Read chopi Marku 5 Bible Online

Marku 5 - chopi bible

Marku 5

¹Se va to hoka mtxhatuko ka digova, ditikoni ka Vagerasa.

²Ku ti ngako Jesu a di humile ngu ngalavani, konako m'thu wu a nga ti ni moya wa nza mbwa, awu a nga ti huma ngu mayivani, a to mu hingeta.

³Eneyo a ti zumba mayivani, kambe ku ti si nga ni m'thu wa mtamo wu a nga txi sikota ku mu sunga, hambi ngu titxhini.

⁴Nguko a sungilwe ka kungi ngu makhodha ni titxhini, kambe a funyile makhodha ni kubhenula titxhini, ku si maneki ni m'thu wa mtamo wo sikota ku mu xula.

⁵Yotshe mbimo, wusiku ni mitshikari a ti tsimbila mayivani ni mimangoni, a txi kwangula, a txi ti kurumulela ngu marigwi.

⁶Ku ti ngako a di woni Jesu, a di ngadi kule, a to tutuma eya mu khizamela.

⁷Se a txi peka huwa ngu dipswi da hombe a txi khene: “I mhaka muni u ku nayo ni nathu, awe Jesu Mwanana wa Txizimu Nyatxitimwi?”

⁸Nguko Jesu a ti khene kwakwe: “Huma ka m'thu wuwa, awe moya wa nzambwa.”

⁹Se e mu wotisa a txi khene: “Ditina dako u mani?” Wona wu mu xamula wu txi: “Ditina dangu ni Txikwata, nguko hi vangi.”

¹⁰Se wu to mkhongotela ti to asi thuki a txi yi tovela kule ni ditiko dile.

¹¹Kona hale hafuhi ni mmango, ku ti ni mtxhambi wa hombe wa tikhumba, wu txi hava.

¹²Se mimoya yotshe yi mkhongotela, yi txi kha yona: “Hi rumele tikhumbani, hi ya wulela ka tona.”

¹³Kunukunuko Jesu a to yi tumelela se mimoya yile ya nzambwa yi huma yi ya wulela tikhumbani; se mtxhambi wu tutumela mkovani, wu ya ti rinza digovani, tikhumba ti sela txihindo, mtengo wa tona wu ti lava kuva wa 2.000.

¹⁴Vadyisi va tikhumba va to tutuma veya zivisa vathu va didhoropani ni va thembweni, se vona ve huma veya wona ti ti nga humelela.

¹⁵Ku ti ngako va di hokile ka Jesu, ve wona wu a nga ti ni txikwata txa mimoya a di khalahatshile, a di ambate, a di ni mapimo amanene va to telwa ngu dizowa.

¹⁶Ava va nga ti wona va to xawutela ati ti nga humelela ka m'thu wu a nga ti ni madhimoni ni mhaka ya tikhumba.

¹⁷Se ve khongotela Jesu ti to e khukha ditikoni kwawe.

¹⁸Jesu ngako a di bete ngalavani, m'thu wu a nga ti ni madhimoni a to mkombela kuzumba nayo.

¹⁹Aniko Jesu kha mtumelela, a to khene kwakwe: “Tsula mwani, ka va ka kwanu, u ya zivisa totshe ti Mkoma a nga ku mahela tona, ngu ku kupfela wusiwana.”

²⁰Se a to khukha, e khata kuhuwelela ditikoni ka Dhekapoli totshe ti a nga mahelwa tona ngu Jesu, se votshe ve xamala.

²¹Ngako Jesu a di tshawunyetile kambe ngu ngalava a txi ya mtxhatuko, va to ya tshangana masoni kwakwe vathu votala ngutu, hafuhi ni digova.

²²Konaho a to bwaka mmweyo wa vathangeli va disinagoga, ditina dakwe a dhanwako ku i Jayiro. Se a di mu woni, a to mu khizamela,

²³a txi mkombela ngu kukarateka a txi khene: “Mwanana wangu wa txihoranana a hafuhi ni kufa, ngono u ta msanzeka manza, a na kalamuka a txi hanya.”

