Read chopi Luka 12 Bible Online

Luka 12 - chopi bible

Luka 12

¹Ka yoneyo mbimo, vathu va ti sengeletanile kwakwe ngu magumi a mazana, ahawa koza ve kandetelana. Se Jesu a to khata kugela vagondiswa vakwe a txi khene: “Ti woneleni ka mtshumbelo wa Vafarisi, i ku wuxengeteli.

² Nguko kha ku na txilo txi txi nga fenengetwa, atxi txi no mbi vhunungulwa, hambi txi txi nga siswa, txi no mbi ziwa.

³Ngu toneto, totshe ti mi nga ti womba txidemani, ti na pfala kuwonekelani; ati mi nga lengelana tinzeveni, tinyumbani ti na wombwa siroroni ka tinyumba.”

⁴“Vangana vangu, na mi gela ku khani: Mi nga thukeni mi thava ava va dayako mmidi, ngu msana va si sikotiko kumaha txilo kambe.

⁵Aniko ni na mi kombisa awu mi fanelako ku mu thava. Thavani awu, msana ka kudaya mmidi, a ku ni mtamo wa kutshotsha m'thu mndiloni. Ina, ani na mi gela, thavani eneyo.”

⁶“Ina mtxhanu wa sindili kha si xawi ngu tipeni timbidi kani? Aniko kha ku na tximwetxo ka sona, atxi txi nga divalwa masoni ka Txizimu.

⁷Hambi misisi ya msungo wanu, yi batwe yotshe. Mi nga thaveni txilo, anu mi pala sindili so tala.”

⁸“Wuhi ni wuhi a no ni tumela masoni ka vathu, Mwanana wa M'thu nene a na mtumela masoni ka tingelozi ta Txizimu.

⁹Kambe awu a ni lambako masoni ka vathu, a na lambwa nene masoni ka tingelozi ta Txizimu.”

¹⁰ “Wuhi ni wuhi a hoxelako Mwanana wa M'thu ngu mapswi, a na divalelwa. Aniko awu a ruketelako Moya wo Sawuleka, kha na mbi divalelwa.

¹¹Ngako va txi mi yisa masinagogani ni ka vafumeli, ni ka vakoma, mi nga thukeni mi txi kana-kana ngu ti mi no ti xamulelisa tona, ni ti mi no womba.

¹²Nguko Moya wo Sawuleka wu na mi gondisa ka yoneyo mbimo ati mi fanelako ku ti womba.”

¹³Mmweyo hagari ka dibutho a to womba ka Jesu a txi khene: “M'gondisi, gela mwanathu a txi abana ni nani thomba.”

¹⁴Ene a to angula a txi khene: “He mawe! I mani a nga ni maha mlamuli mwendo muaveli wa tithomba hagari kwanu kani?”

¹⁵Se a txi khene kwawe: “Ti woneleni ta tinene ka hanyelo ya timbiti, nguko hambi m'thu a di taletwe ngu thomba, wutomi wakwe kha wu tsaniswi ngu si a ku naso.”

¹⁶Se a to va mahela txidinganiso a txi khene: “Thembwe ya nyatithombe wokari yi ti pfuni ngutu.

¹⁷Konaho ene a to pimisa a txi khene: ‘Ni na mahisa kutxani kani? Kha ni nga ni wukhalo wo veka kona silo sangu!’

¹⁸Se a to alakanya a txi khene: ‘Ni na mahisa tiya: Ni na dhandula sisangala sangu, ni txi si maha sa hombe, se ni na thelela konemo fulaho yangu ni sotshe silo sangu.

¹⁹Se ni na gela moya wangu ni txi khani: Moya wangu, u na ni silo sasingi, asi si no heta malembe amangi. Humula, dyana, sela u txi ti tsakela.’

²⁰Aniko Txizimu txi to mu gela txi txi kha txona: ‘Diphuphuluwe, ka wona wusiku wu, moya wako wu na lawa. Se tithomba ti u nga sengeletela, ti na sala ni mani kani?’

