu mtamo a txi khene: “Hambi idiku to laveka kufa kumweko ni nawe, ani kha ni na mbi kulamba.” Se votshe va to wombisa toneto ni vona.

³²Se va to hoka ka wukhalo wu wu dhanwako ku i Getsemani. Konaho Jesu a to womba ka vagondiswa a txi khene: “Zumbani kona hawa, na nga ya khongela.”

³³Ene a to teka Pedro ni Jakobe ni Johani e tsula navo. Se e khata kuphatuka tikhana ni kuxaniseka ngutu.

³⁴A to va gela a txi khene: “Moya wangu wu kuxanisekani ka hombe, ko nga ka lifo! Zumbani hawa mi txi wonelela.”

³⁵A di tshuketile kudotho masoni a to ti wisa hahatshi a txi khongela, a txi womba tito, ngako ti txi koteka, txikhati txiya txi na pinde kwakwe.

³⁶A txi womba kambe ku khene: “ ‘Abba!’ Tata, totshe ta koteka kwako, thavisa digombe diya kule ni nani! Hambi keto, ti nga maheke nga kuranda kwangu, aniko ti na maheke ati awe u ti lavako.”

³⁷Ngu msana, a to wuya kwawe, a ta va mana va di otete, se e womba ka Pedro a txi khene: “Simoni, wo otela kani? U tandekile kuwonelela txikhati txa tximwetxo kani?

³⁸Wonelelani mi txi khongela, kasi mi si wuleli kudukwani; moya wa ti lava, aniko mmidi wa rereka.”

³⁹Se a to tshumela kambe eya khongela, na a txi womba kambe oneyo mapswi a mamwewo.

⁴⁰Se e wuya kambe a ta va mana vagondiswa va di otete, nguko maso awe ma ti nemelwa ngu wukohe, va txi pwata ni dipswi do mu angula.

⁴¹A di wile kwawe da wuraru, a to va gela a txi khene: “Konkuwa otelani mi humula. Ti dingani. Se txikhati txi hokile. Mwanana wa M'thu wa ningelwa manzani ka vaonhi.

⁴²Khukhani! He tsimbileni! Wa bwaka awu a ni ningelako.”

⁴³Ene a di ngadi a txi womba-womba, a to bwaka Judha, mmweyo wa vale va digumi ni vambidi, kumweko ni mtxawa wa hombe wu nga ti xomile matxhari ni migomba, na va txi rumwa ngu vaphaxeli va hombe ni vabhali ni madhota a ditiko.

⁴⁴Awule a nga ti mningela a ti va vekete txikombiso txiya: “Awule ni no mpswopswa, ngeneyo; mñoleni mi tsula nayo, mi txi mu woneleta ta tinene.”

⁴⁵Neti a nga bwaka, a to mtshuketela hafuhi kwakwe, a txi khene: “M'gondisi!” Se a txi mpswopswa.

⁴⁶Vona va to nawuluta mawoko ve mu ñola.

⁴⁷Konaho, mmweyo wa vale va nga ti ti ho, a to somola ditxhari dakwe e peka ngu dona txithumi txa mphaxeli wa hombe e txi wila nzeve.

⁴⁸Jesu a to va angula a txi khene: “Mi ta mi di xomile matxhari ni migomba, ku ta ni ñola nga no va dikhamba!

⁴⁹ Otshe masiku ni ti kumweko ni nanu Dithepeleni, ni txi gondisa, kambe kha ma ni ñola; aniko se yi fanela kutatiseka Mibhalo.”

⁵⁰Sekoko vagondiswa va to mu leka ve thava votshe.

⁵¹Mmweyo wa dizambi a to mlondisa, a di phambile dilasori kugwita. Se ve mu ñola.

⁵²Aniko ene, a to leka dilasori manzani kwawe, a txi pshwonyowoka e thava a sa ambala txilo.

⁵³Sekoko va to teka Jesu ve mu yisa ka mphaxeli wa hombe, ahawa va nga ti tshanganile vaphaxeli va hombe ni madhota a ditiko ni vabhali.

