Read chopi Marku 3 Bible Online

Marku 3 - chopi bible

Marku 3

¹Jesu a to tshumela e wulela disinagogani. Konemo ku ti ni m'thu wa kukhwanyela dianza.

²Se vona va ti mu wonetela ngu kulava kuziva ti to mwendo a na mu hanyisa, kufela kuve sikota ku mu mangalela.

³Jesu a to khene ka wu wa kukhwanyela dianza: “Khukha u txi ema hawa hagari.”

⁴Se a txi khene kwawe: “Ta tumelelwa ngu ditshiku da Sabbata kumaha ta tinene mwendo kumaha to biha kani? Kuponisa wutomi mwendo ku wu lovisa, kani?” Vona va to malala.

⁵Ene a to rumaruma ngu maso, ngu kuhenya na a di pandisekile ngu mhaka ya kubanga ka timbilu tawe, se a txi gela m'thu wule a txi khene: “Nawuluta dianza dako.” Ene a to di nawuluta, se dianza dakwe di hanya.

⁶Ku ti ngako Vafarisi va di humile hahanze, kunukunuko va to maha txikungo ni va ka Herodha, kasi kuwona ti va no m'dayisa tona.

⁷Kambe Jesu a to khukha ni vagondiswa vakwe veya phuho, hafuhi ni digova, se dibutho da hombe da vathu ve mlondisa, va txi huma Galileya. Vamwani va kuhuma Judheya,

⁸ni Jerusalema, ni Idhumeya ni kheya mtxhatuko ka Jordhani, ni matikoni ka Tiro ni Sidhoni, va to gudhuka ve ta kwakwe, i di vavangi ngutu, ngu kupfa totshe ti ene a nga ti maha.

⁹ Se e gela vagondiswa vakwe ti to ve m'vekela ngalava, kasiku dibutho di si mu kamareti.

¹⁰Nguko a di hanyisile vathu votala, votshe va va nga ti ni wulwati, va ti ti rinza kwakwe, kufela ku mu gwesa.

¹¹Ni mimoya ya nzambwa, ngako yi txi mu wona, yi ti ti khizama masoni kwakwe, yi huwelela yi txi kha yona: “Awe u Mwanana wa Txizimu.”

¹²Kambe ene a to yi gela ngu kutsanisa ti to yi si thuki yi mu nuwela.

¹³Se ene a to kwela mmangoni, a txi va dhana kwakwe ava a nga va lava, se vona ve tsula kwakwe.

¹⁴A to veka digumi ni vambidi ti to ve zumba nayo, ni ku va ruma kuya txhumayela;

¹⁵va di ni mtamo wa kutovela madhimoni.

¹⁶A vekile ava va digumi ni vambidi: Simoni, awu a nga raywa ditina daku i Pedro;

¹⁷ni Jakobe, mwana Zebhedhewu, ni Johani, mwanawe Jakobe; vonavo a va rayile ditina da Bhowanergesi, ati ti wombako ku “Vanana va Txingwalangwanda”;

¹⁸ni Andreya, ni Filipi, ni Bhartolomewu, ni Matewu, ni Tomasi, ni Jakobe mwana Alfewu, ni Tadhewu, ni Simoni Mukanana,

¹⁹ni Judha Iskariyoti, i ku ene wu a nga mu ningela.

²⁰Jesu a to wuya m'tini, se dibutho di tshumela di ta sengeletana konaho, ahawa ka kuza ve tandeka ni kudya sakudya.

²¹Va ka kwawe, ngako va txi pfa toneto, va to ta ku ta mñola, nguko va ti ti kha vona: “A hambanekile msungo.”

²² Kambe vabhali va va nga ti relete va txi ta ngu Jerusalema, va to womba va txi kha vona: “Ana ni Bhelzebhule, se a tovela madhimoni ngu mkoma wa madhimoni.”

²³Ku ti ngako ene a di va dhani kwakwe, a to va gela ngu txifaniso a txi khene: “Sathani a nga sikotisa kutxani kutovela Sathani kani?

²⁴Ngako mfumo wu txi ti abanisa ngu hagari, ewo mfumo kha wu na kutsana.

²⁵Mwaya ni wona, ngako wu txi ti abanisa ngu hagari, ewo mwaya kha wu na kutsana.

²⁶Sathani nene, ngako a txi ti lwisa, a ti abanisile ngu hagari, kha na kutsana: Ku nava kuguma kwakwe.

²⁷Kha ku na m'thu wu a sikotako kuwulela nyumbani ka ndena eya handa txuma txa yona, a sa thanga ngu ku yi sunga. Ngu kona a no handa nyumbani ka yona.

²⁸Kha ditshuri na mi gela ku khani: Vanana va vathu va na divalelwa sionho sotshe ni siruko sotshe si va no si womba.

²⁹Aniko awu a rukako Moya wo Sawuleka, txima kha na mbi divalelwa. Ana ni txionho txo mbi na magwito.”

³⁰Jesu a wombile tiya nguko va ti ti kha vona: “Ana ni moya wa nzambwa.”

³¹Se mame wa Jesu ni vanawe va to bwaka ve ema ngu hahanze, ve rumela ku m'dhana.

³²Kambe dibutho da vathu, va ti khalahatshile ve mu ranganyeta. Se va to mu gela ku kha vona: “Wona, mame wako ni vananu vaho hahanze kheya, va kulava.”

³³Ene a va xamute a txi khene: “Mame wangu ni vanathu, ngu vamani kani?”

³⁴Se e wonetela va va nga ti mu randete, a txi khene: “Wonani, mame wangu ni vanathu ngu vava.

³⁵Nguko awu a mahako kuranda ka Txizimu, ngene i ku mwanathu ni ndiyangu ni mame wangu.”