²⁴Jesu a to longoloka nayo na a txi londetelwa ngu vathu votala, va nga txi mu kama.

²⁵Se mmweyo wa wamsikati a ti ti xuphwa ngu malwati a lingolengole, ngu txipimo txa digumi da malembe ni mambidi;

²⁶awu a nga tsimbila a txi xaniseka ngu kulava kuthumwa mu ka tiñanga to tala, a txi luza yotshe thomba yakwe, asi kalamuki, ka malwati yawa ma nga txi tamarisa kuya kubihani.

²⁷Ngako a di engisile va txi womba-womba ngu Jesu, a to ta bwaka hagari ka dibutho, a to ema ngu msana kwakwe Jesu, a txi mu gwesa nguwo yakwe;

²⁸nguko a ti ti khene: “Hambi idiku no sikota kugwesa syambalo sakwe dwe, ni na hanyiswa.”

²⁹Kha ditshuri, ngu ka yoneyo mbimo, wu to leka kuhumela mnoha, se ene a txi tipfa ha mmidi kwakwe ti to a hanyisilwe ka malwati ale.

³⁰Kunukunuko Jesu, a di pfite ti to mtamo wule wu humete kwakwe, a to tshembereka a txi wonetela dibutho, a txi khene: “I mani a nga gwesa tinguwo tangu kani?”

³¹Vagondiswa va to mu angula va txi kha vona: “Wa ti wona ti to vathu va kukama ngu otshe madhawa, se wa nga wotisa tito, ‘I mani a nga ni gwesa?’ ”

³²Kambe ene a to gula maso a txi rumarumela ngu kulava kuziva ti to i mani a nga maha tiya.

³³Sekoko awule wamsikati, na a txi dhudhumela ngu kuthava, ngu kuwa a nga txi tiziva tiya ti nga mu humelela, a to ya khizama masoni kwakwe, a txi mu txhamusela dotshe ditshuri. Se Jesu a nje khene kwakwe:

³⁴“Mwanangu, likholo lako li ku hanyisile, tsula ngu kuthutha, thuseka ka malwati ako.”

³⁵Ene a di ngadi a txi womba-womba, ku to bwaka vathu va kuta ngu m'tini ka mthangeli wa disinagoga va txi kha vona: “Mwanana wako a fite; se u karatela txani kambe M'gondisi kani?”

³⁶Aniko Jesu, na asi khatali txilo ngu mhaka yi yi nga ti wombwa, a to gela mthangeli wa disinagoga a txi khene: “U nga thave, tumela dwe.”

³⁷Se Jesu kha tumela ti to mmwani e tsula nayo, hahanze ka Pedro ni Jakobe ni Johani, mwanawe Jakobe.

³⁸Mbimo yi a nga hoka m'tini ka mthangeli wa disinagoga, a to ya mana masaluko a hombe, ni vathu va nga txi dila ni kupeketela tihuwa.

³⁹Se a txi va gela ku khene: “Masaluko awa nga txani ni kudila kuwa nga txani kani? Dihorana kha da fa, di to otela.”

⁴⁰Vona va to khata ku mu seka. Aniko Jesu a to humisa hahanze votshe vathu vale, a txi teka dwe tate ni mame wa mwanana wule wa txihoranana, kumweko ni vale va nga ti tile nayo, e wulela ka wukhalo wu a nga ti otelisitwe kona mwanana.

⁴¹Se a di mu ñote ngu diwoko a to womba a txi khene: “Talita kumi!” Ati ti wombako ku: “Txihoranana ni khani kwako, wuka!”

⁴²Kunukunuko, a to wuka a txi tsimbilatsimbila, nguko i ti wa tanga ya digumi da malembe ni mambidi. Votshe vathu ve xamala ngutu.

⁴³Ene a to va leletisisa ti to ni wammweyo asi thuki a txi tiziva ati ti nga maheka, se a txi va gela ti to ve ninga sakudya mwanana wule wa txihoranana.