Read chopi Luka 11 Bible Online

Luka 11 - chopi bible

Luka 11

¹Ku ti ngako Jesu a txi khongela ka wukhalo wokari, txikhati txi a nga gwita, mmweyo ka vagondiswa vakwe a to mkombela a txi khene: “Mkoma, hi gondise kukhongela, nga Johani nene a nga gondisa vagondiswa vakwe.”

²Jesu a to va xamula a txi khene: “Mbimo yi mi khongelako, indani khanu: ‘Tata, ditina dako di na sawulwe, wu nate kwathu mfumo wako,

³Hi he sakudya sathu sa ditshiku ni ditshiku;

⁴Hi divalele sionho sathu, nguko ha va divalela ava va ku ni minandu kwathu; u nga hi leke hi txi wa kudukwani.’ ”

⁵A va gete kambe ku khene: “Ngako mmweyo wanu, awu a ku, a di ni mndoni, e mu yela hagari ka wusiku, a txi ya khene kwakwe: ‘He mndoni wangu, hinga ni lomba mapawu mararu,

⁶nguko a bwakile mmweyo wa vandoni vangu, se kha ni nga ni txilo txa ku mninga’,

⁷se ene a txi angula a di nyumbani a txi khene: ‘U nga ni karate, ditimba se di sekilwe; vanana vangu ni nani hi otete, kha ni sikoti kuwuka ni txi kuninga txilo.’ ” Jesu a engetile a txi khene:

⁸“Na mi gela ku khani, hambi a txi lamba kuwuka, a ta mu ha mapawu ngu kuva i di mndoni wakwe, a na za a txi wuka ngu mhaka ya kusimamisa kwakwe, a txi mu ha si asi lavako.”

⁹“Na mi gela kambe ku khani: Kombelani, mi na ningwa ngu Txizimu, lavani, mi na si mana; gogotani ditimba, mi na tulelwa.

¹⁰Nguko wuhi ni wuhi a kombelako wa hiwa; awu a lavako, wa si mana; awu a gogotako ditimba, wa tulelwa.

¹¹I mani hagari kwanu, awu i ku tate, ngako mwanana a txi mkombela txihaka a mningako mnyoka, asi mningi txihaka kani?

¹²Mwendo kambe ngako mwanana a txi kombela dianda, a nga mninga hume kani?

¹³Ngu toneto, eko hambi anu, mi ku vabihi, mi zivako kuha sa sinene vanana vanu, ngutu-ngutu Tate wa nzumani a na pindisa ngutu kuninga Moya wakwe wo Sawuleka, ka vale va mkombelako!”

¹⁴Se a to tovela didhimoni da txiduma. Ku ti ngako didhimoni di di humile, txiduma txi to womba-womba, se mabutho me xamala.

¹⁵ Vamwani va txi kha vona: “A tovela madhimoni ngu Bhelzebhule, mkoma wa madhimoni.”

¹⁶Vamwani kambe va to m'duka ngu kukombela txidiwukiso txa kuta ngu nzumani.

¹⁷Kambe ene, ngu kuziva mialakanyo yawe, a to khene kwawe: “Mfumo wuhi ni wuhi wu ti bhandako wupune wu ti lwisa, wu na hangalaka. Se nyumba yihi ni yihi yi ti bhandako yipune, yi ti lwisa, yi na wa.

¹⁸Ngu konaho, Sathani nene, ngako a txi ti bhanda apune e ti lwisa, mfumo wakwe wu na tsanisa kutxani kani, eko mi ku khanu ani ni tovela madhimoni ngu Bhelzebhule kani?

¹⁹Ngako kha ditshuri ni txi tovela madhimoni ngu Bhelzebhule, valondeteli vanu va ma tovela ngu mani? Ngu konaho, vona va na va valamuli vanu.

²⁰Kambe ngako ni txi tovela madhimoni ngu litiho la Txizimu, kha ditshuri Mfumo wa Txizimu wu hokile kwanu.

²¹Ngako m'thu wa wurena a txi ñola matxhari, e woneleta nyumba yakwe, simaha sakwe sotshe si zumbisekile kha kwati.

²²Kambe ngako ku txi ta mmwani, awu a ku ni mtamo kupinda ene, a txi mu xomela e mu xula, wa mu honyola matxhari awa a nga ti ma thembile, a txi avela vathu asi nene a nga ti handile.

²³ Awuwa asi emiko ni nani, a lwa ni nani; awu asi sengeletiko ni nani wa hangalasa.”

²⁴“Moya wa nzambwa, ngako wu txi huma ka m'thu, wu tsimbilela mu ka makhalo o mbi na mati, wu txi lava ko humula. Ngako wu txi kupwata, wu womba tiya: ‘Ni na tshumelela nyumbani kwangu, amu ni nga humela kona.’

²⁵Se ngako wu txi hoka kona, wu yi mana yi di hiyetwe, na kambe yi di longisilwe.

²⁶Sekoko wu tsula wi txi ya lava mimoya yimwani ya mtxhanu ni yimbidi, ayi yi wu pindako ngu wubihi, se yi wulela yi zumba konamo. Se mazumbelo o gwitisa a m'thu wuwa ma phinduka me maha o biha kupinda o khata.”

²⁷Se a di ngadi a txi womba timhaketo wamsikati wu a ku hagari ka dibutho a to gula dipswi dakwe, a txi khene: “A katekile mame wu a nga kuveleka ni titshumbu ti u nga mama!”

