Read chopi Marku 7 Bible Online

Marku 7 - chopi bible

Marku 7

¹Vafarisi ni vabhali vokari va nga ti tile ngu Jerusalema, va to ya sengeletana ka Jesu.

²Se ngako va txi wona vagondiswa vokari va Jesu, na va txi dya sakudya ngu manza a nzambwa, ti ti wombako ku va sa thanga ngu kusamba manza, va to sola.

³Kha ditshuri Vafarisi ni Vajudha votshe kha va dyi, va sa thanga ngu kusamba manza, nga tolovelo ya vakale vawe;

⁴kha va dyi txilo, mbimo yi va wuyako ngu kutsimbilani, va sa thanga ngu kusamba; ya ho yimwani mikhuwo va yi mahako ngu kulondeteta txikale: Kukuwula siya so sela ngu sona, ni timbiya, ni siya sa txikete.

⁵Vafarisi ni vabhali va to mu wotisa va txi kha vona: “Njitxani vagondiswa vako va si londeteli siheno sa vakale, eko va dyako sakudya va si thangi ngu kusamba manza kani?”

⁶Se ene a nje khene kwawe: “Mprofeti Isaya a wombile kwati ngu nganu, vaxengeteli, akuwa a nga bhala to khene: ‘Avava vathu vo ni dhumisa dwe dwe ngu sisofu sawe, kambe timbilu tawe ti kule ni nani.

⁷Kukhozela kwawe nga mahala, nguko tigondo ti va gondisako nzileleto sa vathu dwe.’

⁸Anu mi leka Mlayo wa Txizimu mi txi namarela ka siheno sa vathu.”

⁹Se a txi engeta a txi khene kwawe: “Mi eyisa mlayo wa Txizimu, kambe mi xayisa siheno sanu.

¹⁰ Nguko Mosi a ti khene: ‘Thava tate wako ni mame wako’, ni ku khene: ‘Awu a rukako tate wakwe ni mame wakwe, a na dawe efa.’

¹¹Kasi anu mi khanu: ‘Kha ku na mnandu hambi m'thu a txi khene ka tate wakwe mwendo mame wakwe: Sotshe si ni nga ti fanete ku kuvhuna ngu sona i korbani’, ati ti wombako mhamba ya kusawulelwa Txizimu;

¹²kha mi ngadi mi mu tumelela kumaha txilo txo vhuna tate wakwe mwendo mame wakwe.

¹³Ma eyisa dipswi da Txizimu ngu siheno sanu, si mi ninganako. Se mi maha simwani so tala so nga soneso.”

¹⁴Ngu msana a to engeta a txi ramba dibutho da vathu a txi va gela a txi khene: “Ni engiseni motshenu, mi txi engisisa.

¹⁵Ku walo txilo txi tako ngu hahanze ka m'thu, txi wulelako mndani kwakwe, txi sikotako ku mu bihisa; aniko asi si humako ngu mndani kwakwe ngu sona si mu bihisako.

¹⁶[Awu a ku ni tinzeve ta kuengisa a na engise.”]

¹⁷Ku ti ngako a di wulete nyumbani, e siya dibutho, vagondiswa vakwe va to mu wotisa ngu txifaniso txiya.

¹⁸Se a txi khene kwawe: “Kasi nanu mi ngadi mi txi pwata kupfisisa kani? Kha mi tizivi ti ta ku sotshe si si ku hahanze, ngako si txi wulela ka m'thu, kha si sikoti ku mu bihisa.

¹⁹Nguko kha si wuleli mbiluni kwakwe, kambe si ya mndani, se si ya humiswa txitingani kani?” (Mapswi awa ma txhamusa ti to sotshe sakudya si basile.)

²⁰Se a txi engeta a txi khene: “Asi si humako ka m'thu ngu sona si mu bihisako.

²¹Kha ditshuri, mndani timbiluni ka vathu, kuhuma mialakanyo yo biha: Wugelegele, wukhamba, kudaya,

²²wugango, kunavela ko biha, tshofu, kukanganyisa, ku ambi ti ñola, mabava, sisolo, kutikulisa, wukhwanda.

²³Wubihi wuwa wotshe wu huma ngu mndani, ngu wona wu bihisako m'thu.”

²⁴Ngako a txi khukha konaho, a to ya ditikoni ka Tiro ni Sidhoni. Se e ta wulela nyumbani kokari, na asi ti lavi kuziwa ngu m'thu, aniko a tandekile ku ti sisa.

²⁵Nguko wamsikati, awuwa mwanana wakwe wa muhorana a nga ti wuleletwe ngu moya wa nzambwa, a ti engisile ti to waho, se a txi ta, e ta ti wisa minengeni kwakwe.

²⁶Wamsikati wuwa i ti Mugriki wa lixaka la Vasiro-Fenikiya. A to mkombela ti to e tovela didhimoni di huma kwakwe.

²⁷Kambe Jesu a ti khene kwakwe: “Leka vanana ve thanga vona ve dya ve khura, nguko kha ta tshura kuteka sakudya sa vanana, si rinzwa ka siwana.”

²⁸Ene a to khene ka Jesu: “Ina, Mkoma! Aniko hambi i di toneto, siwana ni sona sa dya maruru awa ma wiswako ngu vanana hahatshi ka meza.”

²⁹Sekoko ene a to mu xamula a txi khene: “Ngu konaho ka dipswi diya, tsula, didhimoni di humile ka mwanana wako.”

³⁰Ku ti ngako a di tshumelete nyumbani kwakwe, a to ya mana mwanana wa dihorana a di otete ha ditahoni, na se didhimoni di di humile.

³¹Ngako a txi engeta e khukha ditikoni ka Tiro, a to pinda ngu nzila ya Sidhoni, a txi ya lineneni ka Galileya, e tshawunyeta ditiko da Dhekapoli.

³²Se ve tisa kwakwe m'thu wu i nga ti diphanzeve na a di ni txidimiti, ve mkombela ku e msanzeka manza txitimwi.

³³Ngako a di mu humisile hagari ka dibutho, a txi ya nayo phuho, a to wuleta titiho takwe tinzeveni ka diphanzeve, e thura lure, e mu gwesa lidimi ngu lona lure.

³⁴Se a to wona nzumani, a txi hefemuteka, a txi khene kwakwe: “Efata,” ati ti wombako ku “Tuleka!”

³⁵Se tinzeve takwe ti to tuleka, ni misiha ya lidimi lakwe yi to thuseka, se e womba-womba ta tinene.

³⁶Jesu a to va laya eto, ti to va si geli m'thu. Aniko hambiko a nga txi va laya eto, vona va ti simama kururutela mhaka yiya.

³⁷Se va to xamala ngutu, va txi kha vona: “A mahile totshe ngu mamahelo amanene. A mahile ti to maphanzeve me sikota kuengisa; siduma si sikota kuwombawomba.”