⁵⁴Pedro a ti ti mu londetela a di kule, kala e wulela digumani ka mphaxeli wa hombe, ahawa a nga ya khalahatsha kumweko ni mahalamu e wora mndilo.

⁵⁵Ti di mahile eto, vaphaxeli va hombe ni dotshe Dibanza va to lava wufakazi wo mangalela Jesu, kasi ve sikota ku m'daya, aniko va so wu pwata.

⁵⁶Vavangi va to fakaza makuhu ngu ngene, aniko wufakazi wawe wu so hambana.

⁵⁷Vamwanyani va to khukha ve mu mangalela ngu ku mu lumbeta, va txi kha vona:

⁵⁸ “Hi mu engisile a txi khene: ‘Ani ni na hasula Dithepele diya do mahwa ngu manza a vathu, se mndani ka masiku mararu, ni na aka dimwani do mbi mahwa ngu manza a m'thu.’ ”

⁵⁹Hambi keto, wufakazi wawe wu ti si pfani.

⁶⁰Konaho, mphaxeli wa hombe a to khukha hagari kwawe, a txi ema, e wotisa Jesu, a txi khene: “Khu anguli txilo kani? Nda txani ti va ku mangalako ngu txona kani?”

⁶¹Aniko ene a to tamarisa a txi malala, asi anguli txilo. Mphaxeli wa hombe a to engeta e mu wotisa, a txi khene: “Ngawe Mesiya, Mwanana wa Txizimu txi txi dhumiswako kani?”

⁶²Jesu a to xamula a txi khene: “Ngani. Kambe mi na wona Mwanana wa M'thu a di khalahatshile txineneni ka Nyamne wa Mtamo wotshe, na a txi ta ngu marefu a nzumani.”

⁶³Sekoko mphaxeli wa hombe a to vharula tinguwo takwe na a txi khene: “Hi ngadi hi txi lavela txani tifakazi kani?

⁶⁴Mi txi engisile txiruko! Mi wona to txani kani?” Votshe va to lamula ti to ene a fanetwe ngu kufa.

⁶⁵Se vamwani va to khata ku mthurela, ve mfenengeta khohe ngu nguwo, na va txi mpeka ngu sibhakela, va txi kha vona: “Hi nga huta!” Mahalamu ni ona ma txi mpeka ngu mipama.

⁶⁶Ka yoneyo mbimo, Pedro a ti maneka a di digumani, hahatshi. Konaho kutota kwakwe mmweyo wa txithumi txa wamsikati txa mphaxeli wa hombe.

⁶⁷Se ngako a di woni Pedro a txi wora mndilo, a to mu wonisisa ta tinene, se a txi khene: “Nanawe u ti kumweko ni Jesu wa Nazareta.”

⁶⁸Aniko ene a kanetile a txi khene: “Kha ni tizivi, kambe kha ni ti mani eto u wombako.” Msana keto, a to huma ha txikeni, se mkuku wu to emba.

⁶⁹Sekoko awule wa txithumi, mbimo yi a nga mu wona kambe, a to engeta e womba ka vale va nga ti ti ho, a txi khene: “Awuwa i mmweyo wawe.”

⁷⁰Aniko ene a to kaneta ka wumbidi. Se msana ka mbimonyana ya yidotho, ava va nga ti ti ho konaho, va to womba kambe ka Pedro va txi kha vona: “Awe ngu ditshuri u mmweyo wawe, nguko nawe u Mugalileya.”

⁷¹Sekoko a to khata kuruketela ni kuxambanya a txi khene: “Kha ni mu zivi mthuyo mi wombako ngu ngene.”

⁷²Konaho mkuku wu to emba ka wumbidi. Se Pedro e khumbula atile Jesu a nga ti mgete taku: “Wu sanzi kuemba kambidi mkuku, awe u na ni lamba kararu.” Konaho a to khata kudila.