Read chopi Luka 18 Bible Online

Luka 18 - chopi bible

Luka 18

¹Jesu a engetile a txi mahela vagondiswa vakwe txifananiso, kasi kuwomba ti to ka laveka kukhongela yotshe mbimo, va si rereki:

²“Didhoropani kokari, a ti ti ho mlamuli, awu a nga ti si nga ni txithavo ka Txizimu, kambe a ti si nga ni mhaka ni m'thu.

³Ka dona didhoropedo ku ti ni mmweyo wa noni, a nga txi wuyelela kuta kwakwe, a ta khene: ‘Hi ngani lamulela mhaka yi ni ku nayo ni mlala wangu.’

⁴Ngu mbimo yayingi, ene a lambile ku mu engisa. Msana keto, a to pimisa ene apune, a txi khene: ‘Hambiko ni si thaviko Txizimu, kambe ni si xoniphiko vathu,

⁵ngako noni yiya yi tako yi txi ni kulumela, ni na yi lulamisela mhaka, kasiku yi si tshumeli yi ta, yi ta ni xupha.’ ”

⁶Mkoma a engetile a txi khene: “Engisani mapswi awa ma wombwako ngu mlamuli wu wo mbi lulama!

⁷Ina Txizimu txi nga tandeka kulamulela vasawuleki va txona, ni kutimisela ngu vona ava va dilako masoni ka txona, wusiku ni mitshikari, kani?

⁸Na mi gela ti to Txizimu txi na kuluveta ku va lamulela. Kambe mbimo yi a no wuya Mwanana wa M'thu, ina a nata mana likholo ha mafuni, kani?”

⁹Jesu a to maha kambe txidinganiso txiya ka vale va nga txi ti themba nga vathu vo lulama, na va txi kanyisa vakwawe:

¹⁰“Vathu vambidi va to kwela va txi ya Dithepeleni kuya khongela; mmweyo wawe i ti mfarisi, mmwani i ti mkhupisi.

¹¹Mfarisi a di emile, a txi khongelisa tiya khanani kwakwe: ‘Txizimu, na ku bonga, nguko kha ni fanani ni vamwani vathu, i ku makhamba, sidambu, ni vamahi va wugango; kambe hambi mkhupisi wuwa kha ni fanani nayo.

¹²Na ti tona sakudya kambidi ngu divhiki, na humisa sa wugumi ka sotshe si ni ku naso.’

¹³Aniko mkhupisi, a di emile ngu kule, a ti si tsani ni kugula maso e wona nzumani, aniko a txi ti peka khana a txi khene: ‘Txizimu txangu, telwa ngu wumbilu ni nani, ni ku muonhi.’ ”

¹⁴ “Na mi gela ku khani awuwa ngene a nga tshumela e tsula m'tini kwakwe, a di basisilwe, ani wule mmwani mahala, nguko awuwa a ti guletako, a na vekwa hahatshi, ani wu a ti vekako hahatshi, a na guletwa.”

¹⁵Se va to mu tisela vanana vavadotho kasiku e va gwesa; kambe vagondiswa vakwe, ngako va txi ti wona, va to va tsimbisa.

¹⁶Aniko Jesu a to va dhana a txi khene: “Lekani vanana va txi ta kwangu, mi nga va tsiveleni, nguko Mfumo wa nzumani wu lumba vo nga vonavo.

¹⁷Kha ditshuri ni khani kwanu: Awu asi amukeliko Mfumo wa Txizimu nga mwanana, kha na mbi wulela ka wona.”

¹⁸Mfumeli wokari a to mu wotisa a txi khene: “M'gondisi wamnene, nji txani ni fanelako ku txi maha, kasi kumana thomba ya wutomi wo mbi guma kani?”

¹⁹Se Jesu a txi khene kwakwe: “U ni wombela txani ku ni wamnene kani? Kha ku nga ni wamnene, hahanze ka mmweyo dwe, i ku Txizimu.