²⁸Jesu a txi khene: “Kambe ngutu-ngutu va katekile ava va engisako dipswi da Txizimu, va txi di vekisa.”

²⁹ Ku ti ngako dibutho di txi sengeletana, Jesu a ti khene: “Liveleko liya lo biha li kombela txidiwukiso, aniko kha li na mbi ningwa txidiwukiso tximwani, i si nga txidiwukiso txa Jona.

³⁰Nguko, nga kuwa Jona a nga va i di txidiwukiso ka va Ninivha, Mwanana wa M'thu nene a na va txidiwukiso ka lixaka liya.

³¹Mkoma wa msikati wa kuta ngu Wulambwe a na khukha a txi ema, kulamulwani, ni vathu va liveleko liya, a na va kona, nguko a tile ngu siyekamitshi kuta engisa wuzivi wa Solomoni; kasi wa hombe kupinda Solomoni waho hawa.

³²Vathu va Ninivha va na ema kulamulwani kumweko ni liveleko liya, va na li kona, nguko va hundulukile ngako va txi txhumayelwa ngu Jona; kasi wa hombe kupinda Jona waho hawa.”

³³ “Kha ku na m'thu wu a lumekako dilambu kasi ku di veka kusisalani, mwendo hahatshi ka txirundu; aniko di hayekwa ha txipandeni, ti to ava va wulelako ve wona kuwonekela.

³⁴Dilambu da mmidi ngu diso; ngu konaho, ngako diso dako di di lulamile, mmidi wako wotshe wu kuwonekelani; aniko ngako di di bihile, mmidi wako ni wona wu txidemani.

³⁵Ti wonele ti to kuwonekela kuwa ku ku kwako ku nga phinduke ku txi maha txidema.

³⁶Ngako mmidi wako wotshe wu txi woningwa, na wu si nga ni txidema, ngu kona wu no woningwa wotshe kufana ni mbimo yi dilambu di ku woningako ngu kuwonekela ka dona.”

³⁷Jesu a di ngadi a txi womba-womba, mfarisi a to mkombela ku eya dya nayo. Se ene a to wulela eya khalahatsha ha mezani.

³⁸Kambe mfarisi a to xamala ngako a txi wona ti to Jesu kha thanga ngu kusamba, a sanzi kudya.

³⁹Se Mkoma a txi khene kwakwe: “Kunene, anu Vafarisi mi kuwula m'hindo ni mbiya hahanze ka sona, kuve mndani mi tate ngu kupa ni tshofu.

⁴⁰Mabhembanu! Awu a nga maha sa hahanze hi nga ene a nga maha ni sa mndani kani?

⁴¹Aniko ningani ka sikulungu asi mi ku naso, ngu kona silo sotshe si no va si di basile kwanu.”

⁴²“Kambe mi na ni dikhombo, anu Vafarisi nguko mi humisa sa wugumi ka mbowa ni ka matawa otshe ni ka yotshe mindiwo ya mazokoro, mi txi leka kululama ni lirando la Txizimu! Mi ti fanete ku ti maha eto, mi si leki kumaha tile to thanga.”

⁴³“Mi na ni dikhombo, anu Vafarisi, nguko mi randa sikhalo si si ku masoni, masinagogani, ni kuloswa mitendelani.

⁴⁴Mi na ni dikhombo anu, nguko mi fana ni mayiva, aawa ma si wonekiko, aawa vathu va ma kandetelako, va si ma zivi.”

⁴⁵Se mmwani wa vagondisi va Mlayo a to xamula a txhi khene: “M'gondisi, ngu kuwombisa eto, wa hi ruketela nanathu.”

⁴⁶Aniko, ene a ti khene: “Mi na ni dikhombo anu vagondisi va Mlayo, nguko mi rweka vathu mirwalo yi yi va nemelako, kuve anu ma lamba ku yi gwesa mirwaloyo, hambi ngu litiho limwelo.”

⁴⁷“Mi na ni dikhombo anu, nguko mi aka mayiva a Vaprofeti va va nga dawa ngu vatate vanu.

⁴⁸Kha ditshuri mi maha wufakazi wa mithumo ya vatate vanu, na mi txi yi tumela, nguko vona ngu vona va nga va daya, se anu mi aka mayiva awe.

⁴⁹Ngu konaho, wuzivi wa Txizimu wu wombile, wu txi kha wona: ‘Ni na va rumela vaprofeti ni vapostoli, va na daya vamwani kwawe, ve xanisa vamwani.’

⁵⁰Ati to mnoha wa vaprofeti votshe wu wu nga theketwa kukhukhela kutumbulukani ka mafu, wu txi vilwa ka liveleko liya,

⁵¹kukhata ngu mnoha wa Abhele kala kuhetisela ngu wa Zakariya, awu a nga dawa hagari ka txiluvelo ni Wukhalo wo Sawuleka ngutu; inna, na mi gela ni khani: Wu na vilwa ka liveleko liya.

⁵²Mi na ni dikhombo, anu vagondisi va Mlayo, nguko mi tekile khiya ya tigondo, se anu kha ma wulela, kambe mi tsimbile ava va nga txi lava kuwulela.”

⁵³Ku ti ngako a txi huma, konaho vabhali ni Vafarisi va to khata ku mu wukela ni ku mu txhokolotela ngu mapswi, ti to e womba-womba timhaka to tala,

⁵⁴Ve mu riyela kasiku mwendo va nga mñola ngu mapswi a kuwombwa ngu txisofu txakwe.