Read chopi Marku 8 Bible Online

Marku 8 - chopi bible

Marku 8

¹Ka masikuyo ku to engeta kutshangana dibutho da hombe, kambe va ti si nga ni sakudya. Se Jesu a to dhana vagondiswa vakwe a txi khene kwawe:

²“Ni pfela wusiwana dibutho diya, nguko masiku mararu va di zumbile ni nani, va si na sakudya.

³Ni txo va tshumetela timwayani kwawe va di ni nzala, va na jiyela ni nzila, nguko vamwani kwawe va tile ngu kule.”

⁴Vagondiswa vakwe va to mu xamula va txi kha vona: “Va nga lavelwa hani mapawu a ku va khurisa kona txiwulani muwa kani?”

⁵Ene a to va wotisa a txi khene: “Mi na ni mapawu mangahi kani?” Vona va nje kha vona: “Mtxhanu ni mambidi.”

⁶A to gela dibutho da vathu ve khalahatshela hahatshi, se e teka mapawu a mtxhanu ni mambidi, e bonga, e ma bhandela e ningela ka vagondiswa vakwe, kasiku vona va txi avela vathu.

⁷Se vona va ti ni sihakanyana kambe so mbi nyawula. Se a di si katekisile, a to leleta ti to ni sona si avelwa kwawe.

⁸Se va dyite ve khura; se ngu sikhwemu si si nga sala va to tata mtxhanu wa sirundu ni simbidi.

⁹Kasi ava va nga dya va ti hafuhi ka 4.000 wa vathu. Se e va tsulisa.

¹⁰Se kunukunuko a to wulela ngalavani ni vagondiswa vakwe, e tsula ka diphambo da Dalmanuta.

¹¹ Se Vafarisi va to huma ve khata kukanetisana nayo, ve kombela txikombiso txi txi humako nzumani, ngu ku mu duka.

¹²Se e hefemuteka moyani kwakwe, a txi khene: “Liveleko liya, li kombelela txani txikombiso kani? Kha ditshuri na mi gela ku khani: Liveleko liya kha li na mbi ningwa txikombiso!”

¹³Se e va leka, a txi engeta e wulela ngalavani, a txi ya mtxhatuko.

¹⁴Kambe vagondiswa va ti divate kuteka mapawu, va ti kova ni dipawu dimwedo ngalavani dwe.

¹⁵ Se e va laya a txi khene: “Ti woneleni, mi thava mtshumbelo wa Vafarisi ni mtshumbelo wa Herodha!”

¹⁶Se vona va txi alakanyisana va txi kha vona: “Ene a womba tiya mwendo ngu kuwa hi ku si nga ni mapawu.”

¹⁷Ku ti ngako Jesu a txi tipfa, a ti khene kwawe: “Nji txani mi txi wombawombisana ngu kuwa mi singako ni mapawu kani? Kha mi nzi ku ti mana ni ku ti pfisisa kani? Timbilu tanu ni konkuwa ti ngadi bangisile tiya kani?

¹⁸Mi na ni maso, kasi kha mi woni; mi na ni tinzeve kasi kha mi engisi, kani? Kha mi alakanyi,

¹⁹mbimo yile ni nga bhandela mtxhanu wa mapawu ni avela ka 5.000 wa vathu, ti to nzirundu singani mi nga tata ngu sikhwemu si mi nga rolela kani?” Va to xamula va txi kha vona kwakwe: “Digumi ni simbidi.”

²⁰“Ni mbimo yi ni nga avela mtxhanu wa mapawu ni mambidi ka 4.000 wa vathu, nzirundu singani mi nga tata ngu sikhwemu si mi nga rolela kani?” Va txi kha vona: “Mtxhanu ni simbidi.”

²¹Se ene a to khene kwawe: “Ina kha mi nzi ku ti pfisisa kani?”

²²Se a to hoka Bhetsayidha; ve mtisela dibhofu, ve mkombela ti to e di gwesa.

²³Ene a to mñola wu wa dibhofu ngu diwoko, e myisa hahanze ka mkhokhola, e mu thurela lure ka maso akwe e msanzeka manza, a txi mu wotisa a txi khene: “Wa wona txilo kani?”

²⁴Ku ti ngako a txi khata kuwona a to khene: “Na wona vathu, no va wona va txi nga mindonga yi tsimbilatsimbilako.”

²⁵Se a to engeta e sanzeka manza ka maso a dibhofu, se dona di to wona ta tinene, se di hanyiswa, di sikota kuwona sotshe kwati.

²⁶Se ene a to mu tshumeta e tsula m'tini kwakwe, a txi khene: “U nga wulele mkhokholani.”

²⁷Se Jesu a to khukha ni vagondiswa vakwe, va txi ya ka mikhokhola ya Khezareya ka Filipi. Hanzila a va mahete txiwotiso txiya: “Vathu va kha vona ngani mani kani?”

²⁸Se vona va to angula va txi kha vona: “Va kha vona u Johani Mubhabhatisi, vamwani va u Elija, vamwani kambe va kha vona u mmweyo wa vaprofeti.” Se ene a txi engeta a txi va wotisa a txi khene:

²⁹ “Anu-ko, mi khanu ngani mani kani?” Pedro a to xamula a txi khene: “Awe ngawe Kristu.”

³⁰Se ene a to va gela ngu kutsanisa ti to va si thuki ve womba-womba ngu ngene ka vathu.

³¹Se a to khata ku va gondisa tito: “Mwanana wa M'thu a fanete kuxaniseka, a txi nyenywa ngu madhota a ditiko ni vaphaxeli va hombe ni vabhali, e dawa, e tshumela a txi wuka ngu ditshiku da wuraru.”

³²Mhaka yiya a to yi wombisisa ha kubasani. Pedro a to mteka e tsula nayo phuho, a txi khata ku mu kawuka.

³³Aniko Jesu a to tshembereka e wonetela vagondiswa, e kawuka Pedro, a txi khene: “Khukha masoni kwangu, Sathani! Khu khatali ngu timhaka ta Txizimu, u khatala ngu timhaka ta vathu.”

³⁴Se a di dhani dibutho kumweko ni vagondiswa, a to va gela a txi khene: “Ngako m'thu a txi lava ku ni londisa, a na ti leke apune, a txi rwala txihambano txakwe, a txi ni londisa.

³⁵Awu a lavako kuhulukisa wutomi wakwe a na luzekelwa ngu wona ani wu a luzekelwako ngu wutomi wakwe ngu mhaka yangu ni Evhangeli, a na wu hulukisa.

³⁶Nguko ti na vhuna txani ka m'thu kumana dibhindu da mafu otshe e mwalalelwa ngu moya wakwe kani?

³⁷Se m'thu a na humisa txani kasi kutekisa moya wakwe kani?

³⁸Nguko awu a ku ni tingana ngu ngani ni mapswi angu masoni ka liveleko liya lo mbi thembeka masoni ka Txizimu ni la vaonhi, nene Mwanana wa M'thu a na va ni tingana ngu ngene, ditshiku di a no wuya ni wudhumo wa Tate wakwe, ni tingelozi to sawuleka.”