²¹Ngu toneto, ti mahisako tona ka wule a sengeletelako tithomba, na i si nga nyatithombe wa txilo masoni ka Txizimu.”

²²Se a to khene ka vagondiswa vakwe: “Ngu toneto, ni khani kwanu: Mi nga thukeni mi vilela ngu sa wutomi wanu, ti to mi na dya txani, hambi ni si sa mmidi wanu, ti to mi na ambala txani.

²³Wutomi wu pala sakudya, mmidi ni wona wu pala syambalo.

²⁴Alakanyani magwana, nguko kha ma phayi, kha ma eluli, kha ma na txisangala ni dithala. Aniko Txizimu txa ma phamela. Kasi i di anu ma si pinda ngutu sinyana.

²⁵I mani kwanu, awu a sikotako kuengetela, hambi mbimoanyana yidotho ya kuhanya kwakwe, ngu kuvilela kwakwe kani?

²⁶Se ngako mi tandwako ngu tximaha txa txidotho, mi vilelela txani simwani kani?

²⁷Wonani makhoñwa: Kha ma thumi, kha ma luki, aniko ani na mi gela tito, hambi Solomoni wudhumoni kwakwe, kha bomba nga dimwedo ka ona.

²⁸Se akuwa Txizimu txi ambekisako tiya mwasi wu wu ku txitingani nyamsi, kuve mangwana wu na tshotshwa mndiloni, ngutu-ngutu txi na mi ambeka anu, vathu va kukholwa ka kudotho!

²⁹Kambe anu mi nga vileleni ngu si mi no dya ni si mi no sela, mi nga kanakaneni;

³⁰Nguko silo siya sotshe si vilelwa ngu vamatiko va ha mafuni; aniko anu Tate wanu wa tiziva ti to ma si pwata.

³¹Ati i ku tona, lavani Mfumo wa Txizimu, se silo siya sotshe mi na engetelwa.

³²Mi nga thaveni txilo, anu mi ku mtxhambi wa wudothoanyana, nguko ti tsakisile Tate wanu ku mi ninga Mfumo!”

³³“Xavisani simaha sanu, mi txi vhuna sisiwana. Mahani mikwama yo mbi sakala, mi txi veketa txuma txanu txo mbi guma nzumani, amuwa ku si tshuketiko dikhamba, hambi sumba yi si doliko.

³⁴Nguko ahawa txuma txanu txi ku kona, timbilu tanu nitona ti konaho.”

³⁵“Sungani mitshunga siwununi kwanu, mi lumeka malambu anu.

³⁶Ti fananiseni ni sithumi sa vavamna avava va verelako kuwuya ka mkoma wawe, a wuyako ngu m'busoni ka mtxhadho, kasiku ve mu tulela ngu txikuluveta, mbimo yi a bwakako a txi gogota ditimba.

³⁷Si katekile sithumi sile, nyamne wa sona, mbimo yi a bwakako a nota si mana si txi wonelela. Kha ditshuri na mi gela, ene a nata sunga dithawula txiwununi, a txi va khalahatshisa ha mezani, a txi tsimbila ngu ka mmweyo ni mmweyo, a txi va phamela sakudya.

³⁸Ngako a txi tshumela a txi ta ka txikhati txa wumbidi txa kuwonelela, mwendo txa wuraru, a ta va manisa toneto, va katekile.

³⁹Yi engisiseni kha kwati mhaka yiya: Idiku nyamne wa m'ti wo txi ziva txikhati txi di nota ngu txona dikhamba, nga asi leki nyumba yakwe yi faywa.”

⁴⁰“Nananu, zumbani mi di ti lulamisete, nguko Mwanana wa M'thu a nata ngu txikhati txi mi si txi pimiko.”

