Read chopi Luka 14 Bible Online

Luka 14 - chopi bible

Luka 14

¹Ngu ditshiku da Sabbata, Jesu a to wulela nyumbani ka mmweyo wa vathangeli va Vafarisi, kuya dya sakudya. Se va ti mu wonisisa ta tinene.

²Se a ti ti ho masoni kwakwe m'thu wo lwala ngu txitsamba.[2]

³Se Jesu a to womba ka vagondisi va Mlayo ni ka Vafarisi a txi khene: “Ina ta tumeleka kuhanyisa ngu ditshiku da Sabbata mwendo kha ti tumeleki kani?”

⁴Aniko vona va to malala. Ene a to mteka e mu hanyisa, se e mu tsutisa.

⁵ Se a txi khene kwawe: “I mani kwanu awu, ngako mwanana wakwe mwendo homu yakwe, si txi wa txisimani ngu ditshiku da Sabbata, asi kuluvetiko ku si humisa ngu ditshiku da Sabbata kani?”

⁶Ka toneto va tandekile ku mu xamula.

⁷Jesu a to maha txidinganiso txiya ka vale va nga ti rambilwe, ngu kuwona ati va nga txi langisa tona makhalo o thanga, a txi khene kwawe:

⁸“Ngako u txi dhanelwa m'buso wa ntekano, u nge ya langa wukhalo wa masoni; a nga thuka a di rambilwe mmwani wa kuxonipheka kupinda awe;

⁹Awu a nga kuramba awe ni nene, a txi ta a ta kugela ku khene: Khukha ka ewo wukhalo, a na zumba awuwa. Konaho, awe, ngu tingana, u na khukha u txi ya ka wukhalo wo gwitisa.

¹⁰Aniko, ngako va txi kudhana, tsula u txi ya khalahatsha ka wukhalo wo gwitisa; se nyamne wa m'ti, a txi ku tela, a nata khene kwako: Mndoni, ngono ngu kheno makhatoni. Kwako eto ti nava i di ta ku kupfalisa masoni ka votshe va va nga rambwa.

¹¹ Nguko wuhi ni wuhi a ti kulisako, a na vekwa hahatshi, ani wu a ti vekako hahatshi, a na guletwa.”

¹²Msana keto, a ti khene ka wule a nga m'dhana: “U txi lava kuha vathu m'buso wa kususula mwendo wa kulalela, u nga dhane vandoni vako, mwendo vananu, mwendo maxaka, mwendo vaakelani, vanyatithombe va nga thuka ni vona va txi kutshumetela ngu so fana ni soneso.

¹³Aniko, ngako u txi maha m'buso, dhana sisiwana, silima, sidiya ni mabhofu;

¹⁴Eho u na va u di katekile, nguko evo kha va na so kutshumetela ngu sona. Kambe kuwukani ka valulami u nata tshumetelwa.”

¹⁵Mmweyo wa vale va nga ti ha sakudyani, ngako a txi pfa timhaketo, a to khene kwakwe: “A katekile awu a no ya dya sakudya Mfumoni ka Txizimu!”

¹⁶Kambe Jesu a ti khene kwakwe: “M'thu wokari a mahile m'buso wa hombe, e ramba vathu vavangi.

¹⁷Se a to ruma txithumi txakwe ngu txikhati txa m'buso, kuya gela va va nga rambwa, a txi khene: ‘Ngonani, silo sotshe si longisilwe.’

¹⁸Kambe va lambile votshe ngu diganda. Awu wo khata a ti khene kwakwe: ‘Ni xavile thembwe, se ni lava kuya yi wona; na ku kombela ti to u txi ya ni kombelela divalelo.’

¹⁹Mmwanyani a txi khene: ‘Ni xavile digumi da tikavi, se ni lava kuya ti duketa, na ku kombela u txi ya ni kombelela divalelo.’

²⁰Mmwanyani a txi khene: ‘Ni tekile msikati, ngu toneto, kha ni na kuya.’

²¹Txithumi txi to tshumela txi ya zivisa mkoma wa txona timhaketo. Se nyamne wa m'ti a to henya, a txi gela txithumi txakwe, a txi khene: ‘Kuluveta u txi ya mitendelani ni maphangoni ka didhoropa, u txi tisa kheno sikulungu ni silima ni mabhofu ni va vo khwita.’

²²Se txithumi txi txi kha txona: ‘Mkoma, ati u nga ruma ti mahilwe, kambe wukhalo wu ngadi ho.’

²³Se nyamne wa m'ti a txi khene ka txithumi: ‘Tsula tinzilani ni tibhiyoni, u txi kurumeta vathu kuwulela, nyumba yangu yi za yi tala.

²⁴Nguko na mi gela ku khani: Ni mmweyo wa va va nga rambwa kha na mbi danza txilalelo txangu.’ ”

²⁵Mabutho a hombe ma ti londetela Jesu, se ene a to va rendekela a txi khene kwawe:

²⁶“Ngako m'thu a txi ta kwangu, na asi vengeli tate wakwe, mame wakwe, msikati wakwe, vanana vakwe, vanawe va mazambi, tindiyakwe, hambi ni wutomi wakwe, kha sikoti kumaha mgondiswa wangu.

²⁷ Awu asi rwaliko txihambano txakwe, a txi ni londisa, kha sikoti kumaha mgondiswa wangu.

²⁸Ngu toneto, i mani kwanu, awu a lavako kuaka txitezi txa kudingilila ka txona, asi thangiko ngu kukhalahatsha a txi bala mtengo wa si si lavekako, a txi wonisisa ti to mwendo si nga eneta mthumo, kani?

²⁹Kasiku, ngako a di khatile kuaka, a txi tandeka kuheta, va si thuki va txi khata ku mu seka votshe va va no ti wona,

³⁰va txi kha vona: ‘Mamoyo a khatile kuaka, aniko a tandekile kuheta!’ ”

³¹“Niku mwendo ngu wuhi mfumeli, awu a xomako ku yalwa ni mmwani mfumeli, asi thangiko ngu kukhalahatsha e wonisisa tito, a di ni 10.000 wa masotxhwa, a nga sikota ku yalwa ni wule a tako a di ni 20.000 kani?

³²Ku ti ngako a txi ti wona ti to kha ti dingani, wa tutumela kurumela mtumi, mmwani mfumeli a di ngadi kule, kasi kuya kombela tinzila ta kudikha.

³³Ina-ko, ngu toneto, wuhi ni wuhi kwanu, asi tumeliko kuleka sotshe si a ku naso, kha na kumaha m'gondiswa wangu.”

³⁴“Mnyu njilo txi txi tshambako, kambe ngako m'nyu wu txi phwamwa, wu nga lungwa ngu txani wona kani?

³⁵Kha wu nga ngadi wu vhuna txilo, hambi i di kuphinduka wu maha mafu, hambi kumaha sa kunonisa; aniko wa theketwa hahanze. Awu a ku ni tinzeve ta kuengisa a na engise.”