²⁰ Wa yi ziva milayo yi yi ku kha yona: ‘U nga thuke u txi geleza, u nga daye, u nga pe, u nga henyele m'thu, thava tate wako ni mame wako.’ ”

²¹Ene a ti khene: “Eto totshe ni ti xayisile kukhukhela ha wananani kwangu.”

²²Ku ti ngako Jesu a txi pfa toneto, a to khene kwakwe: “Njilo tximwetxo txi pwatekako kwako. Xavisa sotshe si u ku naso, u txi avela sisiwana, ngu kona u no va ni txuma nzumani; senikoko, ngono u txi ni londisa.”

²³Aniko, ene, ngako a txi pfa timhaka tiya a to telwa ngu dikhodho ngutu, nguko i ti nyatithombe ngutu.

²⁴Ku ti ngako Jesu a di woni ti to ana ni dikhodho ngutu, a ti khene: “Ta karata ka va va ku ni tithomba kuwulela Mfumoni ka Txizimu.

²⁵Ti nga hehuka kuwulela dikamelu ka ditshoko da txhingani, kupinda kuwulela nyatithombe Mfumoni ka Txizimu.”

²⁶Ava va nga tiengisa va to kha vona: “Ngako i di toneto, ku nga huluka mani, kani?”

²⁷Se ene a txi khene: “Ati ti xulako vathu, kha ti xuli Txizimu.”

²⁸Se Pedro a nje khene: “Hi nga wona, hi lekile sotshe, hi kulondisa.”

²⁹Se ene a txi khene kwawe: “Kha ditshuri na mi gela ku khani: Kha ku nga ni m'thu wu a nga leka nyumba yakwe, ni msikati, hambi vanawe mwendo vaveleki vakwe, mwendo vanana vakwe, ngu mhaka ya Mfumo wa Txizimu,

³⁰a no mbi amukela so pinda siya ka mbimo ya konakuwa, se ka mbimo yi yi tako, a na ningwa wutomi wo mbi guma.”

³¹Ene a to dhana ngu phuho va Digumi ni Vambidi, a txi va gela ku khene: “Wonani, ha kwela hi ya Jerusalema, se totshe ti ti nga bhalwa ngu Vaprofeti, madingano ni Mwanana wa M'thu, ti na hetiseka.

³²Nguko a na ningelwa ka vamatiko, vona va na mtseketsela, ve mruketela, ni ku mthurela.

³³Se, msana ka ku mkwapela ngu sisepu, va na m'daya; kambe a na wuka ngu ditshiku da wuraru.”

³⁴Aniko vona kuwalo ni txilo va nga txi pfisisa ka timhaka tiya: Dipswi diya di ti sisate kwawe, se kha va ti manisisa ati ti nga txi wombwa.

³⁵Ku ti ngako Jesu a txi tshuketela Jeriko, ku ti ti ho m'thu wa dibhofu, a nga ti khalahatshile hafuhi ni nzila e kombela.

³⁶Se ngako a txi pfa dibutho di txi pinda, a to wotisa a txi khene: “Nji txani kani?”

³⁷Ve mu gela ku kha vona: “I Jesu wa Nazareta a pindako.”

³⁸Sekoko ene a to kwangula, a txi khene: “Jesu Mwanana wa Dhavhidha, ni pfele wusiwana.”

³⁹Se ava va nga ti thangete masoni va to mu kawuka, va txi a na malale; kambe ene a to engeta e kwangula ngu mtamo a txi khene: “Mwana Dhavhidha, ni pfele wusiwana!”

⁴⁰Sekoko Jesu a to ema, a txi khene va na mu tise kwakwe. Ku ti ngako a di hafuhi, a to mu wotisa a txi khene:

⁴¹“U randa ku ni txi ku mahela txani kani?” Ene a xamula a txi khene: “Mkoma, ni na tshumele ni wona!”

⁴²Jesu a txi khene kwakwe: “Tshumela u wona! Likholo lako li ku hanyisile.”

⁴³Se ene kunukunuko a to wona, e mlondisa, na a txi dhumisa Txizimu. Votshe vathu va va nga ti wona, ni vona va to pfalisa Txizimu.