Read chopi Luka 17 Bible Online

Luka 17 - chopi bible

Luka 17

¹Jesu a ti khene ka vagondiswa vakwe: “Kha ti koteki kupwateka sikhuvekiso, aniko ana ni dikhombo awule sikhuvekiso si humelelako ngu ngene.

²Ti nga va tinene, ngako a txi sungelelwa dirigwi da kukhurunga thamoni a txi vinzwa lineneni, kupinda kuva e khuvekisa mmweyo ka vale vavadotho.

³ Ti woneleni-ko! Ngako mwananu a di kuonhete, mu kawuke; ngako a txi ti laya, mu divalele.

⁴Ngako a di kuonhete ka mtxhanu ni kumbidi ngu ditshiku, se e tshumelela kwako ka mtxhanu ni kambidi ngu ditshiku, a txi khene: ‘Na ti sola’, mu divalele.”

⁵Vapostoli va wombile ka Mkoma va txi kha vona: “Hi engetele likholo!”

⁶Mkoma a xamute a txi khene: “Idiku mo va ni likholo lo fana ni nyingi ya txinapi, mi ndi na gela mmora wuwa mi txi khanu: ‘Ti dule u txi ya ti phaya upune lineneni.’ Se wona wu ndi na mi engisa.”

⁷“I mani kwanu, awu a ku ni txithumi txa kudima mwendo txa kudyisa tihomu, awu mbimo yi txona txi wuyako ngu thembweni, a txi gelako ku khene: ‘Ngono kheno ngu kukuluveta, u ta khalahatsha ha mezani ka sakudya kani?’

⁸Ina kha thangi ngu ku txi gela ku khene: ‘Ni lulamisele so lalela ngu sona, ambala txipani txa mthumo, u ta ni thumela mbimo yi ani ni dyako ni sela; ngu msana u na dya u txi sela nawe ngu txikhati txako kani?’

⁹Ina a na txi bongela ngu kuva txi di mahile ati a nga txi ruma kani?

¹⁰Ngu toneto, nanu, msana ka kuva mi di hetile kumaha totshe tifanelo tanu, wombani ku khanu: ‘Hi sithumi so mbi vhuna txilo, hi mahile tiya hi nga ti ni fanelo ya ku ti maha dwe.’ ”

¹¹Ngako Jesu a txi ya Jerusalema a to pinda ngu hagari ka Samariya ni Galileya.

¹²Se ngako a txi wulela didhoropani kokari, a to manana ni digumi da vathu vo lwala ngu tshekela, ava va nga ema ngu kule,

¹³se ve gula mapswi, va txi kha vona: “Jesu M'gondisi, hi pfete wusiwana!”

¹⁴Ngako a di va woni, a to khene kwawe: “Tsulani mi txi ya ti kombisa ka vaphaxeli.” Se ngako vona va txi tsula, va to maneka va di basisilwe ha nzila.

¹⁵Se mmweyo wawe, mbimo yi a nga wona ti to a kalamukile, a to tshumelela msana, na a txi dhumisa Txizimu ngu dipswi do guleka.

¹⁶A ti ya khizama minengeni ka Jesu, a txi mu bonga. Aniko ene i ti Msamariya.

¹⁷Se Jesu a nje khene: “Kasi hi nga digumi da vathu va nga hanyiswa kani? Va hani va va mtxhanu ni mune kani?

¹⁸Kha maneka ni wammweyo a nga tshumela a ta bonga ka Txizimu, hahanze ka wu wa matiko.”

¹⁹Se a to khene kwakwe: “Khukha u txi tsula, likholo lako li ku hanyisile.”

²⁰A wotisilwe ngu Vafarisi ti to Mfumo wa Txizimu wu nata ditshiku muni, se ene a to va xamula a txi khene: “Mfumo wa Txizimu kha wu woneki kuta ka wona.

²¹Kha wu na mbi wombwa taku: ‘Wonani, ndiwo hawa!’, Mwendo ku: ‘Wonani, ndiwole haleya;’ nguko Mfumo wa Txizimu wu hagari kwanu.”

²²Se a txi khene ka vagondiswa vakwe: “Yi nata mbimo yi mi no lava kuwona hambi dimwedo ka masiku a Mwanana wa M'thu, aniko kha mi na mbi di wona.

²³Va na kha vona kwanu: ‘Wonani, ndiyo hawa’ mwendo ku: ‘Wonani, ndiyole haleya’; aniko mi nga tsuleni, mi nga va londeteni.

²⁴Nguko, kufana ni kukeluka ka nzuma ku kelukako kukhukhela ka phuho yimweyo ya nzuma kala ka yimwani phuho, nene Mwanana wa M'thu a na mahisa toneto ngu ditshiku dakwe.

²⁵Kambe kukhata a fanete kuxaniswa ngutu e zondwa ngu va liveleko liya.”

²⁶ “Nga ti ti nga humelela ka mbimo ya Nowa, ti nava toneto ka mbimo ya Mwanana wa M'thu.

²⁷Va ti ti dya, ve sela, ve teka ni kutekwa, ku txi za kuhoka ditshiku di Nowa a nga wulela ngalavani, se ndambi yi txi hoka, yi va daya votshelele.

²⁸To nga toneto ti mahekile ka masiku a Loti: Va txi dya, ve sela, ve xava ve xavisa, ve dima ve phaya, ve aka tinyumba.

²⁹Aniko ditshiku di Loti a nga huma ngu dona Sodhoma, mndilo ni txivavula si to wiswa ngu nzuma, si va daya votshe.

³⁰Ti na vanga toneto, ditshiku di Mwanana wa M'thu a no humelela ngu dona.”

³¹“Ka donedo ditshiku, awu a ku txitimwi ka nyumba, na thundu yakwe yi di nyumbani, a nga thuke e txhika, eya yi teka; ni wu a ku thembweni, a nga tshumelele msana nene.

³²Khumbulani msikati wa Loti.

³³ Wuhi ni wuhi a no randa kuxayisa wutomi wakwe, a na mwalalelwa ngu wona. Aniko wuhi ni wuhi a mwalalelwako ngu wutomi wakwe, a na wu xayisa.

³⁴Na mi gela ni khani: Ka vathu vambidi va na va va ha ditahoni kumweko, ku na tekwa mmweyo, e lekwa mmwani.

³⁵Ka vavasikati vambidi va khurulako kumweko, ku na tekwa mmweyo, e lekwa mmwani.

³⁶[Ka vavambidi va ku thembweni, ku na tekwa mmweyo, e lekwa mmwani.”]

³⁷Se va to mu wotisa va txi kha vona: “Mkoma ti na mahekela hani, kani?” A txi khene kwawe: “Ahawa txirumbi txi ku kona, ngu konaho sinyana sa makoti si no sengeletana kona.”