Read chopi Marku 2 Bible Online

Marku 2 - chopi bible

Marku 2

¹Ku ti ngako ma di pindile masiku, Jesu a to tshumela e wulela Kapernawume, se ti txi pfala ti to ene a nyumbani.

²Vathu vavangi va to kuluveta ve sengeletana konaho, ahawa koza ku txi pwateka ni wukhalo ha txikeni. Jesu a ti ti va txhumayela dipswi da Txizimu.

³Konaho a to nehwa kwakwe m'thu wa kuoma sihango, a di rwatwe ngu mune wa vathu.

⁴Ngako va nga txi tandeka ku mu hokisa ka Jesu, ngu mhaka ya kutala ka vathu, va to kwela va txi ya hasula lyango la nyumba yiya ene a nga ti ka yona, se va di tute ditshoko, va to mu txhikisa a di ha ditahoni hawa va nga ti mu otelisile kona.

⁵Jesu ngu ku ona kukholwa kwawe, a ti khene ka mlwali: “Mwanangu, u divaletwe sionho sako.”

⁶Kambe vabhali vokari va ti zumbile konaho, va txi pimisa timbiluni kwawe, va txi kha vona:

⁷“A wombisa tiya ngu txani kani? Wa ruka. I mani a sikotako kudivalela sionho hahanze ka Txizimu kani?”

⁸Jesu kunukunuko a to tiziva ngu moya wakwe ati va nga txi alakanya timbiluni kwawe, se a txi va gela ku khene: “Mi alakanyela txani toneto timbiluni kwanu kani?

⁹Ngu tihi ti nga hehuka kuwomba ka wu wa kuoma sihango: Ku khani, ‘sionho sako si divaletwe’, mwendo ku khani, ‘Khukha u txi teka ditaho dako u txi tsimbila kani?’

¹⁰Se kasi mi na tiziva ti to Mwanana wa M'thu ana ni mtamo ha mafuni wa kudivalela sionho.” A to gela wu wa kuoma sihango, a txi khene:

¹¹“Ni khani kwako, khukha u teka ditaho dako u txi tsula m'tini kwako.”

¹²Ene a to khukha se kunukunuko e teka ditaho dakwe, a txi tsula, na a txi wonwa ngu votshe vathu, ahawa votshe va nga xamala ve dhumisa Txizimu va txi kha vona: “Kha hi zivi ku ti wona to nga tiya.”

¹³Jesu a to engeta e khukha, a txi ya diphambo da digovani, dibutho da vathu votshe veya kwakwe, se e va gondisa.

¹⁴Ku ti ngako a txi pinda, a to wona Levhi, mwana Alfewu, a di nyumbani ka mkhupo, a txi khene kwakwe: “Ni londise.” Se Levhi a to khukha e mu londisa.

¹⁵Ku ti ngako Jesu a di khalahatshile kudyani, nyumbani ka Levhi, vakhupisi vavangi ni vaonhi va to ta khalahatsha kumweko ni Jesu ni vagondiswa vakwe, nguko i ti vathu vavangi va nga txi mu londisa.

¹⁶Kambe ngako vabhali va mtxawa wa Vafarisi, ve mu wona a txi dya kumweko ni vakhupisi ni vaonhi, va to kha vona ka vagondiswa vakwe: “Nji txani a txi dya kumweko ni vakhupisi ni vaonhi kani?”

¹⁷Jesu ngako a txi tipfa eto, a to khene kwawe: “Ava va hanyako kha va lavi ñanga, aniko yi lawa ngu va va lwalako. Ani kha na tela ku ta dhana va vo lulama, aniko ni tete vona vaonhi.”

¹⁸Vagondiswa va Johani ni Vafarisi va ti ti tona sakudya. Se ve ta ka Jesu, va txi ta kha vona kwakwe: “Ngu kutxani vagondiswa va Johani ni Vafarisi va ti tonako sakudya, na kuve vagondiswa vako kha va ti toni, kani?”

¹⁹Se Jesu a to khene kwawe: “Tipheleketi ta mteki, ina ti nga sikota kutitona sakudya, na mteki a di ngadi kumweko nato kani? Ka yotshe mbimo yi ti ku ngadi nayo, kha ti na kutitona sakudya.

²⁰Aniko ma nata masiku awa ti nota tekelwa mteki, se ngu kona ti na ku ta ti tona sakudya.

²¹Kha ku na m'thu wu a rungako txiziva txa nguwo ya yiphya ka txyambalo txa kale, nguko txiziva txa txiphya txi nga namula nguwo ya kale, se kuvharuka ku txi engeteleka.

²²Kambe kha ku na m'thu wu a thelako vhinya ya yiphya ka misava[2] ya kale, nguko a txi maha eto, vhinya yi na vharula, se ku txi luzeka vhinya ni misava. Aniko vhinya ya yiphya yi thelwa ka misava ya yiphya.”

²³Ngu ditshiku da Sabbata, ngako Jesu a txi pinda ngu hagari ka tithembwe ta fulaho, vagondiswa vakwe, mbimo yi va nga txi tsimbila ngu nzila, va to khata kufunya maphumbu.

²⁴Vafarisi va to mu gela va txi kha vona: “Hinga wona, va mahela txani ati ti si tumelelwiko kumaha ngu ditshiku da Sabbata, kani?”

²⁵ Ene a ti khene kwawe: “Kha mi nzi kugonda tiya Dhavhidha a nga mahisa tona, mbimo yi a nga khamwa a txi pfa nzala, ene ni vale a nga ti navo kani?

²⁶Ahawa a nga wulela nyumbani ka Txizimu, ka masiku a Abhiyatari, mphaxeli wa hombe, a txi dya mapawu a mphaxo e ninga ni vale a nga ti navo, ayawa ma nga ti fanela kudyiwa ngu vaphaxeli dwe kani?”

²⁷Se a txi khene kwawe: “Sabbata yi mahetwe m'thu, hi nga m'thu a nga mahelwa Sabbata.

²⁸Ngu konaho, Mwanana wa M'thu Mkoma wa yona Sabbata kambe.”