Read chopi Marku 9 Bible Online

Marku 9 - chopi bible

Marku 9

¹A to engeta a txi khene kwawe: “Kha ditshuri na mi gela, ni khani: Vamwani va va kuho kona hawa kha va na mbi pfa lifo, va sinzi kuwona Mfumo wa Txizimu, wu txi ta ngu mtamo.”

²Ku di pindile mtxhanu wa masiku ni dimwedo, Jesu a to teka Pedro ni Jakobe ni Johani, e tsula navo, vona vokha, ka mmango wa kulapha ngutu, se a txi hinduka mmidi wakwe masoni kwawe.

³Tinguwo takwe ti hinduka ti txi phatima, ti txi basa ngutu, ti to kha nga ho ha ditikoni awu a sikotako ku ti kuwula, ti txi basisa ku nga toneto.

⁴Se ku to woneka masoni kwawe Elija ni Mosi na va txi womba-womba ni Jesu.

⁵Pedro a to womba ka Jesu a txi khene: “M'gondisi, ndinene ti to hi zumba konahawa; hi na aka midhuti miraru: Wumwewo mbwako, wumwani mbwa Mosi ni wumwani mbwa Elija.”

⁶Nguko ene asi ti zivi ti a nga txi womba tona, nguko va ti ni dizowa da hombe.

⁷ Sekoko, ku to humelela direfu, adi di nga ta va fenengeta ngu mtsudi wa dona, se ngu ka dona ku to pfala dipswi di txi kha dona: “Awuwa i Mwanana wangu ni mu randako. Mu engiseni!”

⁸Se kunukunuko, mbimo yi va nga rumaruma, kha va wona mmwani m'thu hahanze ka Jesu ekha, a nga ti navo.

⁹Mbimo yi va nga txi relela ngu mmangoni, a to va tsimba ti to va si geli m'thu ati va nga ti wona kala Mwanana wa M'thu e wuka ka vakufa.

¹⁰Vona va to yi veketa mhaka yiya, kambe va txi kanetisana ngu txawe ngu kulava kuziva ti to ti womba txani kuwuka ngu ka vakufa.

¹¹Se ve mu wotisa, va txi kha vona: “Vabhali va womba ngu txani ti to Elija a fanete kuthanga e ta kani?”

¹²A to va angula a txi khene: “Kha ditshuri Elija a nata kuthanga, a ta wuseta sotshe; kambe ti bhalisilwe kutxani ngu mhaka ya Mwanana wa M'thu, ti ta ku a fanete kuxaniseka ngutu ni kunyenywa kani?

¹³Kambe na mi gela ti ta ku Elija a tile, se va mmahile totshe ti va nga ti lava, kota nga ti ti nga bhalwa ngu mhaka yakwe.”

¹⁴Ku ti ngako va di hokile ka vagondiswa, va to wona dibutho da hombe di di va randete, ni vabhali, va txi kanetisana navo.

¹⁵Ngako dibutho di txi wona Jesu, di to xamala ngutu, se ve mu tutumela kuya mlosa.

¹⁶Ene a to va wotisa a txi khene: “Mi kanetisana navo ngu txani kani?”

¹⁷Mmweyo hagari ka dibutho a to xamula a txi khene: “M'gondisi, ni tisile mwanana wangu kwako; ana ni moya wa wuduma.

¹⁸Hani ni hani wu mu ñolako, wo mu ginyalata hahatshi, se ene e pupumela diphutu, e gegeresela makwasa se a txi oma sihango. Ni kombete vagondiswa ti to ve wu tovela, kambe va tandekile!”

¹⁹Jesu a to xamula a txi khene: “Anu, liveleko la kwa mbi kholwa, ni na va ni nanu kala mbimo muni? Ni na timisela ngu nganu kala txikhati muni kani? Mu neheni kwangu.”

²⁰Se va to mu yisa ka Jesu. Se ngako moya wu txi wona Jesu, wu to txherukisa ngutu mfana, a txi wa hahatshi e puluwunda ni kupupuma diphutu.

²¹Jesu a to wotisa tate wakwe, a txi khene: “Ti mkhatile mbimo muni tiya kani?” A txi khene: “Kukhukhela ha wananani kwakwe.

²²Se sikhati sasingi wu mu tshotshile mndiloni ni matini kasi ku mu lovisa. Kambe ngako u txi sikota, hi vhune, hi pfele wusiwana.”

²³Jesu a ti khene kwakwe: “Ngako u txi sikota! Totshe ta koteka ka wu a kholwako.”

²⁴Se tate wa mwanana a to kwangula, a txi khene: “Na kholwa! Aniko ni vhune ku ambi kholwa kwangu.”

²⁵Jesu ngako a txi wona dibutho di txi mu tutumela, a to kawuka moya wa nzambwa a txi khene: “Awe moya wa wuduma ni wa wuphanzeve, na kuruma: Huma, u nga swe u txi wulela kwakwe.”

