Read chopi Marku 4 Bible Online

Marku 4 - chopi bible

Marku 4

¹Jesu a to engeta e gondisa hafuhi ni digova, se dibutho da hombe di sengeletana kwakwe, se ene a to wulela ngalavani, ayi yi nga ti digovani e khalahatsha ka yona. Vathu votshe va ti mabambe ka digova.

²Se a to va gondisa timhaka ta tingi ngu sidinganiso. Kugondisani kwakwe a va gete a txi khene:

³“Engisani. Mphayi a humile a txi ya phaya.

⁴Ngako a txi phaya, timwani timbewu ti to wela hanzila, se sinyana si ta, si ta dyela totshe.

⁵Timwani timbewu ti to wela marigwini, ahawa ka ku ambi na mafu amangi, se ti kuluveta kumila, nguko mafu ma ti sa tshima.

⁶Kambe ditambo, ngako di txi thola, tona ti to wuna, ti oma, ngu kupwata mikuluti.

⁷Timwani timbewu ti to wela mipani. Yona mipa, ngako yi txi kula, yi to ti kura, se ti tandeka kuveleka.

⁸Timwani timbewu ti to wela ka mafu amanene, ti txi mila, ti txi kula, ti txi veleka: Yimweyo yi veleka magumi mararu, yimwani mtxhanu wa magumi ni dimwedo, yimwani dizana.”

⁹Se a txi khene: “Awu a ku ni tinzeve to engisa, a na engise.”

¹⁰Ku ti ngako a di phuho, ava va nga ti nayo ni va va digumi ni vambidi va to mu wotisa ngu mhaka ya sidinganiso.

¹¹Se a txi khene kwawe: “Anu mi ningilwe kuziva misisalo ya Mfumo wa Txizimu, kasi ka vale va ku hahanze, totshe ti humelela ngu sidinganiso,

¹²ti taku, ‘Hambi i di kuwona ve wona kambe va si wonisisi; hambi i di kuengisa ve engisa kambe va si pfisisi; kasiku va si thuki ve hunduluka, se ve divalelwa sionho.’ ”

¹³A to engeta a txi khene kwawe: “Ina kha mi txi pfisisi txidinganiso txiya kani? Idito, se mi na pfisisa kutxani sotshe sidinganiso kani?

¹⁴Mphayi a phaya dipswi.

¹⁵Ava va ku hafuhi ni nzila, ahawa dipswi di nga phaywa kona, ngu vale va ku, ngako va di di pfite, Sathani e kuluveta a txi ta kwawe, a ta va tekela dipswi di di nga phaywa timbiluni kwawe.

¹⁶Ngu toneto, timbewu ti ti nga phaywa marigwini ngu vale va ku, ngako va di di pfite dipswi, ve kuluveta ku di amukela ngu kutsaka.

¹⁷Aniko kha va nga ni mikoloti vapune; mba mbimonyana dwe; se ngako dikhombo ni kuxaniswa si txi va humelela, ngu mhaka ya dipswi, va kuluveta ve rereka.

¹⁸Atiya ti nga phaywa mipani, ngu va va engisako dipswi,

¹⁹kambe kukhutalela sa mafu awa, ni kukanganyiswa ngu tithomba, ni kunavela ka silo simwani, ku txi welela vona, ku txi kura dipswi, se di si veki mihando.

²⁰Ati ti nga phaywa ka mafu amanene, ngu va va engisako dipswi, ve di amukela, se ve veleka mihando, mbewu yimweyo yi veleka magumi mararu, yimwani mtxhanu wa magumi ni dimwedo, yimwani dizana.”

²¹ A to engeta a txi khene kwawe: “Dilambu, ina di nehwa ku ta vekwa hahatshi ka txirundu mwendo hahatshi ka m'bhedhu kani? Ina kasi kha va di nehi ve ta di veka ha phandeni kani?

²²Nguko kha ku na txilo txi ku kusisalani, txi na ku ambi wonekiswa; kambe kha ku na txilo txi txi nga tumbetwa, txi no mbi tumbulwa.

²³M'thu ngako a di ni tinzeve ta kuengisa a na engise.”

²⁴ A to engeta a txi khene kwawe: “Riyani tinzeve ka ti mi ti engisako. Mpimo wu mi pimelako vamwani ngu wona, na nanu mi na pimelwa ngu wona ngu Txizimu, se mi na engetelwa.

²⁵Nguko awu a ku ni txo maha, a na engeta e ningwa, se awu a singako ni txilo, hambi txi a ku natxo, a na tekelwa.”

²⁶E engeta a txi khene: “Mfumo wa Txizimu wu fana ni m'thu wu a nga rinza mbewu mafuni.

²⁷Se hambi a di otete mwendo hambi a di wukile, mitshikari ni wusiku, mbewu yona ya mila yi txi kula, na ene asi ti zivi.

²⁸Mafu mapune ma milisa mbewu. Kukhata kuhuma ditshina ngu msana ku rumbuka diphumbu, se ngu magwito kuvelekwa diphumbu do tala ngu timbewu.

²⁹Se siyalo ngako si di vitute, kunukunuko va wuletisa sikela, nguko se i nyango ya kuelula.”

³⁰E engeta kambe a txi khene: “Mfumo wa Txizimu hi na wu fanisa ni txani? Hi na wu kombisa ngu txidinganiso muni kani?

³¹Wu fana ni mbewu ya txinapi, ayi i ku ya yidotho ka timbewu totshe ta mafu.

³²Kambe ngako yi di phayilwe, ya kula yi pinda mindonga yotshe ngu kukula, yi va ni madhavi a hombe ahawa ka kuza sinyana sa nzumani si nga aka mtsudini ka yona.”

³³E va txhumayela dipswi da Txizimu ngu sidinganiso so tala, nga ti va nga txi sikotisa tona ku di pfisisa.

³⁴Kha womba mhaka kwawe, hahanze ka kumaha ngu sidinganiso. Se ngako va di phuho, a ti ti txhamusela totshe timhaka ka vagondiswa vakwe.

³⁵Ngu donedo ditshiku, ni minova, a ti khene kwawe: “He txhatukeni hi ya ka yimwani phuho.”

³⁶Ku ti ngako va di siyite dibutho, va to mteka ngu ngalava yi ene a nga ti ka yona, se koneho ku ti ti ho timwani tingalava.

³⁷Se ku so vhiluka nkutxu wa diphuho da hombe, mavimbi me wulela ngalavani, yi za yi lava kutala.

³⁸Jesu a ti txihondoni ka msana ka ngalava a di otete ha txikhigeloni. Se vona ve mu wusa va txi kha vona kwakwe: “M'gondisi, khu khatali ngu ngathu ngako hi txi lova kani?”

³⁹Se ene a to wuka e dhusa diphuho, a txi khene ka digova: “Malala, u txi dwe!” Se diphuho di renga, se ku va ni kudikha ka hombe.

⁴⁰Se a txi khene kwawe: “Mi thavisa tiya ngu txani kani? Kha mi nzi kuva ni kukholwa kani?”

⁴¹Se vona va to telwa ngu kuthava ka hombe, ve gelana va txi kha vona: “I mani ene wuwa, waku hambi diphuho ni linene si mu engisa kani?”