Read chopi Luka 16 Bible Online

Luka 16 - chopi bible

Luka 16

¹Ene a wombile kambe ka vagondiswa vakwe txidinganiso txiya: “Ku ti ni wamwamna wokari wa tithomba, a nga ti ni mxayisi wa m'ti wakwe. Se mamoyo a to mangalelwa masoni ka nyamne wa tithomba, va txi kha vona wa hangalasela thomba yakwe.

²Se nyamne a to m'dhana a txi khene kwakwe: ‘Nda txani ti ni ti pfako ngu mhaka yako kani? Hinga txhamusela mhaka ya mthumo wako, nguko khu na mbiswa u txi maha muwoneleti wa simaha sangu.’

³Se muwoneleti a to pimisa mbiluni kwakwe a txi khene: ‘Ni na txani kuwa, ngako nyamne wangu a ni humisako ha mthumoni kani? Kudima kha ni sikoti, kutsimbila ni kombela, ka ni thela tingana.

⁴Na tiziva ati ni no maha, kasiku ni txi mana wo ni amukela m'tini kwakwe, mbimo yi ni no humiswa mthumoni.’

⁵Se ngako a di dhanile votshe va va nga ti txenekile ka mkoma wakwe, a to womba ka wo khata a txi khene: ‘Mtengo muni u nga txeneka ka nyamne wangu kani?’

⁶Se ene a ti khene: ‘Dizana da mipimo ya mtona.’ Ene a to khene kwakwe: ‘Kuluveta u txi khalahatsha, u txi bhala ku mtxhanu wa magumi a mipimo.’

⁷Sekoko a nje khene ka mmwani: ‘Awe-ko, mtengo muni u nga txeneka kani?’ Ene a xamute a txi khene: ‘dizana da mipimo ya fulaho.’ Mxayisi a to khene kwakwe: ‘Teka diphepha dako u bhala ku i mtxhanu wa magumi ni mararu.’

⁸Ngu konaho, nyamne wa tithomba a xamate wutxhari wa muwoneleti wule wo biha, nguko vanana va ditiko diya, va txharihile ngutu amu ka kuthumisana ni va liveleko lakwe, kupinda vanana va liwoningo.”

⁹“Ngu toneto, na mi gela ku khani: Txhatani vandoni ngu thomba yo mbi lulama, kasiku, mbimo yi mi no gumelwa, vona va na mi amukela tinyumbani ka wutomi wo mbi guma.

¹⁰Awu i ku wo thembeka ka sa sidotho, a na va i di wo thembeka kambe ni ka sasingi; awu i ku txidambu ka sa sidotho ngutu, njidambu kambe ni ka sasingi.

¹¹Ngu toneto, ngako mi sa ziva kumaha vo thembeka amu kuxayisani ka txuma txi i ku si nga txa txinene, mi na sikotisa kutxani kumahwa vaxayisi va sile i ku sa sinene kani?

¹²Ngako mi di tandekile kuva vaxayisi vo thembeka ka si i ku sa vane, i mani a no mi ninga asi i ku sanu kani?”

¹³ “A walo wu a sikotako kuthumela vakoma vambidi: Nguko mwendo a na nyenya mmweyo, a txi randa mmwani; mwendo a na namarela ka mmweyo, a txi kanyisa mmwani. Kha mi na kusikota kuthumela Txizimu ni tithomba ta mafu.”

¹⁴Vafarisi va i ku vathu va makolo ni male, va ti tiengisa totshe timhaketo, se ve mu seka.

¹⁵Ene a ti khene kwawe: “I di anu, mi ti maha valulami masoni ka vathu, kambe Txizimu txa tiziva timbilu tanu; nguko atxi txi nga guleka masoni ka vathu, i manyala masoni ka Txizimu.”

¹⁶ “Mlayo ni tigondo ta Vaprofeti ngu sona si nga txi thuma kala kuza e hoka Johani Mubhabhatisi; kukhukhela konako, Evhangeli ya Mfumo wa Txizimu ya txhumayelwa, se mmweyo ni mmweyo wa ti karata kufela kuwulela ka wona ngu mtamo.”

¹⁷ “Ta hehuka ti ta ku nzuma ni mafu si mwalala, kupinda kuwa hahatshi hambi txisesana tximwetxo txa Mlayo.”

¹⁸“Wuhi ni wuhi a lekako msikati wakwe e teka mmwani, wa maha wugango; se awu a tekako wu a nga lekwa ngu mkatakwe, wa maha wugango.”

¹⁹“Ku ti ti ho m'thu i nga ti nyatithombe, awu a nga txi ambala tinguwo ta masilika o bhilivila ni linya ya lisima ngutu, a txi dya sa kutshamba otshe masiku.

²⁰Se ku ti ni txisiwana, txi nga ti dhanwa ku i Lazaro, awu a nga txi zumba ha txikeni ka wule wa tithomba, a di tate ngu mazuku a silonda.

²¹A ti ti navela kukhura ngu maruru awa ma nga txi wa ngu ha mezani ka nyatithombe. Hambi timbwa ti txi ta ti ta danzela silonda sakwe.

²²Se ti mahekile ti to txisiwana txile txi fa, txi tekwa ngu tingelozi, txi yiswa ha khanani ka Abrahamu. A to fa nene nyatithombe, se a txi kelelwa.”

²³“Se ngako a di wuzumbeloni ka vafi, hagari ka sixaniso, a to gula maso a txi wona Abrahamu a di kule, ni Lazaro a di mu singarete hakhana kwakwe.

²⁴Konaho a to kwangula a txi khene: ‘Tata Abrahamu, ni size u ruma Lazaro, eya nakanisa tshoka ya litiho ngu mati, a txi ta ni timula lidimi, nguko na xaniswa ngutu ha mdhikilani hawa ka mndilo.’

²⁵Abrahamu a xamute a txi khene: ‘Mwanangu, alakanya ti to awe u amukete mathomo ako kuhanyani kwako, aniko Lazaro ene a amukete sixaniso; se konkuwa ene wa mana kuruliswa mbilu, aniko awe wa mana sixaniso.

²⁶Hahanze ka toneto kambe, ku na ni mkova wa kuhokoma ngutu hagari kwanu ni nathu, se ngu konaho, ava va lavako kutshawunyeta va txi ta kheyo kwanu kha va na kusikota, hambi anu kheyo kha mi na kusikota kutshawunyeta mi txi ta kheno kwathu.’ ”

²⁷“Kambe ene a engetile a txi khene: ‘Tata, na ku kombela, hambi keto, rumela Lazaro, e tsula m'tini ka tate wangu,

²⁸Nguko ni ni mtxhanu wa vanathu, kasi ku eya fakaza kwawe, ti to va si tiswi ka wukhalo wuwa wa sixaniso.’

²⁹Aniko Abrahamu a xamute a txi khene: ‘Vona va na ni Mlayo wa Mosi ni tigondo ta Vaprofeti, va na va engise.’

³⁰Kambe ene a ti khene: ‘Lambi, tata Abrahamu, aniko idiku wo tsula mmweyo wa vava va nga fa, a txi va yela, vona va ndi na hunduluka.’

³¹Aniko Abrahamu a mu xamute ku khene: ‘Ngako va si engisi Mlayo wa Mosi ni tigondo ta vaprofeti, hambi idiku wo wuka mmweyo wa vafi, kha va na mbi hunduluka.’ ”