²⁶Wona wu to peka huwa, wu txi mu zuza-zuza ngutu, wu txi huma; se mfana a to tsivala, se vavangi ve pimisa ti to a fite.

²⁷Kambe Jesu a to mñola ngu diwoko, a txi mu wusa, se ene a txi ema.

²⁸Ku ti ngako Jesu a di wulete nyumbani, vagondiswa vakwe va to mu wotisa va di vokha, va txi kha vona: “Athu hi tandekisile kutxani ku wu tovela kani?”

²⁹Jesu a ti khene kwawe: “Lixaka liya kha li humiswi ngu tximwani txilo, hahanze ka kukhongela.”

³⁰Ngako va di khukhile haleya, va to tshawunyeta ngu Galileya. Ene Jesu asi ti lavi ti to ti txi ziwa ngu m'thu,

³¹nguko a ti lava kugondisa vagondiswa vakwe. A txi va gela ku khene: “Mwanana wa M'thu a na ningelwa manzani ka vathu. Vona va na m'daya, kambe ma di pindile masiku mararu msana ka kufa kwakwe, ene a na wuka.”

³²Vona va si ma manisisi mapswi awa, kambe va ti thava ku mu wotisa.

³³Se ve hoka Kapernawume. Jesu, ngako va di tshanganile nyumbani a to va wotisa a txi khene: “I mhaka muni mi nga txi kanetisana ngu yona ha nzila kani?”

³⁴ Vona va to malala, nguko mhaka yi va nga txi kanetisana ngu yona i ti yo lava kuziva tito, hagari kwawe, wa hombe ngu mani.

³⁵Ti di mahile eto, Jesu a to khalahatsha, ngu msana e dhana va digumi ni vambidi, a txi va gela ku khene: “Awu a lavako kumaha wo khata, a na ti mahe wo gwitisa ka votshelele ni txithumi txa votshelele.”

³⁶Msana keto, a to teka mwanana wam'dotho, a txi mu veka hagari kwawe, a txi mkhutarela, a txi va gela a txi khene:

³⁷ “Awu a no amukela tximwananana txo nga tiya ngu ditina dangu, ngani a ni amukelako. Se awu a ni amukelako kha amukeli ani, aniko a amukela awule a nga ni ruma.”

³⁸Johani a ti khene kwakwe: “M'gondisi, hi woni m'thu a txi tovela madhimoni ngu ditina dako. Ngako asi tsimbiliko kumweko ni nathu, hi mu tsimbile.”

³⁹Jesu a to angula a txi khene: “Mi nga mu tsimbeni, nguko kha nga ho m'thu a sikotako kumaha txixamaliso ngu mtamo wa ditina dangu, e tshumela ngu msana a txi womba-womba kubiha ngu ngani.

⁴⁰ Awule asi lwiko ni nathu, a ema ni nathu.

⁴¹Awule a no mi ninga muhindo wa mati o sela ngu mhaka ya kuva mi di vagondiswa va Kristu, kha ditshuri na mi gela ti to kha na mbi mwalalelwa ngu dihelo yakwe.”

⁴²“Wuhi ni wuhi a khuvekisako mmweyo wa sivananana siya si kholwako kwangu, ti nga va i di txhuko kwakwe, ngako va txi mu sunga dirigwi da txigayo mkoloni, se ngu msana va txi mu rinza digovani.

⁴³Ngako dianza dako di txi kumahisa txionho, di wile, nguko ta vhuna ngutu kwako, kuwulela kuhanyiswani u di txilima, kupinda kuyiswa, u di ni otshe manza ako a mambidi Gehena ka mndilo wo mbi timeka,

⁴⁴[ahawa mbungu yawe yi si fiko, ni mndilo wu si timekiko.]

⁴⁵Ngako mkondo wako wu txi kumahisa txionho, wu wile; ta vhuna ngutu kwako kuwulela kuhanyiswani na u txi khwita, kupinda kuyiswa Gehena u di ni yotshe mikondo yako,

⁴⁶[ahawa mbungu yawe yi si fiko, ni mndilo wu si timekiko.]

⁴⁷Se ngako diso dako di txi kuyisa txionhoni, di thavise; ta vhuna ngutu kwako kuwulela Mfumoni ka Txizimu ni diso dimwedo, kupinda kuyiswa Gehena u di ni maso ako a mambidi;

⁴⁸ahawa mbungu yawe yi si fiko, ni mndilo wu si timekiko.”

⁴⁹“Nguko mmwani ni mmwani a na lungwa ngu mndilo, kufana ni mhamba yi lungwako ngu mnyu.

⁵⁰ Mnyu njilo txo tshamba, aniko ngako mnyu wu txi guma mtamo, mi na wu lunga ngu txani wona kani? Zumbani ni mnyu mndani kwanu, mi txi va ni kudikha mmweyo ni mmweyo.”