Read chopi Marku 16 Bible Online

Marku 16 - chopi bible

Marku 16

¹Ngako ditshiku da Sabbata di di pindile, Mariya wa Magdhala ni Mariya, mame wa Jakobe, ni Salome, va to xava mafura kasiku veya mu tota ngu ona.

²Ni mabimbi-kutxa ka ditshiku do khata ka divhiki, vona va to tsula diyivani, na se ditambo di txi txa.

³Va ti ti wotisana va txi kha vona: “I mani a no ya hi wumbulutela dirigwi, a txi di thavisa ha txikeni ka diphala kani?”

⁴Se ngako va di gute maso, va to wona dirigwi di di wumbulutilwe, kuve dona i ti da hombe ngutu.

⁵Va di wulete diyivani, va to wona dijaha di di khalahatshile, didhawa da txinene, di di ambate nguwo yo basa, se ve xamala ngutu.

⁶Kambe dijaha di to va gela di txi kha dona: “Mi nga dhukeni! Mi lava Jesu wa Nazareta, awu wo bethelwa ha txihambanoni: A wukile, kha nga ho hawa. Wonani wukhalo wu va nga ti mu vekile ka wona.

⁷ Tsulani mi txi ya gela vagondiswa vakwe ni Pedro, ti to ene wa mi thangela kuya Galileya, mi na ya mu wona, madingano ni ti a nga mi gelisa tona.”

⁸Vona va to huma diyivani, ve tutuma ngu kudhudhumela ni kuxamala; kha va gela txilo m'thu, nguko va ti thava.

⁹Ngako a di wukile ni mixo ya ditshiku do khata ka divhiki, a to thanga e woneka ka Mariya wa Magdhala, awu a nga ti tovete kwakwe mtxhanu wa madhimoni ni mambidi.

¹⁰Ene a to tsula eya zivisa avale va nga ti londisela Jesu, nguko va ti pandiseka na va txi dila.

¹¹Ngako va di engisile ti to ene wa hanya ni ti to a wonwi ngu Mariya, kha va kholwa.

¹²Msana keto, a to tikomba ngu tximwani txiemo ka vambidi vawe, va nga ti tsimbila va txi ya hahanze ka m'ti.

¹³Vona va to tshumela veya gela va va nga ti sate, aniko ni vona kha va kholwa.

¹⁴Ngu kugwitisa a to woneka ka va digumi ni mmweyo, va di ha sakudyani, e va kawuka ngu ku ambi kholwa kwawe ni kubanga ka timbilu tawe, nguko kha va kholwa ngu va va nga mu wona, a di wukile ngu ka vafi.

¹⁵ Ene a to va gela a txi khene: “Tsimbilani ngu ka dotshe ditiko, mi txi txhumayela Evhangeli ka sotshe sivangwa.

¹⁶Awu a no kholwa, a txi bhabhatiswa, a na huluka; awu a no mbi kholwa, a na abaniswa.

¹⁷Sidiwukiso si si no mahwa ngu va va no kholwa ngu siya: Va na tovela madhimoni ngu ditina dangu, va na womba-womba tidimi ta tiphya;

¹⁸va na ñola minyoka ngu manza, se hambi va txi sela sa txhefu, kha si na mbi va wusela phango; va na sanzeka manza ka valwali, ve kalamuka.”

¹⁹ Sekoko, Mkoma Jesu, msana ka kuva a di wombawombile navo, a to gulwa a txi ya nzumani, a txi ya khalahatsha txineneni ka Txizimu.

²⁰Se vona va to tsimbila ve txhumayela ka otshe matiko, Mkoma a txi thumisana navo ni kutsanisa dipswi ngu sidiwukiso si si nga ti tsimbilelana nado.