⁴¹Konaho Pedro a ti khene: “Mkoma, u mahela athu txidinganisotxo mwendo u mahela votshe kani?”

⁴²Mkoma a xamute a txi khene: “Ngu wuhi muwoneleti wo thembeka ni kutxhariha, awu Mkoma a no mu veka masoni ka sithumi, kasiku e avela sakudya ngu mbimo yi yi lavekako kani?

⁴³Txi katekile txithumi txile, nyamne wa txona, ngako a txi bwaka, a nota txi mana txi txi thumisa toneto!

⁴⁴Ngu ditshuri na mi gela ku khani, ene a nata txi maha muwoneleti wa silo sakwe.

⁴⁵Aniko, ngako txithumi txile txi txi pimisa mbiluni ka txona, txi txi kha txona: ‘Nyamne wangu wa swela kubwaka’, txi khata kupeketela sithumi sa mazambi ni sa mahorana, txi dya, txi sela, se txi leva,

⁴⁶Nyamne wa txona a nata ngu ditshiku do mbi ziviswa ni txikhati txo mbi ziwa, ene a nata txi tsayisa ngu mtamo e txi veka kumweko ni vale vo mbi thembeka.”

⁴⁷“Txithumi txile txi zivako kuranda ka nyamne wa txona, aniko txi si ti lulamiseliko, txi si thumiko madingano ni kuranda ka nyamne wa txona, txi na kwapelwa kakungi.

⁴⁸Aniko, awule a nga mbi kuziva kuranda ka nyamne wakwe, se a txi maha to fanelwa ngu kukwapelwa, a na kwapwa ka kudotho. Awule a nga ningwa sasingi, kwakwe ku nata lawa sasingi; ani wule a nga vekelwa sasingi, kwakwe ku nata vilwa sasingi.”

⁴⁹“Ani ni tete kuta rinza mndilo ha mafuni, se kuranda kwangu ku ta ti to wu txi tura ni konkuwa.

⁵⁰ Ka ho kubhabhatiswa kuwa ni fanelako ku kuamukela, aniko eto ni xanisekisako tona kala mbimo yi ku no tatiseka ngu yona!

⁵¹Mi pimisa ti to ni tete ku ta simeka kudikha ha ditikoni kani? Ahim-him! Ani na mi gela ti to ni nehile kuhambana.

⁵²Nguko kukhukhela konakuwa, ka nyumba yi yi ku ni mtxhanu wa vathu, va na abaniswa, vararu va txi wukela vambidi, vambidi va txi wukela vararu;

⁵³Va na abaniswa: Tate a na wukela mwanana wakwe wa dizambi, mwanana wa dizambi a na wukela tate; mame a na wukela mwanana wakwe wa muhorana; mwanana wa muhorana a na wukela mame; masale a na wukela mamanyani, mamanyani a na wukela masale.”

⁵⁴Se a to gela dibutho ku khene: “Ditshiku di mi wonako direfu di txi huma ngu wulenge, mi kuluveta mi txi khanu: ‘Nzuma yi nana’, se ti txi mahisa toneto.

⁵⁵Ngako ku txi peka diphuho da wulambwe, mi khanu: ‘Li na vaho lisani’, se ku txi mahisa toneto.

⁵⁶Anu vaxengeteli mi ziva kutxhamusela khohe ya nzuma ni mafu, se ngu kutxani mi si sikotiko kutxhamusela mbimo yi mi ku ka yona kani?”

⁵⁷“Ngu kutxani mi si lamuli mipune ati ti nga lulama kani?

⁵⁸Ngako u txi ya wukomani ni wu u phikizanako nayo, duketa kuwila mhaka u di ngadi hanzila nayo, kasiku asi ku ndindeli ka mlamuli, se mlamuli a txi kuningela ka diphoyisa, diphoyisa di txi kurethela mkorani.

⁵⁹Na kugela ku khani: Txima khu na mbi huma u sa diha male yotshe.”